بۇل تۋرالى اباي وبلىسىنىڭ حالقىمەن كەزدەسۋدە يندۋستريا جانە ينفراقۇرىلىمدىق دامۋ ۆيتسە-ءمينيسترى ەرجان مىرزاباەۆ ايتتى.
وسى رەتتە مەملەكەت باسشىسىنىڭ «ورتالىق اتقارۋشى ورگاندار باسشىلارىنىڭ حالىقپەن كەزدەسۋلەرىن وتكىزۋ تۋرالى» جارلىعىنا سايكەس يندۋستريا جانە ينفراقۇرىلىمدىق دامۋ مينيسترلىگى وكىلدەرىنىڭ ەلىمىزدىڭ وڭىرلەرىنە ءىسساپارلارى جالعاسىپ كەلە جاتقانىن ايتا كەتەيىك.
اباي وبلىسىنىڭ ىسكەر ورتاسى جانە جەرگىلىكتى حالقىمەن يدم باسشىسىنىڭ ورىنباسارلارى ەرجان مىرزاباەۆ پەن دينارا ششەگلوۆا كەزدەسىپ, تۇرعىنداردىڭ سۇراقتارىنا جاۋاپ بەردى. ماسەلەن, جەڭىل ونەركاسىپپەن اينالىساتىن كاسىپكەرلەر, ونىڭ ىشىندە سەمەيدەگى اياق كيىم فابريكاسىنىڭ وكىلدەرى مەملەكەتتىك قورعانىستىق تاپسىرىستى الۋدىڭ شارتتارى تىم قاتاڭ ەكەنىن جەتكىزدى. سوندىقتان سەمەيلىك جەڭىل ونەركاسىپشىلەر وعان قاتىسۋدىڭ تالابى وڭتايلاندىرىلىپ, جەڭىلدەتىلسە دەگەن پىكىردە. بۇل ورايدا ە.مىرزاباەۆ قازىر قورعانىس ونەركاسىبى مەن مەملەكەتتىك قورعانىستىق تاپسىرىسقا قاتىستى زاڭناما قايتا قاراستىرىلىپ جاتقانىن, سونداي-اق كەلەر جىلى ءتيىستى زاڭ جوبانى ازىرلەۋ كوزدەلىپ وتىرعانىن اتاپ ءوتتى.
«قازىر ۇكىمەت باسشىسى الدىمىزعا قورعانىس ونەركاسىبى مەن مەملەكەتتىك قورعانىستىق تاپسىرىس ماسەلەلەرىن رەتتەيتىن قولدانىستاعى زاڭدى تولىعىمەن قايتادان قاراستىرىپ, مەملەكەتتىك قورعانىستىق تاپسىرىستى قالىپتاستىرۋدىڭ ەرەجەلەرىن جەتىلدىرۋ مىندەتىن قويىپ وتىر. مينيسترلىك قازىر وسى ماسەلەمەن اينالىسىپ كەلەدى», دەدى يندۋستريا جانە ينفراقۇرىلىمدىق دامۋ ۆيتسە-ءمينيسترى.
بۇدان بولەك جەرگىلىكتى دەڭگەيدە جەڭىل ونەركاسىپ كاسىپورىندارىنا سەمەيدەگى بىرنەشە كوتەرمە ساۋدا ورنىندا شىعارىلاتىن ءونىم تۇرلەرىن ساتۋعا ارنايى ورىندار دا بەلگىلەنگەنى ايتىلدى.
سونداي-اق د.ششەگلوۆا اباي وبلىسىنىڭ حالقىنا يندۋستريا جانە ينفراقۇرىلىمدىق دامۋ مينيسترلىگىنىڭ قۇزىرىنداعى بىرقاتار سالاداعى تسيفرلاندىرۋ ۇدەرىسىنىڭ بارىسىن ايتىپ بەردى. ماسەلەن, ەلىمىزدە قۇرىلىس كەزەڭدەرىن e-Qurylys بىرىڭعاي اقپاراتتىق جۇيەسى ارقىلى ىسكە اسىرۋ كوزدەلىپ وتىر. اتالعان جۇيە بيىل ماۋسىمدا ىسكە قوسىلعانىن ايتا كەتكەن ورىندى. ول قۇرىلىس پروتسەسىنىڭ بارلىق قاتىسۋشىسى مەن مەملەكەتتىك ورگاندارعا كەز كەلگەن قۇرىلىستى اۆتوماتتاندىرۋعا سەپتىگىن تيگىزەدى.
