ءىس-شاراعا «اۋىل» پارتياسىنىڭ جاستار قاناتىنىڭ مۇشەلەرى, اۋىل جاستارىنىڭ بەلسەندى وكىلدەرى, جاستار ۇيىمدارىنىڭ كوشباسشىلارى, مەملەكەتتىك ورگانداردىڭ وكىلدەرى, ستۋدەنتتىك ومبۋدسمەن قاتىستى.
فورۋم جۇمىسىن اشا وتىرىپ, «اۋىل» پارتياسىنىڭ توراعاسى ءالي بەكتاەۆ قۇتتىقتاۋ ءسوز سويلەپ, مەملەكەتتىك شەشىمدەر قابىلداۋدا جاستاردىڭ پىكىرىنىڭ ماڭىزدىلىعىن اتاپ ءوتتى.
«اۋىل» حالىقتىق-دەموكراتيالىق پاتريوتتىق پارتياسى ءتورتىنشى جىل قاتارىنان ءداستۇرلى تۇردە اۋىل جاستارىنىڭ فورۋمىن ۇيىمداستىرىپ كەلەدى. وسى ۋاقىت ىشىندە اۋىل جاستارى ەلدىڭ قوعامدىق-ساياسي ومىرىنە بەلسەندى قاتىسا باستادى. بيىلعى فورۋمنىڭ ەرەكشەلىگى, جاستار مەملەكەت باسشىسى قاسىم-جومارت كەمەل ۇلى توقاەۆ ۇسىنعان اۋىلدىق اۋماقتاردى دامىتۋ تۇجىرىمداماسى ءۇشىن ءوز ۇسىنىستارى مەن يدەيالارىن ۇسىنادى», دەپ اتاپ ءوتتى ءالي ابدىكارىم ۇلى.
فورۋم اياسىندا جاستار «اۋىل» پارتياسىن دامىتۋ باعدارلاماسىن دايىنداۋ بويىنشا ءوز ۇسىنىستارىن ۇسىندى, ولار الداعى ۋاقىتتا پارتيانىڭ باعدارلامالىق قۇجاتتارىنا اينالادى.
سونداي-اق ءىس-شاراعا اۋىلدىق بيزنەس وكىلدەرى قاتىستى. مەديتسينالىق تاۋارلار وندىرۋمەن اينالىساتىن جاس عالىم, كاسىپكەر الماس مۇحامەتوۆ اۋىلدا بيزنەستى دامىتۋ ماڭىزدىلىعىن اتاپ ءوتتى. قازىر الماس مۇحامەتوۆ مەديتسينالىق بۇيىمدار شىعارىپ, الماتى وبلىسىنداعى اۋىل تۇرعىندارىن جۇمىسقا ورنالاستىرۋدا.
ءوز كەزەگىندە اقمولا وبلىسى تسەلينوگراد اۋدانى پريرەچەنكا اۋىلدىق وكرۋگىنىڭ جاس اكىمى مەيىرحات ءجاندىلدين اۋىلدى باسقارۋ تاجىريبەسىمەن ءبولىستى.
اۋىل بالالارىنىڭ قالادا بەيىمدەلۋى بويىنشا نەگىزگى ماسەلەلەر قاراستىرىلدى. فورۋمعا قاتىسۋشىلار «ديپلوممەن اۋىلعا» مەملەكەتتىك باعدارلاماسىنا وزگەرىستەر ەنگىزۋ قاجەتتىگى تۋرالى «اۋىل» پارتياسىنىڭ ۇستانىمىمەن كەلىستى.
ءىس-شارا سوڭىندا اۋىل جاستارىنىڭ ماسەلەلەرى, اۋىل جاستارىن دامىتۋ جانە قولداۋ, ەلىمىزدە وڭتايلى جاستار ساياساتىن قالىپتاستىرۋ ماسەلەلەرى تالقىلاندى.
