جوسپارلى شارا بولعانىمەن, اياق استى وسى ىسپەتتى شىنايى وقيعا ورىن الماسىنا كىم كەپىل؟! سوندىقتان دا توتەنشە جاعدايلار قىزمەتكەرلەرى قاشان دا كومەك قولىن سوزۋعا دايىن جۇرۋگە ءتيىس.
الدىن الا جازىلعان ستسەناري بويىنشا سنوۋبورد تەۋىپ جۇرگەن قوس تۋريست تەحنيكالىق اقاۋعا بايلانىستى بيىكتىكتەگى ارقان جولىندا تۇرىپ قالعان. قۇتقارۋشىلارعا قوڭىراۋ تۇسە سالا وقيعا ورنىنا اسىققان. جەتكەن سوڭ الپينيستىك جابدىقتاردىڭ كومەگىمەن اسپالى جولدا تۇرىپ قالعان دەمالۋشىلاردى ءتۇسىرىپ الىپ, جىلى بولمەگە جەتكىزگەن. البەتتە, سوناۋ بيىكتەن ەكى ازاماتتى ءتۇسىرىپ الۋ وڭايعا سوققان جوق.
سونىمەن قاتار تجد قىزمەتكەرلەرى دەمالۋشىلارعا قىس مەزگىلىندەگى قاۋىپسىزدىك ەرەجەلەرىن ۇيرەتتى. اسىرەسە قار كوشكىنىنە تاپ بولماۋ امالدارى مەن ءۇسىپ قالماۋدىڭ العى شارتتارىن ءتۇسىندىردى. اسىرەسە شىعىستىڭ قىسىندا قاۋىپسىزدىك ەرەجەلەرىن ساقتاماسقا بولمايدى. ونىڭ ۇستىنە كۇردەلى مارشرۋتتارمەن تاۋ كەزىپ, تابيعات تاماشالاپ جۇرەتىن تۋريستەر كوپ. بىلتىرلارى ءبىر توپ دەمالۋشىلاردى كوشكىن باسىپ قالعانى ەسىمىزدە.
جالپى, شىعىستا ادام ومىرىنە قاۋىپ توندىرەتىندەي 325 قار كوشكىنى وشاقتارى انىقتالعان. ارينە, ازاماتتاردىڭ قاۋىپسىزدىگى ءۇشىن, اۆتوجولداردى قار الىپ قالماۋى ءۇشىن تجد قۇتقارۋشىلارى مەن «قازسەلدەنقورعاۋ» شق فيليالىنىڭ ماماندارى بىرقاتار ۋچاسكەلەردە كوشكىندى ارنايى تۇسىرەدى. قىسقى ماۋسىم باستالعالى 16 رەت جاساندى قار كوشكىنىن ءتۇسىرۋ جۇمىستارى جۇرگىزىلگەن.
شىعىس قازاقستان وبلىسى
