2022 جىلى وسى كەنىشتەن 940-تان استام زاڭسىز التىن ىزدەۋشى ۇستالىپ پوليتسياعا تاپسىرىلعان بولاتىن.
مارقۇمنىڭ 1982 جىلى تۋعان وزبەكستان رەسپۋبليكاسىنىڭ ازاماتى ەكەنى انىقتالدى.
سونداي-اق وقيعا كۋاگەرى رەتىندە قاراعاندى وبلىسىنىڭ جاڭاارقا اۋدانىنىڭ تۇرعىنى, 1991 جىلى تۋعان ەر ادام انىقتالدى, ول شاحتادا ەكى اپتا بولعانىن مالىمدەدى. ول «كوندەيكا» (كەنشىلەردىڭ دەمالىس بولمەسى) ماڭىنان قيمىلسىز جاتقان ەر ادامنىڭ ءمايىتىن تاپقان. ءمايىتتىڭ جانىندا تاستار جاتقان. ونىڭ ايتۋىنشا, قايتىس بولعان ادام 18 كۇن بويى شاحتادا بولعان.
كەيىن جاقىن ماڭداعى بەستوبە اۋىلىنىڭ تۇرعىنى, 1994 جىلى تۋعان سىبايلاسىمەن بىرگە ول ءمايىتتى قاپقا سالىپ, «تسەنترالنايا» شاحتاسىنىڭ 475-ءشى دەڭگەيىنەن جەر بەتىنە شىعارادى, اقىرىندا ءمايىت سول جەردەن تابىلدى. وسى وقيعا بويىنشا قىلمىستىق ءىس قوزعالدى.
وسىعان دەيىن دە «التىنالماس اك» اق كومپانياسى بەستوبە كەنىشىنىڭ شاحتاسىندا قۇرامىندا التىن بار كەندى زاڭسىز ءوندىرۋ وقيعالارى بار ەكەندىگى تۋرالى بىرنەشە رەت ەسكەرتكەن بولاتىن.
بۇگىنگى تاڭدا شاحتاداعى جۇمىستار توقتاتىلعان: ەلەكتروندىق جانە تەلەفون بايلانىسى اجىراتىلدى, شاحتالاردىڭ وقپاندارى جابىلدى, جولداردىڭ ليۋكتەرى بىتەلدى, ەسىكتەر مورلەنىپ كۇزەتكە تاپسىرىلدى, جەلدەتۋ جۇمىس ىستەمەيدى, كوتەرگىش قوندىرعىلارى جۇمىس ىستەمەيدى, كوتەرگىش قوندىرعىلاردى شۇعىل ىسكە قوسۋ مۇمكىن ەمەس. سونىمەن قاتار كەنىشتى جەر استى سۋلارى باسىپ جاتىر.
قاۋىپتى جاعدايلارعا, بىرنەشە رەت ەسكەرتۋلەرگە, تۇراقتى سۋىق اۋا رايىنا قاراماستان زاڭسىز التىن ىزدەۋشىلەر ومىرلەرىن قاتەرگە تىگىپ, شاحتاعا تۇسۋلەرىن قويماي وتىر. كومپانيا شاحتاعا زاڭسىز تۇسۋدەن باس تارتۋعا, ال شاحتاداعى التىن ىزدەۋشىلەردى شۇعىل تۇردە ونى تاستاپ كەتۋگە شاقىرادى.
