نۇرلان ماسىموۆكە اسا اۋىر سىبايلاس جەمقورلىق قىلمىسىن جاسادى دەگەن ايىپ تاعىلدى. بۇرىنعى پوليتسەيگە قاتىستى ءىس قارالىپ جاتقان باپتاردىڭ سانكتسيالارىندا مۇلكى تاركىلەنىپ, بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرۋ ارقىلى 7 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان.
«سوتتا ءماسىموۆتىڭ قورعاۋشىسى ءىستى قىسقارتۋ, ءىستى پروكۋرورعا قايتارۋ, كەپىل نەمەسە ۇيقاماققا الۋ بۇلتارتپاۋ شاراسىن وزگەرتۋ تۋرالى بىرنەشە ءوتىنىش ءبىلدىردى. وتىرىس قورىتىندىسى بويىنشا سۋديا قىلمىستىق ءىستى پروكۋراتۋراعا قايتارۋ تۋرالى شەشىم قابىلدادى», دەدى دميتري كۋرياچەنكو.
ايتا كەتەيىك, پاۆلودار وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى نۇرلان ءماسىموۆ پەن ونىڭ ورىنباسارى دامير ءسيرازيديموۆتىڭ ءىسىن پروكۋراتۋراعا قايتارعانىن راستادى.
كۋرياچەنكونىڭ ايتۋىنشا, سوت ماسىموۆكە قاتىستى بۇلتارتپاۋ شاراسىن وزگەرتۋ تۋرالى ءوتىنىشتى قاناعاتتاندىرماي, ونى قاماۋدا قالدىردى.
ەسكە سالايىق, 2022 جىلدىڭ قاڭتارىندا نۇرلان ءماسىموۆ پاۆلودار وبلىسىنىڭ پوليتسيا باستىعى قىزمەتىنەن بوساتىلدى.
وتكەن جىلدىڭ ءساۋىر ايىندا نۇرلان ءماسىموۆتىڭ ىزدەۋدە جۇرگەنى بەلگىلى بولدى. كەيىن سىبايلاس جەمقورلىققا قارسى قىزمەت ونىڭ جۇرگەن جەرى تۋرالى اقپارات بەرگەندەرگە سىياقى جاريالادى. شىلدە ايىندا ءماسىموۆ رەسەيمەن شەكارادا جالعان قۇجاتتارمەن ۇستالدى.
