«بيزنەستىڭ قىلمىستىق پروتسەسكە قاتىسىن ازايتۋ ءۇشىن اگەنتتىك جۇيەلى جۇمىستار جۇرگىزىپ جاتىر. سوڭعى ءتورت جىلدا تىركەلگەن ىستەر سانى ەكى ەسە كەمىگەن», دەدى جانات ەليمانوۆ.
ونىڭ ايتۋىنشا, جالعان شوت-فاكتۋرالار جازىپ بەرۋ ارقىلى سالىق تولەۋدەن جالتارۋعا كومەكتەسىپ, قارجىنى قولما-قول اقشاعا اينالدىراتىن مىڭنان استام فيرمانىڭ قىزمەتى توقتاتىلدى.
سونداي-اق 110 زاڭسىز ويىنحانا مەن الكوگول ءونىمىن شىعاراتىن 44 جاسىرىن تسەح جويىلدى.
«بىلتىر قارجى الاياقتارىنىڭ قىزمەتىن جارنامالايتىن 13 مىڭ ۆەب-پاراقشا مەن اككاۋنت بۇعاتتالدى. 29 قارجى پيراميداسىنىڭ جولى كەسىلىپ, زارداپ شەككەن ازاماتتاردىڭ 8,3 ميلليارد تەڭگە كولەمىندە شىعىنى وتەلدى. جالپى, قابىلدانعان شارالاردىڭ ناتيجەسىندە قۇنى 300 ميلليارد تەڭگەدەن اساتىن اكتيۆتەر قايتارىلدى», دەدى قارجىلىق مونيتورينگ اگەنتتىگىنىڭ توراعاسى.
سونىمەن قاتار پرەزيدەنتكە اگەنتتىك ۇيلەستىرۋىمەن قارجىنى جىلىستاتۋعا قارسى ۇلتتىق جۇيەگە رەفورما جۇرگىزىلگەنى جونىندە باياندالدى. بۇل قولدانىستاعى زاڭنامانى حالىقارالىق فاتف (FATF) cتاندارتتارىمەن بارىنشا سايكەستەندىرۋگە مۇمكىندىك بەردى.
كەزدەسۋ سوڭىندا مەملەكەت باسشىسى قارجى پيراميدالارىنىڭ قىزمەتى مەن الاياقتاردىڭ قيتۇرقى ارەكەتتەرىنىڭ جولىن كەسۋ جۇمىستارىن جالعاستىرۋدى, سونداي-اق ادال بيزنەستى قورعاۋعا, قارجىلىق جانە ەكونوميكالىق قىلمىستارعا قارسى كۇرەس شارالارىن كۇشەيتۋدى تاپسىردى.
