ماقساتتىڭ بار ماقساتى – ۇلتتىق سۋسىنمىز سانالاتىن قىمىزدى برەندكە اينالدىرۋ. بۇگىندە ول قىمىزدى زاماناۋي تەحنولوگيامەن ءوندىرۋ جۇمىستارىن قولعا العان. قىسقاسى, پلاستيك ىدىسقا قۇيىلعان قىمىز ۇزاق ۋاقىت بويى ساقتالادى. وسىنى ەسكەرگەن ول قىمىز ءوندىرىسىن مودەرنيزاتسيالاپ, سۋسىندى ءبىر ليترلىك پلاستيك ىدىسقا تولتىرۋ ءۇشىن ارنايى تسەح اشقان.
«اۋەلدە ءتورت باس ساۋىن بيە الىپ, جەلىگە بايلاعان بولاتىنمىن. تاعات تاپپاي ەڭبەكتەنۋدىڭ ناتيجەسىندە ءوڭىر تۇرعىندارىن ەكولوگيالىق تۇرعىدان تازا ءارى ۇلتتىق سۋسىنىمىزبەن قامتۋدىڭ جولىن تاپتىق. قاسىمداعى ازاماتتاردىڭ قولداۋىنىڭ ارقاسىندا بيە سانىن ون ەكىگە جەتكىزگەن ەدىك. وسىلايشا, ءونىم كولەمىن ۇلعايتتىق. تيىسىنشە تابىسىمىز دا ارتا ءتۇستى.
البەتتە, باستاعان ءىستى سوڭىنا دەيىن جەتكىزۋ قاجەت ەكەنىن سەزىنەمىز. سول ءۇشىن دە اۋىلىمىزداعى جاۋعاش باتىر كوشەسىندە ورنالاسقان جەر تەلىمىمىزگە قوراجاي سالدىق. باسقا دا جۇمىستاردى اتقاردىق. الا تاڭنان مال جايعاۋدىڭ, تاۋلىگىنە الدەنەشە رەت بيە ساۋدىڭ ماشاقاتىن ءدال وسى ىسپەن اينالىسىپ جۇرگەن ازاماتتار بەس ساۋساعىنداي جاقسى بىلەدى. ءبىز بەينەتتىڭ زەينەتىن كورىپ وتىرعانىمىزعا قۋانىشتىمىز. ءار ادام ءوز ىسىنە مۇقيات بولسا, تابىستى بولاتىنىنا ەشقانداي كۇمانىمىز جوق», دەدى ماقسات الىمسەيىتوۆ.
بال قىمىزىن ءوڭىر كولەمىندە عانا ەمەس, الماتىلىقتارعا دا وتكەرىپ جۇرگەن ماقسات الىمسەيىتوۆ ۇلتتىق سۋسىننىڭ سىرتىنداعى جاپسىرماعا ۇلكەن ۇلى اقنۇردىڭ ەسىمىن جازىپ, «Aqnur» دەگەن اتاۋ قويىپ ۇلگەرىپتى. مۇنىسىن ول بيزنەسىنىڭ دامۋىنا بار ىنتاسىمەن كومەكتەسىپ جۇرگەن ۇلكەن ۇلىنا دەگەن قۇرمەتى دەپ ەسەپتەيدى.
ءبىر قۋانتاتىنى, ۇلتتىق سۋسىن ارقىلى تابىس تاۋىپ وتىرعان ازاماتتىڭ تاۋارى الماتى قالاسىنداعى دۇكەندەردە دە ساتىلىمعا شىققانى. الداعى ۋاقىتتا وزگە قالالارعا دا جونەلتىلۋى ىقتيمال. جۇمىسىن جاڭادان باستاعان ماقسات بولاشاقتا ءونىمىنىڭ ەل بويىنشا وتكىزىلەتىنىنە سەنەدى.
م.الىمسەيىتوۆتىڭ ايتۋىنشا, بيە سانىن 150-گە جەتكىزۋ ارقىلى جاز مەزگىلىندە تاۋلىگىنە – 400, قىس كەزىندە 300 ليتر قىمىزدى نارىققا شىعارۋعا نيەتتى. ارينە, مۇنىڭ ءبارى از عانا جىلدىڭ ىشىندە اتقارىلعان جۇمىستىڭ ناتيجەسى ەكەنى داۋسىز. وسىلايشا, 4 بيەمەن باستاعان كاسىبىنىڭ ءورىسى جىل وتكەن سايىن كەڭەيىپ كەلەدى.
«مال شارۋاشىلىعىن دامىتىپ, ۇلتتىق سۋسىنىمىزدى برەندكە اينالدىرۋ جولىندا ايانىپ قالمايمىن. وسىلايشا, ەلدىڭ وركەندەۋىنە تامشىداي بولسىن ۇلەس قوسسام دەيمىن. ەڭ باستىسى, تابيعي ءونىم ارقىلى جۇرتتىڭ العىسىن العىم كەلەدى», دەدى ول ءوز ويىمەن ءبولىسىپ.
جامبىل وبلىسى,
مەركى اۋدانى
