كەزدەسۋ بارىسىندا Zhaik Petroleum LTD قازاقستاندىق كومپانياسى مەن قىتايلىق كومپانيا اراسىندا EPC-كەلىسىمشارتقا (بۇل جوبالاۋ, ساتىپ الۋ جانە قۇرىلىستى قامتيتىن كەلىسىمشارت) قول قويىلدى. وسى كەلىسىمشارت ارقىلى باتىس قازاقستان وبلىسىندا ونىمدىلىگى 130 مىڭ توننا مەتانول وندىرۋگە قاۋقارلى گاز-حيميا كەشەنىن سالۋ كوزدەلىپ وتىر.
«ەلىمىزدىڭ تاراپى بۇل جوبانى تابىستى ىسكە اسىرۋ ماقساتىندا قاجەتتى قولداۋدى كورسەتۋگە دايىن. قازىر «بايتەرەك» ۇلتتىق باسقارۋشى حولدينگى» اق-نىڭ دامۋ ينستيتۋتتارىمەن بىرلەسىپ, وسى جوبانى قارجىلاندىرۋ بويىنشا ءتيىستى جۇمىستار باستالدى. ءوز تاراپىمىزدان جوبالاۋ مەن قۇرىلىستى جۇزەگە اسىرۋ, سونداي-اق جوبانى ءساتتى ىسكە اسىرۋ ءۇشىن قاجەتتى جابدىقتاردى جەتكىزۋ جونىندەگى جوسپارلارىڭىزدى قۇپتايتىنىمىزدى ايتقىمىز كەلەدى», دەدى قايىربەك وسكەنباەۆ.
وسى رەتتە قۇرىلىس-مونتاج جۇمىستارى كەزەڭىندە 500-گە جۋىق جۇمىس ورنى, سونداي-اق كەشەن ىسكە قوسىلعاننان كەيىن 220 تۇراقتى جۇمىس ورنى اشىلادى دەپ جوسپارلانىپ وتىر. جوبانىڭ جالپى قۇنى – 140 ملن دوللار.
اتالعان گاز-حيميا كەشەنى 2024 جىلدىڭ اياعىنا قاراي ىسكە قوسىلماق. بۇدان كەيىن قۇنى 200 ملن دوللارعا اممياك پەن كارباميدتى شىعارۋعا بايلانىستى جوبانىڭ ەكىنشى كەزەڭى ىسكە اسىرىلادى دەپ قاراستىرىلعان.
