1989 جىلدىڭ 7 ساۋىرىندە فرانتسيانىڭ پۋەنت-ا-پيتر قالاسىندا دۇنيەگە كەلگەن تەددي رينەردىڭ بويى – 204 سانتيمەتر, سالماعى – 125 كيلو. تورتكۇل دۇنيەدە ودان ەڭسەلى دزيۋدوشى جوق. ال رينەردىڭ كۇرەس ءتاسىلى ءتىپتى ەرەكشە. بويى مەن قولىنىڭ ۇزىندىعىن ول كەرەمەت پايدالانادى. قارسى كەلگەندەردى الىپ تا, شالىپ تا جىعىپ جۇرگەن بالۋانعا جەر-جاھان جانكۇيەرلەرىنىڭ قۇرمەتى وتە زور. ولار ونى بۇرىننان «قونجىق تەددي» دەپ ەركەلەتەدى. بۇل جاناما ەسىم سپورتشىنىڭ وزىنە دە قاتتى ۇنايدى.
+100 كيلو سالماق دارەجەسىندە كۇش سىناسىپ جۇرگەن فرانتسيانىڭ الىبى 2008 جىلى بەيجىڭ وليمپياداسىندا قولا مەدالدى قاناعات تۇتتى. 2012 جىلى لوندون جانە 2016 جىلى ريو-دە-جانەيرودا الاۋى تۇتانعان وليمپيا ويىندارىندا قارسىلاس شاق كەلتىرمەي, باس جۇلدەنى ولجالادى. 2021 جىلى توكيوداعى دوداعا ول باستى فاۆوريتتەردىڭ ءبىرى رەتىندە كەلدى. ولاي دەۋگە نەگىز, 2008 جىلى ەرەسەكتەر دۋىنا قوسىلعالى بەرى تەددي نەبارى ءۇش رەت قانا جەڭىلىستىڭ كەرمەك ءدامىن تاتقان ەكەن. اتاپ ايتساق, ءدال سول جىلى بەيجىڭدەگى ويىنداردىڭ جارتىلاي فينالىندا وزبەكستاندىق ابدۋللو تانگريەۆكە, 2010 جىلى توكيودا وتكەن الەم چەمپيوناتىنىڭ فينالىندا جاپونيالىق دايكي كاميكاۆاعا جانە 2020 جىلى پاريجدەگى گراند سلەم تۋرنيرىندە كۇنشىعىس ەلىنىڭ تاعى ءبىر وكىلى كوكورو كاگەۋراعا ەسە جىبەردى. تاعى ءبىر ايتا كەتەرلىك جايت – 2010-2020 جىلدار ارالىعىندا رينەر 154 رەت تاتاميگە شىعىپ, سول بەلدەسۋلەردىڭ بارلىعىندا جەڭىسكە جەتتى. راسىندا دا, بۇل – ادام نانعىسىز كورسەتكىش!
توكيو وليمپياداسىندا اسا اۋىر سالماق دارەجەسىنىڭ باس جۇلدەسى تەدديگە بۇيىرمادى. ول ويدا-جوقتا رەسەيلىك تامەرلان باشاەۆقا جول بەردى. ودان كەيىنگى ەكى قارسىلاسىن ۇتىپ, قولا مەدال ەنشىلەدى. بىراق داڭقتى دزيۋدوشىنىڭ قولاعا كوڭىلى تولماعانى انىق. ەسەسىنە كوماندالىق سايىستا فرانتسيا قۇراماسى ءبىرىنشى ورىن الدى. سول كوماندانىڭ ساپىندا تەددي دە بولدى. سايكەسىنشە, ول دا التىن مەدالدى موينىندا جارقىراتتى.
الەم چەمپيوناتىنىڭ تاريحىنا ۇڭىلسەك, تەددي رينەردىڭ الدىنا تۇسەتىن بىردە-ءبىر بالۋان جوق. 2007-2017 جىلدار ارالىعىندا جالاۋى جەلبىرەگەن جارىستا ول 11 رەت باس جۇلدەنى قانجىعاسىنا بايلادى. فرانتسيالىق دزيۋدوشى سونىڭ توعىزىن جەكەلەگەن جارىستا جەڭىپ السا, ەكەۋىن كوماندالىق سايىستا يەلەندى. ودان بولەك, ءبىر كۇمىس پەن ءبىر قولاسى تاعى بار. ال ەۋروپا چەمپيوناتىندا تەددي بەس رەت توپ جاردى.
جالپى, رينەردىڭ قازاقستانعا كەلۋى تەگىن ەمەس. قازىرگى كەزدە ەلىمىزدىڭ ەرلەر مەن ايەلدەر قۇراماسىن نۇربول سۇلەيمەنوۆ پەن ەرلان الپىسباەۆ سىندى بىلىكتى مامانداردىڭ باپتاپ جۇرگەنى بەلگىلى. ال ولاردىڭ كەڭەسشىلەرى – فرانتسيادان كەلگەن قوس جاتتىقتىرۋشى كساۆە موندەنكسا مەن ستەفانا تراينو.
