پرەزيدەنت ءۇي جانۋارلارىنا قاتىگەزدىك كورسەتكەندەر ءۇشىن جازانى بارىنشا قاتاڭداتۋدى تاپسىردى.
ء«ۇي جانۋارلارىنىڭ ادامداردان قورلىق كورۋىنە جول بەرمەۋ كەرەك. ۇكىمەت ءۇي جانۋارلارىن دۇرىس كۇتىپ-باپتاماعاندارعا بەرىلەتىن اكىمشىلىك جاۋاپكەرشىلىكتى قاتاڭداتىپ, ال ولارعا قاتىگەزدىك كورسەتكەندەرگە كەسىلەتىن قىلمىستىق جازانى كۇشەيتۋى كەرەك. نەگىزى, قاڭعىباس يتتەر پروبلەماسىنا ازاماتتاردىڭ نەمقۇرايلىلىعى سەبەپ: ياعني ولار باستاپقىدا جانۋارلارعا ىقىلاسى اۋىپ اسىراعانىمەن, كەيىننەن كوڭىلدەرى قالىپ, كەرەكسىز زاتتاي كوشەگە تاستاپ كەتىپ جاتادى. مۇنداي كەلەڭسىزدىكتەردىڭ الدىن الۋ قاجەت», دەدى مەملەكەت باسشىسى.
پرەزيدەنت جانۋارلارعا قامقورلىق جاساۋ ىسىندە «حايپقا» جول بەرمەي, ناقتى ىسكە كوشۋ كەرەكتىگىن ايتتى.
جانۋارلاردى قورعاۋ جانە قوعام قاۋىپسىزدىگى: قاڭعىباس يتتەردىڭ شابۋىلىنا قالاي توسقاۋىل قويامىز؟
«سونداي-اق ەشقانداي «حايپقا» جول بەرمەي, مامانداندىرىلعان جانۋارلار ورتالىقتارىنىڭ قىزمەتىنە قوعامدىق باقىلاۋ قويعان ءجون. بۇل ىسكە سىزدەر دە ۇلەس قوساسىزدار دەپ ويلايمىن. جالپى, قاڭعىباس يتتەرگە قامقورلىقپەن قاراۋ قوعامنىڭ اراسىنا سىنا قاقپاۋعا ءتيىس. وڭىرلەردەن العان اقپاراتقا سايكەس, بالالار, ءتىپتى, ەرەسەكتەر جابايى يتتەردەن ءجيى زارداپ شەگۋدە. باستى ماسەلە – وسى. سوندىقتان بۇل پروبلەماعا مەملەكەت پەن جۇرتشىلىقتىڭ, ناقتى ايتقاندا, زاڭ شىعارۋ تۇرعىسىنان پارلامەنتتىڭ ارالاسپاسىنا بولمايدى. بىراق ءبىز قورعانسىز جانۋارلاردى جابىرلەگەن فاكتىلەرگە دە بەي-جاي قاراماۋىمىز كەرەك, اتاپ ايتقاندا, ءۇي جانۋارلارىن ازاپتاعانداردى قىلمىستىق جاۋاپكەرشىلىككە تارتقان دۇرىس. وسىنداي تاسىلدەر قورشاعان ورتاعا وزىق ءارى جاۋاپتى كوزقاراس قالىپتاستىرادى دەپ ويلايمىن. بۇل دا «تازا قازاقستان» اياسىندا اتقارىلۋعا ءتيىس ءىستىڭ ءبىرى», دەدى پرەزيدەنت.
