«قۇرمەتتى قازاقستاندىقتار! وتكەن 2022 جىل ءبىزدىڭ ەلىمىز ءۇشىن وڭاي بولعان جوق, بىراق سوعان قاراماستان مەملەكەتتىڭ بارلىق الەۋمەتتىك مىندەتتەمەلەرى ورىندالدى. 4,4 ترلن تەڭگەدەن استام سوماعا 4,3 ملن-نان استام قازاقستاندىققا زەينەتاقى, جاردەماقىلار جانە باسقا دا الەۋمەتتىك تولەمدەر ۋاقىتىلى تولەندى.
وتكەن جىلى 1,3 ميلليوننان استام وتباسى مەملەكەت كەپىلدىك بەرگەن تولەمدەر تۇرىندە قولداۋ الدى. ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارعا جانە كوپبالالى وتباسىلارعا دا ەرەكشە كوڭىل ءبولىندى», دەدى مينيستر.
ونىڭ ايتۋىنشا, وسى جىلى بالالارى بار وتباسىلاردى قولداۋعا رەسپۋبليكالىق بيۋدجەتتەن جانە مەملەكەتتىك الەۋمەتتىك ساقتاندىرۋ قورىنان 926,6 ملرد تەڭگەدەن استام قاراجات ءبولىندى. بولىنگەن قاراجات بالا تۋ جانە بالا كۇتىمى بويىنشا تولەمدەر, كوپبالالى انالارعا, كوپبالالى وتباسىلارعا جانە مۇگەدەكتىگى بار بالالاردى تاربيەلەپ وتىرعان وتباسىلارعا جاردەماقى رەتىندە بەرىلدى. ءبىر وتباسىعا تولەنەتىن تولەم 20 مىڭنان 805 مىڭ تەڭگەگە دەيىنگى سومانى قۇرادى.
ومىرلىك قيىن جاعدايعا تاپ بولعان 700 مىڭنان استام قازاقستاندىق وتباسى مەملەكەتتەن 70 ملرد تەڭگەدەن استام سوماعا اتاۋلى الەۋمەتتىك كومەك تۇرىندە قولداۋ الدى.
«مۇمكىندىگى شەكتەۋلى جاندار دا اركەز مەملەكەتتىڭ ەرەكشە نازارىندا. ولاردىڭ قۇقىقتارى مەن زاڭدى مۇددەلەرىن قامتاماسىز ەتۋ ءۇشىن ەلدە كوپ دەڭگەيلى الەۋمەتتىك قورعاۋ جۇيەسى جۇمىس ىستەيدى. بۇگىندە ولار بىرنەشە كوزدەردەن تولەمدەر الادى: بۇل مۇگەدەكتىك بويىنشا جاردەماقى جانە جۇمىس ىستەيتىن ازاماتتارعا ەڭبەككە قابىلەتتىلىگىنەن ايىرىلعان كەزدە بەرىلەتىن تولەمدەر, سونداي-اق ساقتاندىرۋ تولەمدەرى. 530 مىڭ وتانداسىمىزعا مۇگەدەكتىك بويىنشا جاردەماقى جانە الەۋمەتتىك تولەمدەر تۇرىندە 371,4 ملرد تەڭگە تولەندى», دەدى ول.
سونداي-اق ول بيىل 66 ملرد تەڭگە مۇگەدەكتىگى بار ازامماتتىڭ ءومىر ءسۇرۋ ساپاسىن جاقسارتۋعا باعىتتالعانىن ايتتى. 225 مىڭ ادام پروتەزدىك-ورتوپەديالىق جانە وزگە دە كومەكپەن قامتاماسىز ەتىلگەن.
«بۇگىنگى تاڭدا مۇگەدەكتىگى بار ادامدار تەك ءونىم بەرۋشىنى عانا ەمەس, سونىمەن قاتار وزدەرىنىڭ جەكە قاجەتتىلىكتەرىن ەسكەرە وتىرىپ, تەحنيكالىق قۇرالدار مەن وڭالتۋ قىزمەتتەرىن دە ءوز بەتىنشە تاڭداي الادى. وسى جىلدان باستاپ مەديتسينالىق-الەۋمەتتىك ساراپتاما جۇرگىزۋدىڭ سىرتتاي فورماتى ىسكە قوسىلدى, ول كۋالاندىرۋ ءراسىمىن الدەقايدا وڭتايلاندىردى جانە جەڭىلدەتتى.
كەلەسى جىلى ءبىز ارناۋلى الەۋمەتتىك قىزمەتتەر سالاسىن جاڭعىرتۋدى جالعاستىرۋدى جوسپارلاپ وتىرمىز, ول ەڭ الدىمەن وعان مۇقتاج ءاربىر قازاقستاندىق ءۇشىن قولجەتىمدىلىكتى قامتاماسىز ەتۋگە باعىتتالادى.
مەملەكەتتىك قولداۋ شارالارىنىڭ قولجەتىمدىلىگى, ازاماتتاردىڭ ولاردى الۋ قۇقىعىن ۋاقىتىلى ىسكە اسىرۋ مينيسترلىكتىڭ نەگىزگى مىندەتتەرىنىڭ ءبىرى. وتكەن جىلدىڭ ماڭىزدى نوۆەللالارىنىڭ ءبىرى پرەزيدەنتتىڭ تاپسىرماسى بويىنشا دايىندالعان «وتباسىنىڭ تسيفرلىق كارتاسى» جوباسى بولدى. بۇل وتباسى مەن بەلگىلى ءبىر ازامات ءۇشىن قيىن ومىرلىك جاعدايدىڭ تۋىنداۋ قاۋپىن ۋاقىتىلى انىقتاۋعا جانە وعان وسى جاعدايدا مەملەكەت كەپىلدىك بەرگەن قولداۋ شارالارىن ۇسىنۋ عانا ەمەس, سونىمەن بىرگە كورسەتىلگەن شارالاردىڭ تيىمدىلىگىن باعالاۋعا مۇمكىندىك بەرەدى.
وسى جىلى الەۋمەتتىك-ەڭبەك سالاسىنىڭ 1 ملن-نان استام قىزمەتى پرواكتيۆتى فورماتتا كورسەتىلدى, ونىڭ ىشىندە پيلوتتىق ىسكە اسىرۋدىڭ 4 ايدان از ۋاقىتىندا تسيفرلىق كارتا ارقىلى 9 قىزمەت بويىنشا 50 مىڭنان استام قىزمەت كورسەتىلگەنىن اتاپ وتكىم كەلەدى. ازاماتتاردىڭ ءال-اۋقاتىن ارتتىرۋ فاكتورلارىنىڭ ءبىرى ولاردىڭ تابىسىنىڭ ءوسۋى ەكەنى ءسوزسىز», دەدى ت.دۇيسەنوۆا.
بيىل ىنتىماقتى زەينەتاقى مولشەرى ەكى رەت يندەكستەلدى. بۇگىنگى كۇنى زەينەتاقىنىڭ ورتاشا مولشەرى شامامەن 109 مىڭ تەڭگەنى قۇرايدى. جالپى مەملەكەتتىك بيۋدجەتتەن 2,2 ملن زەينەتكەرگە زەينەتاقى تولەۋگە 2,9 ترلن تەڭگە ءبولىندى.
كەلەسى جىلدان باستاپ مەملەكەت باسشىسىنىڭ تاپسىرماسى بويىنشا زەينەتاقى تولەمدەرىن جانە ازاماتتاردىڭ زەينەتاقى جيناقتارىنىڭ كىرىستىلىگىن ارتتىرۋعا باعىتتالعان زەينەتاقى جۇيەسىنىڭ تيىمدىلىگىن ارتتىرۋ جونىندەگى جاڭا شارالار پاكەتىن ىسكە اسىرۋعا كىرىسەمىز.
ء«وتىپ بارا جاتقان جىلى ءبىلىم بەرۋ, دەنساۋلىق ساقتاۋ, الەۋمەتتىك قورعاۋ سالاسىنىڭ جانە باسقا دا جەكەلەگەن ساناتتاردىڭ قىزمەتكەرلەرىنىڭ جالاقىسىن كەزەڭ-كەزەڭىمەن ارتتىرۋ جالعاستى. 1,2 ملن-عا جۋىق ازاماتتىق قىزمەتشىلەردىڭ جالاقىسى ورتا ەسەپپەن 20%-دان 30%-عا ءوستى جانە كەلەسى 4 جىل ىشىندە 2 ەسەگە ۇلعايادى.
مەملەكەت باسشىسىنىڭ تاپسىرمالارىن ىسكە اسىرۋ ءۇشىن جاستاردى جۇمىسپەن قامتۋ شارالارى كۇشەيتىلدى. ولاردىڭ «جاستار پراكتيكاسى» جانە «العاشقى جۇمىس ورنى» جوبالارىنا قاتىسۋ مەرزىمى ۇزاردى. حالىقتىڭ الەۋمەتتىك وسال ساناتتارىنداعى جاستار مەن ازاماتتاردىڭ ىسكەرلىك باستامالارىن دامىتۋ ءۇشىن گرانتتاردىڭ مولشەرى ەكى ەسە ۇلعايدى.
جالپى 2022 جىلى 921 مىڭنان استام ادام جۇمىسپەن قامتىلدى, ولاردىڭ 77% - دان استامى تۇراقتى جۇمىس ورىندارىندا ىستەپ جاتىر, ياعني ولار جانە ولاردىڭ وتباسىلارى تۇراقتى تابىسپەن قامتاماسىز ەتىلدى.
جۇمىسقا ورنالاسۋعا جاردەمدەسۋدىڭ ماڭىزدى قۇرالى – ەلەكتروندىق ەڭبەك بيرجاسى. بۇگىندە ەلەكتروندىق ەڭبەك بيرجاسى جۇمىس ىزدەۋدىڭ ەڭ ءىرى بازاسىنا عانا ەمەس, سونىمەن قاتار جۇمىسپەن قامتۋ قىزمەتتەرىنىڭ «ونلاين-ۆيتريناسىنا» اينالدى دەپ سەنىممەن ايتامىن, ول بوس جۇمىس ورىندارى تۋرالى اقپاراتتىڭ قولجەتىمدىلىگىن عانا ەمەس, سونىمەن قاتار جۇمىسقا ورنالاسۋ پروتسەسىنىڭ اشىقتىعىن دا قامتاماسىز ەتەدى.
ارينە, بۇل ءىستى جۇمىس بەرۋشىلەردىڭ قاتىسۋىنسىز جانە قولداۋىنسىز تولىق قامتاماسىز ەتە الماس ەدىك. پرەزيدەنتتىڭ تاپسىرماسى بويىنشا ءبىز دايىنداعان كاسىبي بىلىكتىلىك تۋرالى زاڭ, كوشى-قون ساياساتىنىڭ جاڭا تۇجىرىمداماسى مەن الەۋمەتتىك كودەكس سياقتى باعدارلامالىق قۇجاتتاردىڭ نەگىزگى ەرەجەلەرى جاڭا الەۋمەتتىك كەلىسىمشارتقا نەگىزدەلەدى, مەملەكەت پەن ازاماتتاردان باسقا, قوعامدىق بىرلەستىكتەر مەن بيزنەس ونىڭ نەگىزگى تاراپتارى بولۋعا ءتيىس.
وسىعان بايلانىستى, وتاندىق جۇمىس بەرۋشىلەرگە, ۇكىمەتتىك ەمەس ۇيىمدارعا, قوعامدىق بىرلەستىكتەر مەن كاسىپوداق وكىلدەرىنە العىس ءبىلدىرىپ, ودان ءارى ءوزارا جەمىستى ىنتىماقتاستىققا ءۇمىت بىلدىرگىم كەلەدى.
زاماناۋي جاڭا سىن-قاتەرلەر ءبىزدىڭ الدىمىزعا جاڭا مىندەتتەر قويىپ وتىر, الداعى جىلى ازاماتتارىمىزدىڭ ءال-اۋقاتىن ارتتىرۋدى قامتاماسىز ەتۋ ءۇشىن ءبىراز جۇمىستار اتقارۋىمىز كەرەك, وعان تەك بىرلەسىپ قانا قول جەتكىزە الامىز.
قۇرمەتتى قازاقستاندىقتار! سىزدەردى كەلە جاتقان 2023 جىلمەن شىن جۇرەكتەن قۇتتىقتايمىن!
جاڭا جىل – ارقايسىمىز ءۇشىن ەرەكشە مەرەكە. ءبىز جاڭا جىلدان ومىرىمىزدەگى جاقسى وزگەرىستەرگە, ەلىمىزدىڭ سەنىمدى دامۋىنا ءۇمىت ارتامىز.
وسى جىلى وتانىمىزدىڭ يگىلىگى ءۇشىن جاۋاپكەرشىلىكپەن ەڭبەك ەتكەن ازاماتتارعا زور العىس ايتقىم كەلەدى. جاڭا 2023 جىلى حالىقتىڭ ءومىر ءسۇرۋ ساپاسىنىڭ ارتۋىن, وتباسى مەن رۋحاني قۇندىلىقتاردىڭ نىعايۋىن شىن جۇرەكتەن تىلەيمىن! كەلەر جىلى ءبىزدىڭ ەلىمىز ءۇشىن جاقسىلىق پەن جاسامپازدىققا تولى جىل بولسىن.
بارلىق قازاقستاندىقتارعا زور دەنساۋلىق, ءار وتباسىعا قۇت-بەرەكە, باقىت پەن شاتتىق, قۋانىش پەن ءوزارا تۇسىنىستىك تىلەيمىن!», دەلىنگەن تامارا دۇيسەنوۆانىڭ قۇتتىقتاۋىندا.
