پرەزيدەنت قاسىم-جومارت توقاەۆ الماتى قالاسىندا ءوتىپ جاتقان راپيد جانە بليتس بويىنشا ەرلەر مەن ايەلدەر اراسىنداعى شاحماتتان الەم چەمپيوناتىنىڭ اشىلۋىنا وراي جارىس قاتىسۋشىلارىنا قۇتتىقتاۋ جولدادى. بۇل ايتۋلى شاراعا قاتىسۋ ءۇشىن الەمنىڭ 50-دەن استام مەملەكەتىنەن ەڭ ۇزدىك سپورتشىلار جينالدى.
«قازاقستاندا وسى ءتۋرنيردى وتكىزۋگە سەپتىگىن تيگىزگەنى ءۇشىن حالىقارالىق شاحمات فەدەراتسياسىنىڭ باسشىلىعىنا ريزاشىلىعىمدى بىلدىرەمىن. مۇنداي بەدەلدى جارىستار ەلىمىزدە شاحماتتىڭ تانىمالدىلىعىن ارتتىرۋعا تىڭ سەرپىن بەرەرى ءسوزسىز. بۇگىندە قازاقستاندىق شاحماتشىلار بالالار اراسىنداعى جانە ەرەسەكتەر اراسىنداعى ازيا جانە الەم چەمپيوناتتارىندا جوعارى ناتيجەلەر كورسەتىپ كەلەدى. ولاردىڭ جەتىستىگى وسكەلەڭ ۇرپاقتى ينتەللەكتۋالدى سپورت تۇرلەرىمەن شۇعىلدانۋعا, الدىنا زور ماقساتتار قويىپ, وعان قول جەتكىزۋگە جىگەرلەندىرەدى.
ءبىز قازاقستاندا شاحماتتى جۇيەلى تۇردە دامىتۋدى جالعاستىرامىز جانە حالىقارالىق شاحمات فەدەراتسياسىمەن ىنتىماقتاستىقتا تابىستى جۇمىس ىستەۋگە دايىنبىز. بۇل ءبىزدىڭ ادام الەۋەتىن ارتتىرۋ جانە زياتكەر ۇلت قالىپتاستىرۋ جونىندەگى ستراتەگيالىق مىندەتىمىزگە تولىق ساي كەلەدى. تۋرنير قاتىسۋشىلارىنا جارىستان ۇمىتىلماس اسەر الىپ, جارقىن جەڭىستەرگە جەتۋدى تىلەيمىن», دەپ جازىلعان پرەزيدەنتتىڭ قۇتتىقتاۋ حاتىندا.
