قۇتقارۋ قىزمەتى Darmen موبيلدىك باعدارلاماسى ارقىلى اۋا رايىنىڭ ناشارلاۋىنا بايلانىستى رەسپۋبليكالىق اۆتوجولداردىڭ ءۇش بولىگى جابىلعانى تۋرالى ەسكەرتۋ تاراتتى. ماسەلەن, سولتۇستىك قازاقستان وڭىرىندە قار جاۋىپ, بوران سوققاننان جولداردىڭ كورىنۋى 50 مەتردەن دە از قاشىقتىقتا بولعان.
«جەزقازعان – پەتروپاۆل» تاسجولىنىڭ اقمولا وبلىسىنىڭ شەكاراسىنان سەرگەەۆكا قالاسى, شال اقىن اۋدانىنا دەيىنگى بولىگى, «ەكاتەرينبۋرگ – الماتى» تاسجولىنىڭ توقسان بي اۋىلىنان اقمولا وبلىسىنىڭ شەكاراسىنا دەيىنگى اۋماعى جانە «كوكشەتاۋ – رۋزاەۆكا» جولى اقمولا وبلىسىنىڭ شەكاراسىنان رۋزاەۆكا اۋىلىنا دەيىن كولىكتىڭ بارلىق ءتۇرى ءۇشىن بارلىق باعىتقا جابىلدى.
كەشە بۇل وڭىردە اۋا رايىنا بايلانىستى ەسكەرتۋ جاريالانعان بولاتىن.
سونداي-اق قاردىڭ كوپ مولشەردە جاۋىنا بايلانىستى سەمەي قالاسىنىڭ كوشەلەرىن قار باستى. جەرگىلىكتى اتقارۋشى ورگانداردىڭ ءوتىنىشى بويىنشا 2023 جىلعى 8 قاڭتاردا ساعات 9.10-دا تجم 68303 اسكەري ءبولىمىنىڭ اسكەري قىزمەتشىلەرى الدىن الۋ جۇمىستارىن جۇرگىزۋ ءۇشىن قار شىعارۋعا كىرىستى. قازىرگى ۋاقىتتا 150 توننا قار شىعارىلدى. قالانىڭ ورتالىق كوشەلەرىنەن قار شىعارۋ جۇمىستارى جالعاستىرىلۋدا.
اباي وبلىسىندا قۇتقارۋشىلار ناۋقاس بالانى اۋىلدان اۋداندىق اۋرۋحاناعا تاسىمالداۋعا كومەكتەستى. 2023 جىلعى 6 قاڭتاردا كەشكە قاراي «112» پۋلتىنە جارما اۋدانى قىزىلاعاش اۋىلىنان ىستىعى كوتەرىلگەن ناۋقاس بالانى اياگوز قالاسىنىڭ اۋداندىق اۋرۋحاناسىنا شۇعىل تاسىمالداۋ تالاپ ەتىلەتىنى تۋرالى حابارلاما كەلدى, ويتكەنى اۋا رايىنىڭ قولايسىزدىعى مەن بورانعا بايلانىستى اۋىلعا جول بولمادى. شاقىرۋ ورنىنا اياگوز اۋدانىنىڭ №13 ءورت ءسوندىرۋ بولىمىنەن قۇتقارۋشىلار – جوعارى وتىمدىلىك تەحنيكاسى 2 نيۆا مارش, جەكە قۇرامنىڭ 4 ادامى جانە اياگوز قالاسىنىڭ اۋداندىق اۋرۋحاناسىنان 2 فەلدشەر شىقتى. وقيعا ورنىنا كەلگەننەن كەيىن بالاعا العاشقى مەديتسينالىق كومەك كورسەتىلدى. جۇمىس بارىسىندا قۇتقارۋشىلار دارىگەردىڭ, فەلدشەردىڭ جانە اكەسىنىڭ سۇيەمەلدەۋىمەن بالانى اياگوز قالاسىنىڭ ورتالىق اۋداندىق اۋرۋحاناسىنا تاسىمالداۋعا كومەكتەستى. قازىرگى ۋاقىتتا بالانىڭ جاعدايى قاناعاتتانارلىق.
ال اقتوبە وبلىسىنىڭ اۋماعىندا مۇزدىڭ ەرۋىنە بايلانىستى قاۋىپتى كەزەڭنىڭ (كۇندىز اۋا تەمپەراتۋراسى -2, تۇندە كەي جەرلەردە +1) باستالۋىنا بايلانىستى قولايسىز جاعداي ورىن الدى. 7 قاڭتار كۇنى ساعات 17.48-دا ويىل اۋدانى قايىڭدى اۋىلىنداعى ويىل وزەنىنە ۋاز ماركالى اۆتو كولىك مۇز استىنا ءتۇسىپ كەتتى, وقيعا ورنىنان جۇرگىزۋشى مەن 2 جولاۋشى شىعىپ ۇلگەردى, مەديتسينالىق كومەكتى قاجەت ەتپەدى. وقيعا قىسقى كەزەڭدە سۋ ايدىندارىندا قاۋىپسىزدىك ەرەجەلەرىن ساقتاماۋ سەبەبىنەن ورىن الدى.
سونىمەن قاتار جول قوزعالىسىنىڭ شەكتەلۋىنە بايلانىستى 7 قاڭتار كۇنى 22 ساعات 12 مينۋتتا ايتەكە بي اۋدانى سامارا – شىمكەنت تاس جولىنىڭ 968 شاقىرىمىندا ادامداردى ەۆاكۋاتسيالاۋ قاجەتتىلىگى تۋرالى اقپارات ءتۇستى. وقيعا ورنىنا اۋداندىق قۇتقارۋشىلار جىبەرىلدى. قۇتقارۋشىلاردىڭ كومەگىمەن ەكى جولاۋشىلار اۆتوبۋستارىنان بارلىعى 35 ادام (ونىڭ ەكەۋى بالا) قارابۇتاق اۋىلدىق مەشىتىنە ەۆاكۋاتسيالاندى. زارداپ شەككەندەر جوق.
تۇنگى ۋاقىتتا اۋا رايىنىڭ قولايسىزدىعىنان قوزعالىس قاۋىپسىزدىگىن ساقتاۋعا بايلانىستى اۆتوكولىكتەر بلوكبەكەتتەردە تۇردى.
2023 جىلعى 7 قاڭتار كۇنى 112 قۇتقارۋ قىزمەتىنە ساعات 18-03-تە اقتوبە وبلىسى ويىل اۋدانىنىڭ كوپتوعاي اۋىلدىق وكرۋگىندە مايدان شارۋا قوجالىعىنىڭ مالشىسى تاڭەرتەڭ مال باعۋعا شىعىپ, قايتىپ ورالماعانى جونىندە حابارلاما كەلىپ ءتۇستى. 1962 جىلى تۋعان ازامات 8 قاڭتار كۇنى ساعات 05.00-تە كوپتوعاي اۋىلدىق وكرۋگىنىڭ «مايدان» شارۋا قوجالىعى جارماوزەك قىستاعىنان 3 شاقىرىمداي جەردەن جەرگىلىكتى تۇرعىندار كومەگىمەن امان-ەسەن تابىلدى. مەديتسينالىق كومەكتى قاجەت ەتپەدى.
