يانني نەگىزىنەن اسپاپتىق تۋىندىلاردى تىڭدارمانىنا ۇسىنىپ, دجاز, كلاسسيكالىق, سوفت روك جانە الەمدىك مۋزىكانى ءبىر-بىرىمەن تىعىز بايلانىستىرىپ, جىمداستىرا الدى. ونىڭ ءوز سالاسىندا شوقتىعى بيىك تۋىندىلار جازۋىنا دا وسى ەرەكشەلىگى سەبەپ بولدى دەۋگە بولادى.
سونىمەن بىرگە يانني تاريحي كونتسەرتتەر بەرۋ جانە قوعامدىق ورتادا كوپ كورسەتىلەتىن بەينەروليكتەر شىعارۋ ارقىلى الەمدىك ارەناعا شىقتى.
ونىڭ جۇرتتى باۋراعان كونتسەرتى «Live at the Acropolis» دەپ اتالادى. ءياننيدىڭ كونتسەرتتەرى كوبىنەسە تاريحي ورىنداردا وتەدى. اسىرەسە, ءۇندىستاننىڭ ءتاج-ماحالىن, بىرىككەن اراب امىرلىكتەرىنىڭ بۋردج-حاليفاسى, رەسەيدىڭ كرەملى, پۋەرتو-ريكوداعى ەل-موررو سارايى, ليۆاننىڭ ەجەلگى بيبلوس قالاسىندا تىڭدارمانىنا جول تارتادى.
ءياننيدىڭ وسىعان دەيىن ون التى البومى جارىق كورىپ, الەمنىڭ ءار تۇكپىرىندە لەزدە تارالىپ جاتتى. سول ءۇشىن دە ونىڭ كوپتەگەن شىعارماسى «ۇزدىك جاڭا ءداۋىر البومى» ساناتىندا بولدى. ايتالىق, «Dare to Dream» جانە «In My Time» گرەممي سىيلىعى بويىنشا تاڭداۋلى اتالىمدارعا يە بولدى.
وزگەشە ونەرى ونى دۇنيەنىڭ ءتورت بۇرىشىنداعى تىڭدارماندارمەن دوس ەتتى. ول بەس قۇرلىقتىڭ 30-دان استام ەلىندە ونەر كورسەتتى. 2015 جىلدىڭ اياعىنا دەيىن 5 ميلليوننان استام ادامنىڭ الدىندا جاندى داۋىستا ءان سالدى. تىڭداعان قۇلاقتىڭ قۇرىشىن قاندىرار يانني ليريكالارى اساۋ بۇلاقتاردىڭ اعىسىن, يەن دالادا شاۋىپ بارا جاتقان تۇلپارلار ءدۇبىرىن ەسكە تۇسىرەدى, كوز الدىڭا اكەلەدى.
دۇنيە جۇزىندەگى مادەنيەتتەرمەن توعىسقان ونىڭ شىعارماشىلىق الەمى ۇزدىكسىز تولىعىپ وتىردى. يانني «ناعىز جاھاندىق سازگەر» دەپ اتالدى, ونىڭ مۋزىكاسى ء«بىر الەم, ءبىر حالىق» فيلوسوفياسىن انىق كورسەتەدى. «The Truth of Touch» البومى 2011 جىلدىڭ اقپانىندا جارىققا شىقتى, بۇل ونىڭ سەگىز جىل بۇرىنعى جاڭا مۋزىكالاردان تۇراتىن العاشقى ستۋديالىق البومى. ونىڭ تۋىندىلارىنىڭ ءارتۇرلى مازمۇنى زاماناۋي اسپاپتىق, ەلەكتروندى جانە كينەماتوگرافيالىق اسەرلەردى ءوز ىشىنە الدى. سول ءۇشىن دە ونىڭ الەمى تانىمال ونەر ءۇشىن, ونەرگە عاشىق جاندار ءۇشىن جاڭا ءداۋىر جانە الەمدىك مۋزىكامەن بىردەي بولدى.
2014 جىلدىڭ ناۋرىز ايىندا يانني ءوزىنىڭ ون جەتىنشى ستۋديالىق البومى Inspirato-نى شىعاردى. بۇل تۋىندىنى دا تىڭدارماندار بۇرىنعىداي ءبىر دەممەن قابىل الدى. ءياننيدىڭ «ارماندار ورىندالعاندا» پەساسى 60 كۇندىك سولتۇستىك امەريكا تۋرىندا كەزەڭ-كەزەڭىمەن ورىندالىپ, الەمدىك دەڭگەيدەگى شىعارماعا جول اشىلدى. ءبىر سوزبەن ايتقاندا, گرەكتەن جۇرەككە جول سالعان يانني مۋزىكالارى ماڭگى ولمەيدى.
