كومپانيانىڭ ىشكى پورتالىندا جاريالانعان حابارلاماعا سايكەس, اركادي ۆولوج قىزمەتكەرلەرمەن قوشتاسۋ حاتىن جازعان. وندا ول «ياندەكستى» قايتا قۇرىلىمداۋ جوسپارىن ابدەن ورىندى جانە قاجەت دەپ اتاپ ءوتتى.
«وزدەرىڭىز بىلەسىزدەر, مەن رەسەيلىك «ياندەكستى» كوپتەن بەرى باسقارىپ كەلەمىن. بيىل كومپانياداعى بارلىق لاۋازىمنان تولىعىمەن كەتۋگە تۋرا كەلدى. «ياندەكس» – ءومىرىمنىڭ جوباسى. ەلدەگى ەڭ جاقسى تەحنولوگيا كومپانياسىن سالعان جانە سالىپ جاتقانداردىڭ بارىنە راقمەت. جاڭا جىل بارشاعا بەيبىتشىلىك اكەلسىن», دەپ جازدى اركادي ۆولوج.
ا.ۆولوج «ياندەكستىڭ» ديرەكتورلار كەڭەسى مەن باسشىلىعى ازىرلەپ جاتقان كومپانيانى قايتا قۇرىلىمداۋ جوسپارى ورىندى جانە قاجەتتى دەپ ەسەپتەيتىنىن قوستى. سونداي-اق كورپوراتسيانىڭ تەڭ قۇرىلتايشىسى ءالى دە كومپانيانىڭ ءتورت حالىقارالىق ستارتاپىن دامىتۋعا كومەكتەسۋگە مۇددەلى ەكەنىن اتاپ ءوتتى.
اركادي ۆولوج 1964 جىلى اتىراۋدا دۇنيەگە كەلگەن. ول الماتىداعى رەسپۋبليكالىق فيزيكا-ماتەماتيكا مەكتەبىن بىتىرگەن.
