World Cafe ينتەراكتيۆتى فورماتىندا وتكەن ديالوگ الاڭىنا پارلامەنت, ۇكىمەتتىك ەمەس سەكتور, سونداي-اق سىرتقى ىستەر, دەنساۋلىق ساقتاۋ, ەڭبەك جانە الەۋمەتتىك قورعاۋ, ادىلەت, ۇلتتىق ەكونوميكا, ەكولوگيا, گەولوگيا جانە تابيعي رەسۋرستار مينيسترلىكتەرى سياقتى مەملەكەتتىك ورگانداردىڭ وكىلدەرى قاتىستى.
سەنات دەپۋتاتى, الماتى قالاسى مۇگەدەكتەر ۇيىمدارى قاۋىمداستىعىنىڭ توراعاسى ءلاززات قالتاەۆا قاتىسۋشىلاردى قۇتتىقتاپ, قازاقستاندا ازاماتتىق قوعام مەن مەملەكەت ديالوگىنىڭ دامۋى گەوساياسي, ەكونوميكالىق, ەكولوگيالىق جانە الەۋمەتتىك سىن-قاتەرلەر كەزەڭىندە جاڭا داۋىرگە اياق باسقانىن اتاپ ءوتتى.
«ازاماتتىق قوعامنىڭ سيپاتى, قۇرىلىمى, ونىڭ ىقپال ەتۋ سالاسى وزگەردى. بۇل وزگەرىستەردىڭ دامۋىنىڭ ماڭىزدى فاكتورى تسيفرلاندىرۋ, الەۋمەتتىك جەلىلەر ارقىلى كوپتەگەن اقپاراتقا قول جەتكىزۋ, ءار ادامنىڭ ءوزىنىڭ جەكە ستەندىن ينتەرنەتتە پايدالانۋ مۇمكىندىگىن الۋ, دەمەك جەكە ادام مەن قوعام جانە مەملەكەت اراسىنداعى قاشىقتىقتى قىسقارتۋ. COVID-19 جانە پاندەميامەن بايلانىستى ءماجبۇرلى وقشاۋلاۋ, سودان كەيىن قاڭتار قاسىرەتى ادامدارعا بۇرىن ازاماتتىق قوعامنىڭ بولەك بولعان ۇەۇ-عا جاقىنداۋعا مۇمكىندىك بەردى. بۇل قولجەتىمدىلىك بۇكىل الەمدە جانە ءبىزدىڭ ەلدە ازاماتتىق بەلسەندىلىكتىڭ دامۋىنا اسەر ەتتى», دەدى سپيكەر.
اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ توراعاسى ماديار قوجاحمەت بۇگىندە مەملەكەتتىڭ ۇەۇ-مەن بىرگە جۇمىس ىستەيتىن نەگىزگى باعىتتارىن, اتاپ ايتقاندا, جەرگىلىكتى ءوزىن-ءوزى باسقارۋ مەن ازاماتتىق قوعامدى دامىتۋ تۇجىرىمداماسىنا توقتالدى.
«2023 جىلى ازاماتتىق قوعاممەن ءتۇرلى باستامالاردى تالقىلاۋ جوسپارلانىپ وتىر. ماڭىزدى ۇسىنىمدار ەسكەرىلە وتىرىپ, ولاردى ىسكە اسىرۋعا تەك مينيسترلىك ەمەس, بارلىق مەملەكەتتىك ورگاندار دا تارتىلادى», دەدى م.قوجاحمەت.
كونراد ادەناۋەر اتىنداعى قوردىڭ قازاقستانداعى وكىلدىگىنىڭ ديرەكتورى يوحاننەس راي «حالىق ۇنىنە قۇلاق اساتىن مەملەكەت» تۇجىرىمداماسىن تالقىلاۋ مەن ديالوگتىڭ ماڭىزدىلىعىنا توقتالىپ, گەرمانياداعى مەملەكەت پەن جۇرتشىلىق اراسىنداعى ءوزارا ءىس-قيمىلدى دامىتۋ تاجىريبەسىمەن ءبولىستى. ال اقدق اتقارۋشى ديرەكتورى ءجاميلا اسانوۆا كوممەرتسيالىق ەمەس ۇيىمداردىڭ كوشباسشىلارى مەملەكەتتىك ورگاندارمەن ديالوگتىڭ جاڭا تەتىگىن قالىپتاستىرۋى قاجەت ەكەنىن ايتتى.
ديالوگ الاڭىنىڭ قورىتىندىسى بويىنشا ۇسىنىستار ازىرلەنىپ, پىكىرتالاس الاڭىنا قاتىسۋشىلار قازاقستانداعى ازاماتتىق قوعامدى دامىتۋدىڭ ماڭىزدى سۇراقتارىنا جاۋاپ تابۋعا تىرىستى. ۇكىمەتتىك ەمەس سەكتوردى دامىتۋعا ارنالعان كونفەرەنتسيانىڭ بىرقاتار نەگىزگى سپيكەرىنىڭ باياندامالارىن ۇيىمداستىرۋشىلار 2023 جىلدىڭ باسىندا جارىق كورەتىن «قازاقستانداعى ازاماتتىق قوعام: ىشكى كوزقاراس» جيناعىندا بىرىكتىرۋدى جوسپارلاپ وتىر.
