قوعام • 15 جەلتوقسان، 2022

دەپوداعى داۋ: جۇمىسشىلار تالابى

106 رەت كورسەتىلدى

جىل جابىلار تۇستا «تاراز لوكوموتيۆ جوندەۋ دەپوسى» ۇجىمىنىڭ قىزمەتكەرلەرى ايلىعى شايلىعىنا جەتپەيتىنىن ايتىپ باس كوتەردى. جالپى سانى 200-گە جەتەعابىل قىزمەتكەر 70 مىڭ تەڭگەدەن باستالاتىن جالاقىنىڭ جىرتىقتى جاماۋعا دا سەپ بولا المايتىنىن العا تارتىپ وتىر. ولاردىڭ ايتۋىنشا، سوڭعى بىرنەشە جىل بەدەرىندە جالاقىعا ماردىمدى سوما قوسىلماعان.

«ايلىق كوتەرىلسىن!» دەگەن ۇرانمەن اتتانداعان قىزمەتكەرلەر جالاقىنىڭ 20-30 پايىزعا ەمەس، 100 پايىزعا وسكەنىن قالايدى. ويتكەنى ينفلياتسيا مەن ازىق-ت ۇلىك باعاسىنىڭ شارىقتاۋى ابدەن قاجىتقان. ادامنان باسقانىڭ ءبارى قىمباتتاعانى شامىنا تيگەن جۇمىسشىلار جاقسى جۇمىس ىستەۋ ءۇشىن جاقسى جالاقى تالاپ ەتۋدەن تانبايتىندارىن ايتادى. الەۋمەتتىك تەڭسىزدىك ابدەن تەنتىرەتكەن قىزمەتكەرلەردىڭ ايتۋىنشا، الاتىن سىياقى مولشەرى 30 مىڭ تەڭگەگە دە جەتپەگەن ەكەن. سوڭعى ءۇش جىلدا جالاقى كوتەرۋ ماسەلەسىن ايتا-ايتا قاجىعان ولار ءسوزىمىزدى ەشكىم تىڭدامادى دەپ كۇيىنىپ وتىر. امالدىڭ جوقتىعىنان ەرەۋىلدەتكەن ەل ماسەلە وڭىنان شەشىلسە دەيدى.

«اقيقاتىن ايتساق، بارار جەر، باسار تاۋىمىز قالماعانداي كۇي كەشىپ وتىرمىز. تىعىرىققا تىرەلىپ بىتتىك. قولىمىزعا تيەتىن ايلىق 110 مىڭ مەن 140 مىڭ تەڭگەنىڭ شاماسىندا. مۇنداي ايلىققا قالاي جان باعۋعا بولادى؟ بىزدە ءبىر عانا تالاپ بار. جالاقىمىزدى 100 پايىزعا كوتەرسىن. تالابىمىزدى تۇپكىلىكتى ورىنداماسا، جۇمىستى توقتاتۋعا ءماجبۇر بولامىز. جەتەر جەرگە جەتتىك ەندىگى»، دەدى «تاراز لوكوموتيۆ جوندەۋ» دەپوسىنىڭ جۇمىسشىسى قايرات ەسقاراەۆ كۇيىنىپ.

تالاپ قويعانداردىڭ اراسىندا جالا­قىمىز 70 مىڭ تەڭگە دەپ ۇرانداتقاندار دا بولعان. ال ق.ەسقاراەۆتىڭ ايتۋىنشا، 110 مىڭنان باستالاتىن كورىنەدى. دەسە دە اركىم ءوز جالاقىسىنىڭ مولشەرىن ايتىپ وتىرعان سەكىلدى. الايدا قالاي الىپ قاراساق تا، اۋىر جۇمىسقا جەگىلگەن قىزمەتكەرلەردىڭ تابىسى ماردىمسىز ەكەنى تالاس تۋدىرماسا كەرەك.

«انىعىن ايتساق، شىدامنىڭ دا شەگى بار عوي. ءبىز جالاقىنىڭ كوتەرىلگەنىن جىلدىڭ باسىنان بەرى سارىلا كۇتىپ ءجۇرمىز. ولار 7-10 پايىز قوسىلدى دەگەندى العا تارتادى. بىراق وزگەرگەن تۇك جوق. ءبارى ءباز باياعى قالپىندا تۇر»، دەيدى «تاراز لوكوموتيۆ جوندەۋ» دەپوسىنىڭ جۇمىسشىسى دانيار ومىرباەۆ اشىنىپ.

قىزمەتكەرلەردىڭ سويلەۋ مانەرىنەن ابدەن اشىنعاندارى ايقىن اڭعارىلادى. ءون بويلارىن ەموتسيا جاۋلاپ العانداي كورىنەدى. باسشىلىقپەن بىرگە ءماجىلىس زالىنا بارعان جۇمىسشىلار جالاقىنىڭ جىرىنان بولەك ارنايى بەرىلەتىن كيىم ماسەلەسى دە تاۋسىلماي تۇرعانىن ايتىپ، دابىل قاقتى. جۇمىسشىلاردىڭ تالابىنا قۇلاق استى ما، الدە اۋەلدەن سولاي جوسپارلانعان با، كىم ءبىلسىن؟! ايتەۋىر، دەپو ديرەكتورى ەڭبەكاقى الداعى جىلى كوتەرىلەتىنىن تىلگە تيەك ەتتى. الايدا ناقتى قانشا پايىز قوسىلاتىنى ازىرگە بەيمالىم. ويتكەنى بۇل ماسەلەنى اكتسيونەرلەر اقىلداسىپ شەشەتىن كورىنەدى.

 «مەن نەگىزى ماسەلەنىڭ ءمانىسىن قولدان كەلگەنشە ءتۇسىندىرىپ جاتىرمىن. مۇندا 2-3 ادام باسقارىپ، جاع­دايدى ۋشىقتىرماسا جارار ەدى. الداعى كۇندەرى ەلوردادان كوميسسيا كەلەدى. سول كەزدە جۇمىسشىلاردىڭ بارلىعىن جيناپ، جاعدايدى قالىپقا كەلتىرىپ، ءبارىن رەتتەيتىن بولامىز»، دەيدى «قامقور لوكوموتيۆ» جشس فيليا­لى «تاراز لوكوموتيۆ جون­دەۋ دەپوسىنىڭ» ديرەكتورى ءىلياس لەسباەۆ داۋرىققان داۋعا قاشان ناق­تى نۇكتە قويىلۋى مۇمكىن ەكەنىن تۇس­پالداپ. 

دەپودان شىققان داۋ جەرگىلىكتى اتقارۋشى بيلىكتىڭ دە نازارىن اۋداردى. ولار جۇمىس توبىن قۇرۋعا نيەتتى. جىل اياعىندا قىزمەتكەرلەرگە ون ءۇشىن­شى جالاقى تولەنەتىنىن دە ايتىپ قالدى. ون ءۇشىنشى جالاقى تولەنگەنى جاقسى عوي. الايدا قىزمەتكەرلەردىڭ جالاقىسى قانشا پايىزعا وسەدى؟ اك­تسيو­نەرلەر قابىلداعان شەشىم ولار­دىڭ كوكەيىنە قونا ما؟ وسى جاعىنا دا دەن قويعان ابزال.

«2022 جىلدىڭ 13 جەلتوقسانىندا الەۋمەتتىك جەلىدە «قامقور لوكوموتيۆ» جشس تاراز لوكوموتيۆ جوندەۋ دەپوسى قىزمەتكەرلەرىنىڭ قاتىسۋىمەن بەينەجازبا جاريالاندى. جينالعان جۇمىسشىلار سىياقى تولەۋ جانە جالاقىنى 100 پايىزعا كوتەرۋ تالاپتارىن العا تارتقان.

سەرىكتەستىك باسشىسى ي.ن.لەس­باەۆ، تاراز قالاسى اكىمىنىڭ ورىنباسارى ق.يسمايل، قالا پروكۋرورىنىڭ ورىن­باسارى د.اسقار، كولىك پروكۋ­را­تۋراسىنىڭ ورىنباسارى ن.جۋراەۆ قىزمەتكەرلەرمەن كەزدەسىپ، ءتۇسىندىرۋ جۇمىستارىن جۇرگىزدى.

قازىرگى تاڭدا جاعداي تۇراقتى. قا­تى­سۋشىلار ءوز جۇمىس ورىندارىنا تا­رادى. «قامقور لوكوموتيۆ» جشس تاراز لوكوموتيۆ جوندەۋ دەپوسىنىڭ جۇ­مىسى قالىپتى دەڭ­گەيدە جالعاسۋدا.

اتالعان ماسەلە بويىنشا جۇمىس توبى قۇرىلىپ، ونىڭ قۇرامىنا «قام­قور لوكوموتيۆ» جشس باس ديرەك­تو­رىنىڭ ورىنباسارى ا.نۇسىپقۇلوۆ، كاسىپوداق جانە جشس-نىڭ باسقا دا قىزمەتتەرىنىڭ وكىلدەرى ەندى.

جشس قۇرىلتايشىلارى تاۋەل­سىزدىك كۇنىنە وراي جشس قىزمەت­كەر­لەرىنە سىياقى (ايلىق جالاقى مولشەرىندە) تولەنەتىنىن جەتكىزدى. ال جالاقىنى كوتەرۋ ماسەلەسى جاقىن ارادا جۇمىس توبىنىڭ وتىرىسىندا ۇجىم مۇشەلەرىنىڭ قاتىسۋىمەن تالقىلانادى»، دەلىنگەن جەرگىلىكتى اتقارۋشى بيلىكتىڭ رەسمي جاۋابىندا.

قالاي بولعان كۇندە دە جۇمىس­شىلار جالاقىنىڭ از عانا مولشەردە كوتەرىلگەنىن قۇپ كورمەيتىن سەكىلدى. ونى ولاردىڭ «جالاقىمىز 100 پا­يىزعا كوتەرىلسىن» دەگەن تالاپتارىنان ايقىن اڭعاردىق. ماسەلەنى مايشاممەن قارايتىن ازاماتتار قىز­مەت­كەر­لەر­دىڭ تالابىن تولىق ورىنداي ما؟ الدە مامىلەگە كەلۋدىڭ باسقا ءبىر جولىن ىزدەي مە؟..

ايلىقتىڭ ازدىعىن ايتقان قىز­مەت­كەرلەردىڭ تالابى ورىندى سياقتى. ويتكەنى دەپوداعى 500-دەن استام جۇمىسشى جىلىنا 600 ەلەكتروۆوزدى جوندەپ شىعارادى. بىلگەن ادامعا بۇل وڭاي جۇمىس ەمەس.

 

تاراز

 

ۇقساس جاڭالىقتار