مەملەكەت باسشىسىنىڭ تاپسىرماسىنا سايكەس تەڭىز پورتتارىن «اقتاۋ تەڭىز پورتى» اەا قۇرامىنا ەنگىزۋ ماسەلەسى پىسىقتالىپ, بۇل ءوز كەزەگىندە الەۋەتتى ينۆەستورلار ءۇشىن پورت ينفراقۇرىلىمىن دامىتۋ جونىندەگى جوبالاردىڭ تارتىمدىلىعىن ارتتىرۋعا مۇمكىندىك بەرەدى. زاڭنامالىق جۇمىستار اياسىندا سۋعا باتقان كەمەلەردى جويۋ ماسەلەلەرىنە قاتىستى حالىقارالىق شارتتاردىڭ نورمالارىن يمپلەمەنتاتسيالاۋ (حالىقارالىق مىندەتتەمەلەردى مەملەكەتتىڭ ىشىندە ىسكە اسىرۋ, سونداي-اق حالىقارالىق-قۇقىقتىق نورمالاردى ۇلتتىق قۇقىقتىق جۇيەگە ەنگىزۋدىڭ ناقتى ءتاسىلى) بويىنشا دا جۇمىستار جۇرگىزىلىپ جاتىر.
2022 جىلداعى 11 ايدىڭ قورىتىندىسى بويىنشا بىلتىرعى ۇقساس كەزەڭمەن سالىستىرعاندا تەڭىز پورتتارى ارقىلى جۇكتەردى اۋىستىرىپ تيەۋ كولەمى 19%-عا وسكەن. ونىڭ ىشىندە كونتەينەرلىك تاسىمالدار 24%-عا ۇلعايدى. سونداي-اق تەمىرجول كولىگى بويىنشا جۇكتەردى تاسىمالداۋ جانە جۇك اينالىمى 6%-عا ارتقان.
بۇل رەتتە 2022 جىلى تەمىرجول كولىگى سالاسىنداعى ءىرى جوبالاردىڭ ءبىرى «دوستىق – مويىنتى» ۋچاسكەسىنىڭ ەكىنشى جولىنىڭ قۇرىلىسى باستالعانىن ايتا كەتكەن ورىندى.
سونىمەن قوسا ترانزيتتىك ۋچاسكەلەردەگى «تار شەڭبەرلى» جەرلەردى جويىپ, تاسىمالداۋ كولەمىن ۇلعايتۋ ءۇشىن «داربازا – ماقتاارال» جوباسى بويىنشا تەحنيكالىق-ەكونوميكالىق نەگىزدەمەنى ازىرلەۋ مەن «باقتى – اياگوز» تەمىرجول ۋچاسكەسىنىڭ قۇرىلىسى بويىنشا جۇمىستار جۇرگىزىلىپ كەلەدى.
2023 جىلعا ارنالعان جوسپارلار تۋرالى توقتالساق, جەڭىلدەتىلگەن ليزينگ باعدارلاماسى اياسىندا جولاۋشىلار ۆاگوندارىن ساتىپ الۋ مەن ەلىمىزدەگى اۆتوبۋس پاركىن جاڭارتۋ مەجەلەنىپ وتىرعانىن اتاپ وتكەن ءجون. تەڭىز كولىگى سالاسىنا كەلسەك, بۇل باعىتتا رەسەي ەلىمەن تەڭىزشىلەردىڭ كاسىبي ديپلومدارىن ءوزارا مويىنداۋ تۋرالى كەلىسىم جاساۋ جونىندە جۇمىستى جالعاستىرۋ كوزدەلگەن.
كولىكتى تسيفرلاندىرۋ سالاسىندا «كولىك قۇجاتتارىن باسقارۋدىڭ بىرىڭعاي جۇيەسىن» پايدالانۋعا بەرۋ جوسپارلانىپ وتىر. بۇل جۇيە تاۋار-كولىك جۇكقۇجاتتارى مەن جول پاراقتارىن ەلەكتروندى فورماتقا اۋىستىرۋعا سەپتىگىن تيگىزەدى.
