مونوپوليست كومپانيا تۇرعىنداردىڭ ەلەكتر جارىعى بويىنشا شىعىنىن جابۋعا 240 ملن تەڭگە بولگەن. بۇل قاراجات تۇتىنۋشىلار اراسىندا تەڭدەي ءبولىنىپ, ەسەپشوتتارىنا جاقىن ۋاقىتتا اۋدارىلادى. «واەك» اق باسقارما توراعاسى باعدات ورال وتەماقىنىڭ كەشىكتىرىلۋىنە ەلەكتر ەنەرگياسى قىزمەتىن كورسەتەتىن كومپانيانىڭ بولەك كاسىپورىن ەكەنى سەبەپ بولعانىن جەتكىزدى. ولارمەن كەلىسىمگە كەلىپ, بارلىق شىعىنداردى ەسەپتەۋ ءۇشىن ءبىراز ۋاقىت جۇمسالعان. سوڭىندا وتەماقىنى 48 مىڭ تۇتىنۋشى الۋى كەرەك دەگەن شەشىمگە كەلىپتى. بۇل – قالانىڭ بارلىق وتباسىلارى ەسكەرىلەدى دەگەن ءسوز.
– الگورتيمدى ءتۇزۋ ءۇشىن ءبىراز ۋاقىت قاجەت بولدى. قالا جۇرتى قالىپتى جاعدايدا ءبىر اي ىشىندە 220 ملن تەڭگەنىڭ ەلەكتر جارىعىن تۇتىنادى ەكەن. وسى مالىمەتتەردى قورىتا كەلىپ, ءبىز «ەكىباستۇزەنەرگو» كومپانياسىنا 240 ملن تەڭگە اۋدارامىز دەپ شەشىم قابىلدادىق. بۇل جۋىق ارادا بارلىق تۇتىنۋشىنىڭ ابونەنتتىك شوتتارىنا تاراتىلادى. وتەماقىنى تولەۋ كەزىندە اپات ورىن العان كۇندەردى ەمەس, تۇتاس ءبىر ايلىق ەسەپتى ەسكەردىك, – دەدى ول.
سونداي-اق باسقارما توراعاسى توتەنشە جاعداي كەزىندە پاتەردەگى تومەن تەمپەراتۋرانىڭ كەسىرىنەن ىستەن شىققان تۇرمىستىق تەحنيكالار ءۇشىن دە وتەماقى تولەنەتىنىن جەتكىزدى. بارلىق كەلىپ تۇسكەن ءوتىنىش قارالىپ, اپاتتىڭ شىن مانىندە تەحنيكالارعا زيانى تيگەنى دالەلدەنسە, بۇيىمداردىڭ قۇنى وتەلەدى. ەگەر ازاماتتار تەحنيكانى ءوز قاراجاتى ەسەبىنەن جوندەتىپ قويسا, چەكتەرىن ساقتاۋى كەرەك. جۇمىس ىستەمەي قالعان ەلەكتر قۇرالدارىن ارنايى ماماندار تەكسەرىپ, قورىتىندى شىعارادى. بۇگىنگە دەيىن كەيبىر تۇرعىندار بۇرىننان ىستەمەي تۇرعان تۇرمىستىق تەحنيكالارىن اپاتتا بۇزىلدى دەگەن جەلەۋمەن وتەماقى تالاپ ەتپەكشى بولعان. سوندىقتان ارنايى كوميسسيا بارلىعىن تەكسەرىپ وتپەك.
ەكىباستۇز قالاسىنىڭ اكىمى ايان بەيسەكين قازىرگى ۋاقىتتا شاھار بويىنشا 30 كوپقاباتتى ۇيدە جىلۋ نورمالارى تالاپقا ساي بولماي وتىرعانىن ايتادى. بۇل ماسەلەنى جىلۋ-ەنەرگو ورتالىعىندا قوسىمشا تاعى ەكى قازاندىقتى ىسكە قوسۋ ارقىلى شەشۋ كوزدەلۋدە.
– بارلىق كوپقاباتتى باسپانالار جىلۋمەن تولىق قامتىلعان. دەي تۇرعانمەن 30 مەكەنجايدا تەمپەراتۋرالىق جانە گيدراۆليكالىق پارامەترلەر بويىنشا ماسەلەلەر تۋىنداپ تۇر. بۇعان نەگىزگى سەبەپتىڭ ءبىرى – جىلۋ بەرۋ ستانساسىنداعى كەيبىر قازاندىق اگرەگاتتارىندا پروبلەمالار ءجيى ورىن الادى. كەيبىرى ىستەن شىقسا, ەندى ءبىرى قاتارعا قايتا قوسىلىپ جاتىر. سونىڭ سالدارىنان جىلۋ جۇيەسىندە تەڭگەرىمسىزدىكتەر تۋىندايدى. ستانسا جۇمىسىن تۇراقتاندىرۋ مىندەتىمەن ماماندار شۇعىلدانىپ جاتىر, – دەپ باياندادى اكىم.
توتەنشە جاعداي كەزىندە 424 پاتەر ب ۇلىنگەن. ونىڭ 52-سىندە جوندەۋ جۇمىستارى جۇرگىزىلۋدە. جالپى سانى 338 پاتەرگە اعىمداعى جوندەۋ قاجەت. بارلىق شىعىندى «واەك» كومپانياسى كوتەرەدى. 13 پاتەر «Asar Ume» قوعامدىق قورىنىڭ ەسەبىنەن بۇتىندەلۋدە.
پاۆلودار وبلىسى,
ەكىباستۇز قالاسى
