ونىڭ ايتۋىنشا, قازاقستاننىڭ ەكى ازاماتى وڭتۇستىك-شىعىس ازيادا ەڭبەك قۇلدىعىنا تۇسكەن.
«وتكەن جىلدىڭ جەلتوقسان ايىنىڭ سوڭىندا ولار ءبىزدىڭ تايلاندتاعى ەلشىلىگىمىزبەن بايلانىسقا شىقتى. ولاردىڭ اتا-انالارى دا بىزگە جۇگىندى. نە ايتا الامىز؟ بۇل العاش رەت بولىپ جاتقان جاعداي ەمەس», دەدى ايبەك سمادياروۆ.
سىرتقى ساياسات ۆەدومستۆوسىنىڭ رەسمي وكىلى بىرنەشە اي بۇرىن تاعى ءبىر قازاقستاندىق وسىنداي جاعدايعا تاپ بولعانىن ەسكە سالدى. ول كەزدە انەل بەرماعانبەتوۆا لاوستاعى ەڭبەك قۇلدىعىنا تۇسكەن ەدى. وعان سول جەردەن ورالۋعا بۇكىل ەل جۇمىلا كومەكتەسكەن.
«قازىر جاعداي وڭاي ەمەس, مەملەكەتتىك ورگانداردىڭ عانا ەمەس, ۇكىمەتتىك ەمەس ۇيىمداردىڭ دا كومەگى قاجەت. وندا قازاقستان ازاماتتارىمەن قاتار باسقا ەلدەردىڭ ازاماتتارى دا بار. سوندىقتان ماسەلە كەشەندى شەشىمدى قاجەت ەتەدى. دەگەنمەن, ماسەلە تايلاندتاعى ەلشىلىگىمىزدىڭ ەرەكشە باقىلاۋىندا. كونسۋل وتانداستارىمىزبەن سويلەستى. ماسەلە وڭ شەشىلەدى دەپ ۇمىتتەنەمىز», دەپ ءتۇسىندىردى ايبەك سمادياروۆ.
قورىتىندىلاي كەلە, ول قازاقستاندىقتارعا شەتەلگە جۇمىسقا بارار الدىندا كەلىسىمشارتتاردىڭ تالاپتارىمەن تانىسۋعا كەڭەس بەردى.
«مەن ءبىزدىڭ ازاماتتارىمىزعا ەسكەرتۋ جاساعىم كەلەدى. شەتەلگە جۇمىسقا شىقپاس بۇرىن, بارلىق كەلىسىمشارتتاردى مۇقيات وقىپ شىعىڭىز. سەبەبى بۇل ءسىزدىڭ جەكە جاۋاپكەرشىلىگىڭىز, ول سىزگە بۇيىردەن شىعۋى مۇمكىن», دەدى ايبەك سمادياروۆ.
ەسكە سالا كەتسەك, لاوستا ەڭبەك قۇلدىعىنا تۇسكەن قازاقستاندىق انەل بەرماعانبەتوۆا 2022 جىلدىڭ 26 تامىزىندا ۇيىنە ورالدى. قىزدى قىتايدان لاوسقا الداپ اكەتكەن ەكەن. انەلدىڭ تۋىستارى پوليتسياعا, ۆەتنام, تايلاند جانە لاوس ءسىم ەلشىلىكتەرىنە جۇگىنۋگە ءماجبۇر بولعان. قۇقىق قورعاۋ ورگاندارىنىڭ مالىمدەۋىنشە, بۇل فاكتى بويىنشا قىلمىستىق ءىس قوزعالدى.
