القالى جيىننىڭ اشىلۋىندا مەرەكەلىك شارانى ۇيىمداستىرعان قازاقستان-رەسەي مەديتسينالىق ۋنيۆەرسيتەتىنىڭ رەكتورى نۇرلان جايناقباەۆ قۇتتىقتاۋ ءسوز سويلەدى.
«عالىمنىڭ ءجۇرىپ وتكەن جولىن, ەڭبەكتەرىن ەلىمىز عانا ەمەس, دوستاستىق ەلدەرى دە عيبراتتى ەستەلىكتەرمەن ەسكە الاتىنى ءسوزسىز», دەدى نۇرلان جايناقباەۆ.
جيىن بارىسىندا قورعانىس ءمينيسترىنىڭ ورىنباسارى, گەنەرال-لەيتەنانت مۇحامەدجان تالاسوۆ ءمينيستردىڭ ارنايى قۇتتىقتاۋ حاتىن وقىپ, زۇلقاينار سەيىت ۇلىنا «ەل قورعانى» مەدالىن تابىس ەتتى.
«وت پەن وقتىڭ اراسىنان امان كەلىپ, عىلىم جولىنا سانالى عۇمىرىن ارناعان عالىمنىڭ ەتكەن ەڭبەگى, جەتكەن جەتىستىگى بۇگىنگى جاس ۇرپاققا ۇلگى-ونەگە», دەدى ءوز سوزىندە م.تالاسوۆ.
جيىنعا كەلگەندەر پروفەسسور زۇلقارناي سەيىتوۆتىڭ ءومىر جولىنا قاتىستى فيلم كورىپ, اعىلشىن تىلىندە جارىققا شىققان «Biochemistry» ەڭبەگىمەن تانىستى. بۇل ەڭبەك وتكەن عاسىردىڭ 80-ءشى جىلدارى ورىس, كەيىننەن قازاق تىلىندە جارىق كورىپ, عىلىمي قاۋىمداستىق تاراپىنان جوعارى باعاسىن العانى بەلگىلى. وسى ەڭبەگى ءۇشىن پروفەسسور «پلاتينالى تارلان» سىيلىعىمەن ماراپاتتالعان.
عالىمنىڭ بۇل ەڭبەگىن «كلاسسيكالىق, مەديتسينالىق ەڭبەك» دەپ اتاپ وتكەن م.ايتحوجين اتىنداعى مولەكۋلالىق بيولوگيا جانە بيوحيميا ينستيتۋتىنىڭ باس ديرەكتورى, بيولوگيا عىلىمدارىنىڭ دوكتورى, پروفەسسور كاماليدەن شاريپوۆتىڭ ايتۋىنشا, قازاق حالقىنىڭ باسىنان كەشكەن ناۋبەت جىلداردى, ءىى دۇنيەجۇزىلىك سوعىس جىلدارىن باسىنان وتكەرىپ, ۇلتتىق عىلىم ءىسىنىڭ دامۋىنا ءالى كۇنگە دەيىن ۇلەس قوسىپ كەلە جاتقان ارداگەر-عالىم زۇلقارناي سەيىتوۆتىڭ بۇل ەڭبەگى جاھاندىق سىن-تەگەۋرىندەردى باسشىلىققا الادى. اعزاداعى زات الماسۋ ۇردىسىنەن باستاپ, جۇيكە جۇيەسى, دانەكەر ۇلپاسى, باۋىر بيوحيمياسىن سيپاتتايتىن «بيوحيميا» ەڭبەگىن قازاقستان-رەسەي ۋنيۆەرستيتەتى اعىلشىن تىلىندە جارىققا شىعارىپ وتىر.
«بيوحيميا» ەڭبەگىنىڭ اۆتورى بۇگىندە ەلىمىز عانا ەمەس شەتەلدىڭ عىلىمي قاۋىمداستىعىنا ۇلتتىق سۋسىنداردىڭ پايداسى, «قازاق بالزامدارى» مەن «التىنسۋ» ەمدىك سۋسىندارىمەن كەڭىنەن ءمالىم. ول دۇنيە جۇزىندە العاش رەت بيولوگيالىق قاسيەتتەرىن ساقتاي وتىرىپ, قىمىز بەن شۇباتتى دايىنداۋ جانە ۇزاق ۋاقىتقا دەيىن ساقتاۋ تەحنولوگياسىن, سونىمەن قاتار بيە, تۇيە ءسۇتىن قۇرعاقتاي پايدالانۋ ادىستەرىن دالەلدەدى.
جيىندا مەرەيتوي يەسىنە زور قۇرمەت كورسەتىلىپ, جىلى لەبىزدەر ايتىلدى.
الماتى
