كەزدەسۋ بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋعا باسا ءمان بەرىلە وتىرىپ, قازاقستان مەن ليتۆا قارىم-قاتىناستارىن دامىتۋ پەرسپەكتيۆالارى, سونداي-اق حالىقارالىق ۇيىمدار اياسىنداعى ءىس-ارەكەت ماسەلەسى تالقىلاندى.
قاسىم-جومارت توقاەۆ گابريەليۋس لاندسبەرگيسكە ءىلتيپات بىلدىرە وتىرىپ, ليتۆا ەلىمىزدىڭ بالتىق جاعالاۋى ايماعى مەن ەۋروپالىق وداقتاعى باسىمدىققا يە سەرىكتەسى ەكەنىن اتاپ ءوتتى.
كەزدەسۋدە ۇكىمەتارالىق ىنتىماقتاستىقتى جانە ەكى ەلدىڭ ىسكەر توپتارى اراسىندا كولىك, لوگيستيكا, قۇرىلىس جانە وڭدەۋ ونەركاسىبى سالالارىنداعى ءىس-ارەكەتتى جانداندىرۋدىڭ ماڭىزدىلىعى ءسوز بولدى.
ءوز كەزەگىندە گابريەليۋس لاندسبەرگيس قاسىم-جومارت توقاەۆقا, ليتۆا پرەزيدەنتى گيتاناس ناۋسەدانىڭ جۇرەكجاردى سالەمىن جانە ىزگى تىلەگىن جەتكىزدى. سونىمەن قاتار ليتۆا قازاقستاندى ورتالىق ازياداعى جەتەكشى ساۋدا-ەكونوميكالىق سەرىكتەس رەتىندە قاراستىراتىنىن اتاپ ءوتتى.
بۇدان بولەك, ولار حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
