جارتىلاي فينالدا ارگەنتينا مەن فرانتسيادان جەڭىلىپ, ساتسىزدىككە ۇشىراعان ەكى قۇرامانىڭ دا ءۇشىنشى ورىن ءۇشىن وتەتىن ماتچ الدىندا قاي جاعىنان الىپ قاراساق تا, كۇشتەرى تەڭ ەدى. ماسەلەن, حورۆاتيا مەن ماروككو فۋتبولشىلارى بۇعان دەيىن جاسىل الاڭدا ەكى مارتە كەزدەسىپ, ەكەۋى دە تەڭ ەسەپپەن اياقتالعان بولاتىن. 1996 جىلى كاسابلانكادا وتكەن جولداستىق باسەكەدە 2:2 ەسەبى تىركەلگەن بولسا, وسى الەم چەمپيوناتىنىڭ توپتىق كەزەڭدەگى ەكىنشى كەزدەسۋىندە دە جەڭىمپاز قۇراما انىقتالعان جوق – 0:0. سونداي-اق باسقا دا ستاتيستيكالىق مالىمەتتەر ەكى قۇرامانىڭ ءبىر دەڭگەيدەگى كوماندا ەكەنىن ايعاقتايدى.
الەمدىك مۋنديالداعى تاجىريبە, جۇلدەلەر سانى, رەيتينگتەگى قۇرامالاردىڭ ورنى «شاقپاق جەيدەلىلەردىڭ» افريكالىقتارعا قاراعاندا ءبارىبىر ءبىر ساتى جوعارى تۇرعانىن دالەلدەيدى. اتاپ ايتقاندا, 2018 جىلعى «التىن دوپ» يەگەرى لۋكا مودريچ باستاعان حورۆاتيا قۇراماسى قاتارداعى الەم بىرىنشىلىگىنە دەيىنگى فيفا رەيتينگىندە 12-ورىندا تۇرعان بولسا, ماروككو 22-ساتىعا جايعاسقان. سونىمەن قاتار حورۆاتيا 1998 جىلى فرانتسيادا وتكەن الەمدىك فۋتبول باسەكەسىنىڭ قولا جۇلدەسىن, 2018 جىلعى رەسەيدەگى جاھاندىق بىرىنشىلىكتە كۇمىس جۇلدەگە قول جەتكىزگەن. ال ماروككو بولسا, بۇعان دەيىن بەس الەم چەمپيوناتىنا قاتىسقانىمەن, تەك ءبىر رەت قانا, ياعني 1986 جىلى مەكسيكادا ۇيىمداستىرىلعان فۋتبول تويىندا 1/8 فينال مەجەسىنەن كورىنگەن بولاتىن.
«حاليفا» ستاديونىندا وتكەن ويىنعا توقتالار بولساق, ەكى قۇرامانىڭ توپتىق كەزەڭدەگى العاشقى ويىنىندا بىردە-ءبىر گول سوعىلماعاندىقتان, فۋتبول ساراپشىلارى ماتچ الدىندا بۇل باسەكەدە كوپ گول كورەمىز دەپ بولجاعان ەدى. اۋزى دۋالى مامانداردىڭ ايتقانى ايداي كەلدى. 90 مينۋتقا جالعاسقان ماتچتا جانكۇيەرلەر ءبىرى بىرىنەن وتكەن ادەمى ءۇش گولدىڭ كۋاسى بولدى.
ءۇش ۇپاي ەمەس, جۇلدەلى ءۇشىنشى ورىن ءۇشىن وتكەن ماتچتىڭ ءجونى بولەك بولعان سوڭ, ەسكى دە جاڭا قارسىلاستار ءبىرىنشى مينۋتتان باستاپ اڭدىسىپ جاتقان جوق. تورەشىنىڭ ىسقىرىعى ەستىلگەن ساتتەن باستاپ ەكى قۇرامانىڭ فۋتبولشىلارى دا العا ۇمتىلىپ, ءبىرىنشى بولىپ گول سوعۋعا تىرىستى. سوندىقتان ستاديونعا جينالعان, تەلەديدار ارقىلى تاماشالاعان جانكۇيەرلەر ءبىرىنشى گولدىڭ سوعىلعانىن كوپ كۇتكەن جوق. كەزدەسۋدىڭ جەتىنشى مينۋتىندا يۆان پەريشيچتىڭ پاسىنان كەيىن حورۆاتيانىڭ ۇزىن بويلى قورعاۋشىسى يوشكو گۆارديول باسپەن گول سوعىپ, ماتچتىڭ ەسەبىن اشتى – 1:0. بىراق حورۆاتيالىق جانكۇيەرلەردىڭ قۋانىشى ۇزاققا سوزىلعان جوق. ارادا ەكى مينۋت وتكەندە ماروككو قۇراماسىنىڭ قورعاۋشىسى اشراف داري مەرگەندىك تانىتىپ, تارازى باسىن تەڭەستىردى – 1:1.
جىلدام ەكى گول سوعىلعاننان كەيىن ويىن ءبىراز سايابىرسىعانداي بولدى. الايدا ءبىرىنشى تايم اياقتالار تۇستا ماروككو قۇراماسىنىڭ قورعانىستاعى قاتەلىگىنەن كەيىن حورۆاتيالىق فۋتبولشى ميسلاۆ ءورشيچتىڭ ايىپ الاڭىنىڭ سول قاپتالىنان قاقىراتا تەپكەن دوبىن مۋنديالدىڭ ەڭ ۇزدىك قاقپاشىلارىنىڭ ءبىرى ياسسين بۋنۋ قايتارا المادى – 2:1. ەكىنشى تايمدا ماروككو فۋتبولشىلارى تارازى باسىن تەڭەستىرۋگە قانشا تىرىسقانىمەن, سۋفيان بۋففال, يۋسسەفا ەن-نەسيري, حاكيم زيەش سەكىلدى فۋتبولشىلار دومينيك ليۆاكوۆيچتىڭ قاقپاسىنان ساڭىلاۋ تابا المادى.
وسىلايشا, قاتارداعى الەم چەمپيوناتىنىڭ ءۇشىنشى ورىن ءۇشىن وتكەن ماتچىندا زلاتكو داليچ جەتەكشىلىك ەتەتىن حورۆاتيا قۇراماسى جەڭىسكە جەتتى. ءسويتىپ, حورۆاتتار 24 جىل بۇرىنعى فرانتسياداعى تاريحي ناتيجەسىن قايتالاپ, الەم بىرىنشىلىگىنىڭ ەكى دۇركىن قولا جۇلدەگەرى اتاندى.
