فوتو: پد-نەن الىندى
ايتا كەتسەك, بۇعان دەيىن قىزىلتۋ اۋىلىنىڭ تۇرعىنى, 1946 جىلى تۋعان مولدابەك يگەنباەۆ 5 قاڭتاردا ۇيىنەن بەلگىسىز باعىتقا شىعىپ كەتىپ, قايتا ورالماعانى تۋرالى حابارلانعان. ارىز پوليتسيا بولىمىنە 6 قاڭتاردا تىركەلىپ, قاريانىڭ جۇرگەن جەرىن انىقتاۋعا باعىتتالعان بارلىق قاجەتتى ىزدەستىرۋ شارالارى جۇرگىزىلدى. ىزدەۋگە پوليتسەيلەر مەن ەرىكتىلەر, اتتى اۋىل تۇرعىندارى اتسالىستى. ىزدەۋگە جۇمىلدىرىلعان ءتارتىپ ساقشىلارى ءاربىر ءۇي, دۇكەن, ادامدار كوپ شوعىرلاناتىن ايماقتاردا جوعالعان ەگدە جاستاعى قاريانىڭ سۋرەتىن كورسەتۋ ارقىلى سۇراستىرۋ جۇمىستارىن اتقاردى. سونىمەن قاتار قاراۋسىز قالعان عيماراتتار, وقيعا ورنىنا جاقىن اۋماقتاعى تاۋ-تاس, وي-قىر, ەگىستىك القاپتارى تۇگەل قارالىپ, ءجىتى تەكسەرىلدى.
حابارسىز كەتكەن تۇرعىندى امان-ەسەن تابۋ ماقساتىندا پوليتسەيلەرمەن بىرگە اۋىل تۇرعىندارى جانە ەرىكتىلەر دە ۇزدىكسىز, كۇنى-ءتۇنى ىزدەۋ جۇمىستارىن جۇرگىزدى. قولدانىلعان شارالارعا قاراماستان, وكىنىشكە قاراي, جوعالعان ەر ادامنىڭ ءمايىتى 8 قاڭتاردا ساعات 17:00 شاماسىندا «شۇرەن توبە» ەگىستىك القابىنان تابىلدى. ياعني, ەگىستىك القاپتا ساقشىلارمەن بىرگە جۇرگەن ەكى اۋىل تۇرعىنى ءبىرىنشى بولىپ ءمايىتتى بايقاعان. ەر ادامنىڭ دەنەسىن سىرتتاي قاراۋ بارىسىندا ەشقانداي زورلىق-زومبىلىق بەلگىلەرى انىقتالمادى. قازىرگى ۋاقىتتا سوت-مەديتسينالىق ساراپتاماسى تاعايىندالدى. تەرگەۋ امالدارى جۇرگىزىلىپ جاتىر.
