كونكۋرس قورىتىندىسى بويىنشا تۇركىستان وبلىسى شاردارا اۋدانى جاۋشىقۇم اۋىلدىق وكرۋگىنىڭ اكىمى نۇرباقىت نۇرسەيىتوۆ «ۇزدىك اۋىل اكىمى» اتاندى. ەكىنشى ورىندى پاۆلودار وبلىسى ۋسپەن اۋدانى نوۆوپوكروۆسك اۋىلدىق وكرۋگىنىڭ اكىمى ۆياچەسلاۆ سيمونەنكو, ءۇشىنشى ورىندى اقتوبە وبلىسى شالقار اۋدانى ايشۋاق اۋىلدىق وكرۋگىنىڭ اكىمى ورالبەك ءابشانوۆ يەلەندى.
سونداي-اق شىعىس قازاقستان وبلىسى ۇلان اۋدانى ابلاكەت اۋىلدىق وكرۋگىنىڭ اكىمى ارىسلان اگلانبەكوۆ – «ۇزدىك شارۋاشىل اكىم», قاراعاندى وبلىسى نۇرا اۋدانى بارشىن اۋىلدىق وكرۋگىنىڭ اكىمى زاۋرە مۇحاناليەۆا – «اشىق اكىم», سولتۇستىك قازاقستان وبلىسى اققايىڭ اۋدانى شاعالالى اۋىلدىق وكرۋگىنىڭ اكىمى
گۇلميرا دوبروميروۆا – «ۇزدىك الەۋمەتتىك جوبا» نوميناتسيالارىمەن ماراپاتتالدى.
گۇلميرا دوبروميروۆا اۋىلدا قاراۋسىز قالىپ, قاڭىراپ تۇرعان ءۇش قاباتتى عيماراتتى جوندەتىپ, الەۋمەتتىك از قامتىلعان وتباسىلارعا بەرۋدى ماقسات ەتكەن جوبا ۇسىنعان. ەگەر جوبا قولداۋ تاپسا, شاعالالىدا 26 وتباسى پاتەرلى بولماق.
اۋىل اكىمدەرىمەن كەزدەسۋدە مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ ۇزدىك اۋىل اكىمدەرىن ءوز قىزمەتىندە حالىقتىڭ سۇرانىسىنا ساي اشىق, ادال ءارى ءادىل بولۋدىڭ ماڭىزدىلىعىنا توقتالىپ اتالعان بايقاۋدىڭ اۋىلداردى دامىتۋعا جانە وسى باعىتتاعى جۇمىستاردى جانداندىرۋعا وڭ سەپتىگىن تيگىزەتىندىگىنە سەنىم ءبىلدىردى.
سونىمەن قاتار اۋىل اكىمدەرىنە پرەزيدەنت جانىنداعى مەملەكەتتىك باسقارۋ اكادەمياسىندا كوشباسشىلىق, ءسوز سويلەۋ, داعدارىستىق كوممۋنيكاتسيا جانە ت.ب. داعدىلارىن شىڭداۋعا ارنالعان ارنايى ترەنينگتەر وتكىزىلدى.
اتاپ وتسەك, كونكۋرسقا ەلىمىزدىڭ تۇكپىر-تۇكپىرىنەن جۇزگە جۋىق اۋىلدىق وكرۋگتىڭ اكىمدەرى ءوتىنىم بەرگەن. ۇيىمداستىرۋشىلاردىڭ ايتۋىنشا, قوستاناي وبلىسىنان 14 اكىم, سولتۇستىك قازاقستان جانە جامبىل وبلىستارىنان 12 اكىم كونكۋرسقا ءوتىنىم بەرىپ, بەلسەندىلىك تانىتقان.
