بۇل مونەتالار قۇب, قازاقستان مونەتا سارايى مەن MDM نەمىس نۋميزماتيكالىق كومپانياسى اراسىنداعى ۇشجاقتى كەلىسىم اياسىندا شىعارىلادى.
مونەتالاردىڭ ساتىلىمعا تۇسەتىن كۇنىنە قاتىستى اقپارات قۇب-تىڭ رەسمي سايتىندا قوسىمشا جاريالانادى.
«FIFA WORLD CUP QATAR 2022 مونەتالارىنىڭ ديزاينىن FIFA حالىقارالىق فۋتبول فەدەراتسياسى بەكىتكەن. كاتارداعى فۋتبولدان 2022 جىلعى الەم چەمپيوناتىنىڭ رەسمي سلوگانى EXPECT AMAZING ستاديوننىڭ ەلەكتروندىق تابلوسىنداعى جازۋ ستيلىندە جاسالعان. مونەتادا رەلەفتى ورتاشا دەڭگەيدە التىن جالاتۋ بويىنشا جاڭا تەحنولوگيا قولدانىلىپ وتىر. ول مونەتالىق وندىرىستە العاش رەت پايدالانىلدى جانە دوپتىڭ كولەمىن ءبولىپ كورسەتۋگە مۇمكىندىك بەرەدى. ونىڭ التىن جالاتىلعان بولىكتەرى فۋتبول قاقپاسىنىڭ تور دەڭگەيىنەن تومەن ورنالاسقان», دەلىنگەن حابارلامادا.
FIFA WORLD CUP QATAR 2022 كوللەكتسيالىق مونەتالارى التىن جالاتۋ تەحنولوگياسىن قولدانا وتىرىپ, 925/1000 سىنامالى كۇمىستەن جاسالعان. ماسساسى 20 گرامم, ديامەترى 37 مم, نومينالى 100 تەڭگەلىك, جالپى تارالىمى 4 000 ء(تورت مىڭ) دانا. ىشكى نارىق ءۇشىن مونەتالاردىڭ تارالىمى 3 650 دانا, سىرتقى نارىق ءۇشىن 350 دانا.
كوللەكتسيالىق مونەتالار قازاقستان رەسپۋبليكاسىنىڭ بۇكىل اۋماعىندا ءوزىنىڭ بەلگىلەنگەن قۇنىمەن تولەمنىڭ بارلىق ءتۇرى بويىنشا قابىلدانۋعا جاتادى, سونداي-اق قازاقستان رەسپۋبليكاسىنىڭ بارلىق بانكىندە بانك شوتتارىنا ەسەپكە الىنىپ, اۋدارىلادى, ۇساقتالادى جانە ايىرباستالادى.
كوللەكتسيالىق مونەتالار قازاقستان تەڭگە سارايىندا دايىندالدى.
