وتسك «Smart Data Ukimet» اناليتيكالىق جۇيەسىمەن ينتەگراتسيالانعان. جۇيەدە مەملەكەتتىك ورگانداردىڭ بارلىق دەرەكقورى جيناقتالعان. وندا تابىس دەڭگەيى, جىلجىمالى جانە جىلجىمايتىن م ۇلىكتىڭ بولۋى, وتباسى قۇرامى, كرەديتتىڭ بولۋى جانە ت.ب. سياقتى ءارتۇرلى اقپارات قامتىلعان.
بۇگىنگى تاڭدا مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى نەگىزىندە وتسك-دا قازاقستاننىڭ 19,5 ملن ازاماتى نەمەسە 6,3 ملن وتباسى تۋرالى اقپارات جيناقتالعان.
قولدا بار دەرەكتەر نەگىزىندە ەكونوميكالىق, الەۋمەتتىك, تۇرعىن ءۇي جاعدايلارى, دەنساۋلىق پەن ءبىلىم بويىنشا وتباسىنىڭ ءال-اۋقات دەڭگەيىن باعالاۋعا جانە قاداعالاۋعا مۇمكىندىك بەرەتىن تالداۋلار جۇرگىزىلەدى, ال الەۋمەتتىك تاۋەكەل تۋىنداعان جاعدايدا وتسك جاردەماقى نەمەسە الەۋمەتتىك تولەمدى پرواكتيۆتى تۇردە الۋعا مۇمكىندىك بەرەدى.
ول ءۇشىن وتسك ارقىلى الەۋەتتى جاردەماقى الۋشىعا SMS-حابارلاما جىبەرىلەدى جانە وڭ جاۋاپ بولعان جاعدايدا وعان ءتيىستى تولەم تاعايىندالىپ, ءتيىستى قاراجات بانكتىك شوتىنا اۋدارىلادى.
ەسكە سالا كەتەيىك, وتسك 2022 جىلدىڭ 1 قىركۇيەگىنەن باستاپ قاناتقاقتى رەجىمدە ىسكە قوسىلدى. اپروباتسيا كەزەڭىندە مەملەكەتتىك قىزمەت كورسەتۋگە كەلىسىم الۋ ءۇشىن بارلىعى 56,9 مىڭ SMS-حابارلاما جىبەرىلىپ, جاۋاپ بەرگەن 12,9 مىڭ ازاماتقا قولداۋ شارالارى كورسەتىلدى.
قازىرگى تاڭدا وتسك-دا جاردەماقىلار مەن الەۋمەتتىك تولەمدەردىڭ 9 ءتۇرى بويىنشا قىزمەتتەر الۋ مۇمكىندىگى بەرىلگەن: جۇكتىلىككە جانە بوسانۋعا بايلانىستى تابىسىنان ايىرىلعان جاعدايدا الەۋمەتتىك تولەمدەر; بالا كۇتىمىنە بايلانىستى تابىسىنان ايىرىلعان جاعدايدا الەۋمەتتىك تولەمدەر; جۇمىسىنان ايىرىلعان جاعدايدا الەۋمەتتىك تولەمدەر; اسىراۋشىسىنان ايىرىلعان جاعدايدا الەۋمەتتىك تولەمدەر; مۇگەدەكتىگى بار بالا تاربيەلەپ وتىرعان اتا-اناعا (قامقورشىعا) بەرىلەتىن جاردەماقىلار, مۇگەدەكتىگى بويىنشا جاردەماقىلار; كوپبالالى وتباسىلارعا بەرىلەتىن جاردەماقىلار; «كۇمىس القا» نەمەسە «التىن القا» القالارىمەن ماراپاتتالعان كوپبالالى انالارعا بەرىلەتىن جاردەماقىلار; اتاۋلى الەۋمەتتىك كومەك. سونداي-اق ازاماتتارعا وتسك ارقىلى زەينەتاقى تولەمدەرىن الۋ مۇمكىندىگى تۋرالى اۆتوماتتى حابارلاما جىبەرىلەدى.
2023 جىلى الەۋمەتتىك قورعاۋ سالاسىنداعى قىزمەتتەر تىزبەسى كەڭەيتىلەدى. 2024 جىلعى 1 قاڭتاردان باستاپ دەنساۋلىق ساقتاۋ جانە ءبىلىم بەرۋ سالالارىنداعى مەملەكەتتىك كەپىلدىكتەر ەنگىزىلەدى. 2025 جىلدان باستاپ جوعارىدا اتالعان ءۇش سالادا مەملەكەتتىك كەپىلدىكتەردىڭ بارلىق ءتۇرى قامتىلماق.
الاياقتىق تاۋەكەلىن بولدىرماۋ ماقساتىندا 1414 بىرىڭعاي بايلانىس ورتالىعىنان كەلىپ تۇسكەن SMS-كە جاۋاپ بەرۋ قاجەتتىگىن اتاپ وتەمىز.
