وتكەن دەمالىس كۇندەرى جولشىلار رەسپۋبليكالىق اۆتوجولداردى وڭدەۋگە 400 م3 استام قۇم-تۇز قوسپاسىن جۇمسادى. سونداي-اق دەمالىس كۇندەرى قازاۆتوجول قىزمەتكەرلەرى رەسپۋبليكالىق تراسسالاردى پايدالانۋشىلارعا كومەك كورسەتتى.
ماسەلەن 5 جەلتوقسان تۇنگى ساعات 01:00 شاماسىندا «الماتى-ەكاتەرينبۋرگ» اۆتوجولىنىڭ 1365 شاقىرىمىندا تاتارستاننان ساران قالاسىنا ساپار شەككەن كولىك بۇزىلىپ, جولدا تۇرىپ قالعان. ۋچاسكەنى تىكەلەي قاداعالايتىن كەزەكشىلىكتەگى جولشى مامان 15 مينۋت ىشىندە كولىك تۇرىپ قالعان جول ۋچاسكەسىنە كەلىپ, ءۇش جولاۋشىنى بازاعا ەۆاكۋاتسيالادى.
سونداي-اق 5 جەلتوقسان تۇنگى ساعات 02:00 شاماسىندا «اقتوبە-اقتاۋ» باعىتىندا جول جۇرگەن جۇرگىزۋشىگە كومەك كورسەتىلدى. ديزەلدى قوزعالتقىشتا جانارمايى تاۋسىلعان جۇرگىزۋشى توڭىپ, قازاۆتوجولدىڭ تاۋلىك بويى جۇمىس ىستەيتىن بايلانىس ورتالىعىنا جۇگىنگەن. جولشىلار وعان جانارماي اپارىپ, كومەك قولىن سوزىپتى.
ايتا كەتسەك, ەگەر شتاتتان تىس جاعداي تۋىنداسا جۇرگىزۋشىلەر مەن جولاۋشىلارعا 1403 قىسقا ءنومىرى بويىنشا قازاۆتوجولدىڭ تاۋلىك بويى جۇمىس ىستەيتىن call-ورتالىعىنا حابارلاسۋعا كەڭەس بەرىلەدى.
بۇگىنگى تاڭدا رەسپۋبليكالىق ماڭىزى بار تاسجولدار اشىق.
