قازىرگى كەزدە ازاماتتاردىڭ تولەم قابىلەتىن قالپىنا كەلتىرۋ جانە ولاردىڭ بانكروتتىعى, قوعامدىق باقىلاۋ, تۇرعىن ءۇي ساياساتىن رەفورمالاۋ تۋرالى, سونداي-اق دەنساۋلىق ساقتاۋ سالاسىنا جانە قوعامداعى باسقا دا وزەكتى ماسەلەلەرگە قاتىستى زاڭ جوبالارى دەپۋتاتتاردىڭ قاراۋىندا جاتىر.
ەرلان قوشانوۆ قاسىم-جومارت توقاەۆقا ءماجىلىس پەن قايتا قۇرىلعان جوعارى اۋديتورلىق پالاتا اراسىنداعى ءوزارا ءىس-ارەكەت مەحانيزمدەرى تۋرالى مالىمەت بەردى. ەندى پارلامەنت مۇشەلەرى ورتالىقتان باستاپ ناقتى اۋدان, قالا, اۋىلعا دەيىنگى بولىنگەن بيۋدجەت قارجىسىن تولىق باقىلاي الادى. بۇل بارلىق قاراجاتتىڭ ماقساتتى جۇمسالۋى مەن تيىمدىلىگىن ساراپتاۋعا مۇمكىندىك بەرەدى.
سونداي-اق سپيكەر ءماجىلىس جانىنان قۇرىلعان قوعامدىق پالاتانىڭ جۇمىسى تۋرالى ايتتى. ونىڭ قۇرامىنا دەپۋتاتتار, ساراپشىلار, ساياسي پارتيالاردىڭ, ۇكىمەتتىك ەمەس ۇيىمداردىڭ وكىلدەرى كىردى. قوعامدىق پالاتادا ازىرلەنىپ جاتقان زاڭ جوبالارىن قوعامنىڭ سۇرانىسى مەن تالاپ-تىلەگى تۇرعىسىنان تۇراقتى تۇردە تالقىلاۋ جوسپارلانىپ وتىر.
مەملەكەت باسشىسىنا پارلامەنتتىڭ تومەنگى پالاتاسى جانىنداعى قوعامدىق قابىلداۋدىڭ جۇمىسى تۋرالى ەسەپ بەرىلىپ, ءماجىلىستىڭ قوعامعا اشىقتىعىن ارتتىرۋ جونىندەگى جوبالارى تانىستىرىلدى.
