كوللاجدى جاساعان قونىسباي شەجىمباي, «EQ»
ەكى ايعا سوزىلعان ستارتاپ-ينكۋباتور قازاقستاننىڭ 10 قالاسىندا – اقتوبە, اقتاۋ, قوستاناي, ورال, پاۆلودار, تاراز, قىزىلوردا, پەتروپاۆل, تالدىقورعان, سەمەيدە ءوتتى.
Startup Orda-عا قاتىسۋ ءۇشىن ەل بويىنشا بارلىعى 7 مىڭنان استام ءوتىنىم ءتۇستى. وقۋ باعدارلاماسى كەزەڭىندە 285 ءىس-شارا ۇيىمداستىرىلىپ, وعان وڭىرلەر بويىنشا IT سالاسىن دامىتۋعا مۇددەلى 10 مىڭعا جۋىق ادام قاتىستى.
باعدارلامانى قورىتىندىلاعان Demo Day اياسىندا قالالاردا جوبالار جارمەڭكەسى ءوتىپ, قاتىسۋشى كوماندالار قازىلار القاسى الدىندا قىسقاشا «پيتچ» فورماتىندا ءوز يدەيالارىن تانىستىرعان بولاتىن. جوبانىڭ سوڭعى مارەسىنە 200 كوماندا شىعىپ, ءوز IT-يدەيالارىن ۇسىندى. سونىڭ ىشىندە قازاقستاندىق نارىق كونتەكستىندەگى يدەيانىڭ جاڭالىعىن, بولاشاقتا جوبانىڭ ناتيجەلىلىگىن, يدەيانىڭ يمپاكتىسىن, ياعني ءونىمنىڭ پروبلەماعا وڭ اسەرىن, ءونىمنىڭ اۋقىمدىلىعىن, ءارى يننوۆاتسيالىلىعىن ۇسىنعان 100 جوبا ۇزدىك اتاندى. اقشالاي سىيلىقپەن قاتار جەڭىمپازدار ەلوردالىق تەحنوپاركتىڭ ءبىلىم بەرۋ باعدارلامالارىنا قول جەتكىزىپ, ستارتاپتار مەن يننوۆاتسيالار سالاسىندا ءوز دامۋىن جالعاستىرۋعا مۇمكىندىك الدى.
ەڭ مىقتىلارىن انىقتاۋ ءۇشىن قۇزىرەتتى كوميسسيانىڭ قۇرامىنا جەرگىلىكتى اتقارۋشى بيلىك ورگاندارىنىڭ وكىلدەرى, كاسىپكەرلەر, سونداي-اق Astana Hub ساراپشىلارى شاقىرىلدى.
جوبالار اراسىندا اقتاۋدان QarapaiymEmdeu ستارتاپىن اتاپ وتۋگە بولادى. ونىڭ تولىق گۋمانويدتى روبوت-تەراپەۆتى SenimPlus – تەراپەۆت اعىنىن جەڭىلدەتۋ جانە ناۋقاستاردى انىقتاۋ ماقساتىندا جاسالعان جاساندى ينتەللەكت پەن مەحانيكانىڭ جيىنتىعى. تەمپەراتۋرا, يمپۋلس, قاننىڭ وتتەگىمەن قانىقتىلىعى, كوزدىڭ شارشاۋىن تالداۋ ارقىلى, سونداي-اق پاتسيەنتتىڭ اۋىزشا كورسەتكىشتەرى ارقىلى روبوت بولجامدى دياگنوزدى, ەمدەۋدى جانە كەيىننەن مەديتسينالىق انىقتامالاردى انىقتاي وتىرىپ, دياگنوستيكا مەن تالداۋ جاساي الاتىنى دا بار.
قاۋىپسىزدىك تاقىرىبىن تارازدىق ستارتاپ – Qauipsiz قوزعاعان بولاتىن. بۇل – ۇيالى تەلەفونعا سيگنال بەرەتىن جوعارى جيىلىكتى انتەننانى پايدالانا وتىرىپ, گاز بۋى نەمەسە ءورت كەزىندە قوڭىراۋمەن دەرەۋ ەسكەرتەتىن شاعىن سەنسور-قۇرىلعى. سونداي-اق ستارتاپ قۇرىلتايشىلارى جۇمىس بارىسىندا توتەنشە جاعدايلار مينيسترلىگى, توتەنشە جاعدايلار دەپارتامەنتى ۇيىمدارىن, مەملەكەتتىك نىسانداردى, قوناقۇيلەردى, قۇرىلىس كومپانيالارى مەن تۇرعىن ۇيلەردى نەگىزگى تاپسىرىس بەرۋشىلەر رەتىندە كورەتىنى ءسوزسىز.
تالدىقورعاندىق بەلسەندىلەر See The Future جوباسىمەن كوزى ناشار كورەتىن جاندارعا كومەك كورسەتە باستادى. جاس جىگىتتەردىڭ دايىن ءونىمى ەكوجۇيەلىك قۇرىلعى, ياعني نەيروندىق جەلى, Lidar (Real Sense) سەنسورى بار كامەرا جانە قۇلاققاپتار مەن ءموبيلدى قوسىمشادان تۇرادى. قۇرىلعىنى پايدالانۋشى بەلگىسىز ورتادا شارلاۋ مۇمكىندىگىنە يە بولىپ, بۇل ءوزارا كۇندەلىكتى شەكتەۋگە تولى ومىردە قولايسىزدىقتى جوياتىنى ءسوزسىز.
قىزىقتى ستارتاپتار ءتىزىمىن Jolga ءموبيلدى قوسىمشاسى جالعاستىرادى. بۇل يننوۆتسيالىق شەشىم AR تەحنولوگياسىنا, 360 گرادۋستىق فوتوسۋرەتتەرگە, سونىمەن قاتار قازاقستاننىڭ تۋريستىك ايماقتارىن وڭاي زەرتتەۋگە ارنالعان تابيعي ورىندار تۋرالى تولىق اقپاراتتى بەرە الاتىن 3D كارتالارىنا نەگىزدەلگەن. سونىمەن قاتار اقپارات جەتكىلىكسىز بولىپ كورىنسە, جەرگىلىكتى گيدپەن وڭاي بايلانىسىپ, بەلگىلى ءبىر لوكاتسيانىڭ ورنالاسقان جەرى تۋرالى ەگجەي-تەگجەيلى مالىمەتتەردى بىلۋگە مۇمكىندىك بار. ايماقتىڭ تولىق بەينەسىن قالىپتاستىرا وتىرىپ, ءموبيلدى قوسىمشا بارۋدى جوسپارلاپ وتىرعان جەردىڭ سيپاتى مەن جاعدايىن سەزدىرەدى. بۇل جوبا قازاقستانداعى ءتۋريزمدى دامىتۋعا جانە ىلگەرىلەتۋگە باعىتتالعان.
«بىرنەشە جىلدان كەيىن كوپتەگەن قىزمەت سالالارى, سونداي-اق تۋريزم IT تەحنولوگياسىز ءومىر سۇرە المايدى. ءبىز پايدالانۋعا وڭاي ءموبيلدى قوسىمشانى ۇسىنامىز, سونداي-اق ونلاين تاجىريبەنى بارلىعىنا قولجەتىمدى ەتەمىز», دەدى Jolga ءموبيلدى قوسىمشاسىن ۇسىنعان پاۆلودارلىق اسىلحان سارسەنباەۆ پەن احمەتجان قاۋمۇحامەد.
جالپى, ەكى ايلىق وقىتۋ بارىسىندا باعدارلاماعا قاتىسۋشىلار بيزنەس-يدەيانى قالىپتاستىرۋ, نارىقتى تالداۋ, ماقساتتى اۋديتوريانى زەرتتەۋ, بيزنەس-مودەل قۇرۋ جانە يدەيانى مونەتيزاتسيالاۋ ءتاسىلىن تاڭداۋ بويىنشا قاجەتتى ءبىلىم مەن داعدىلارعا يە بولدى. سونداي-اق ءوز جوبالارىنىڭ تۇساۋكەسەرلەرى مەن پيتچينگتەرىن دايىنداپ, ماركەتينگ, زياتكەرلىك مەنشىكتى قورعاۋ جانە ستارتاپتاردى مەملەكەتتىك قولداۋ شارالارى بويىنشا قوسىمشا كەڭەستەر دە تۇيگەن بولاتىن.
جوعارىدا ايتىلعان وڭىرلەردە باعدارلاماعا قاتىسۋعا تىركەلۋ تەگىن ەكەنى, ءارى ناتيجەسىندە IT سالاسىندا ستارتاپ-جوباسىن باستاعان بارلىق مۇددەلى تۇلعا ينۆەستورلارعا يدەيالارىن نەمەسە دايىن ءونىمىن ۇسىنا الاتىنى الدىن-الا ايتىلعان بولاتىن.
ەسكە سالا كەتەيىك, Startup Orda – جاھاندىق ترەندتەر نەگىزىندە قۇرىلىپ, الەمدەگى IT-تەحنولوگيالاردى دامىتۋدىڭ ماڭىزدىلىعىن ەسكەرە وتىرىپ ۇيىمداستىرىلعان باعدارلاما.
