مەملەكەت باسشىسىنا بيىلعى كۇردەلى ماكروەكونوميكالىق جاعدايلارعا قاراماستان بانك سەكتورىنىڭ تۇراقتىلىعى مەن ورنىقتىلىعى قامتاماسىز ەتىلگەنى جونىندە باياندالدى. ءمادينا ابىلقاسىموۆانىڭ ايتۋىنشا, بانكتەردىڭ اكتيۆتەرى جىل باسىنان بەرى 14,4 پايىزعا ءوسىپ, 43,1 تريلليون تەڭگەگە جەتكەن. ال حالىقتىڭ سالىمدارى 16,8 پايىزعا نەمەسە 15,7 تريلليون تەڭگەگە دەيىن كوبەيگەن.
سونىمەن قاتار ەكونوميكانى كرەديتتەۋ ءىسىن ىنتالاندىرۋ ماقساتىندا اگەنتتىك كاپيتال بوساتۋعا جانە وتىمدىلىككە قاتىستى رەتتەۋ شارالارىن قابىلداپ, كەپىلزات ساياساتىنا قويىلاتىن تالاپتاردى جەڭىلدەتتى. ناتيجەسىندە ەكونوميكانى كرەديتتەۋ كورسەتكىشى جىل باسىنان بەرى 20,1 پايىزعا نەمەسە 22,2 تريلليون تەڭگەگە دەيىن ارتتى. ونىڭ ىشىندە بيزنەستى كرەديتتەۋ كولەمى 7,3 پايىزعا نەمەسە 8,3 تريلليون تەڭگەگە دەيىن وسكەن, سونداي-اق شاعىن جانە ورتا بيزنەستى كرەديتتەۋ كورسەتكىشى 8,6 پايىزعا نەمەسە 4,9 تريلليون تەڭگەگە دەيىن ۇلعايعان.
پرەزيدەنتكە حالىقتىڭ شامادان تىس كرەديت الۋىن شەكتەۋ شارالارى تۋرالى اقپارات بەرىلدى. اتاپ ايتقاندا, ميكروكرەديتتەردىڭ سىياقى مولشەرلەمەسى تومەندەتىلىپ, بورىش جۇكتەمەسىنىڭ كوەففيتسيەنتىن ەسەپتەۋ ءتاسىلى قاتاڭداتىلدى. سونداي-اق بانكتەر مەن ميكروقارجى ۇيىمدارىنىڭ (مقو) پروبلەمالىق كرەديتتەرمەن جۇمىس ىستەۋ جونىندەگى جەكە جوسپارلارى قابىلداندى. جالپى ميكروقارجى جانە كوللەكتورلىق ۇيىمداردىڭ قىزمەتىنە قويىلاتىن تالاپ كۇشەيدى. بيىل 23 ميكروقارجى ۇيىمى مەن 35 كوللەكتورلىق اگەنتتىكتىڭ قىزمەتى توقتاتىلدى.
اگەنتتىك توراعاسى ناقتىلاعانداي, ساقتاندىرۋ نارىعىندا جاڭا الەۋمەتتىك ساقتاندىرۋ ونىمدەرى ەنگىزىلىپ, ساقتاندىرۋ قىزمەتتەرىن تسيفرلاندىرۋ ءۇشىن جاعداي جاسالعان. قور نارىعىندا جەكە ساناتتاعى ينۆەستورلاردى قورعاۋ شارالارى كۇشەيتىلدى. ولاردىڭ سانى ەكى جىلدا 4 ەسە ارتىپ, 526 مىڭعا جەتكەن.
كەزدەسۋ سوڭىندا مەملەكەت باسشىسى قارجى نارىعىن رەتتەۋ ءىسىن ودان ءارى دامىتۋعا جانە وسى سالادا تۇراقتىلىقتى قامتاماسىز ەتۋگە باعىتتالعان بىرقاتار مىندەت جۇكتەدى.
