سۋرەتتەردى تۇسىرگەن ەرلان ومار
ەلورداداعى «قازپوشتانىڭ» ورتالىق بولىمشەسىنە ارنايى كەلگەن مينيسترلەر گازەت-جۋرنالدارعا جازىلۋشىلاردىڭ كورسەتكىشىمەن تانىسىپ, بولىمشە مۋزەيىن تاماشالادى.
«باسپاسوزگە جازىلۋ ناۋقانىنا قولداۋ ءبىلدىرۋ ماقساتىندا كەلدىك. بىزگە قولداۋ كورسەتكەن وقۋ-اعارتۋ ءمينيسترى اسحات قانات ۇلىنا ريزاشىلىق بىلدىرەمىز. بيىل مەملەكەت باسشىسى «بالالار جىلىن» جاريالاعانى بەلىگىلى. سوندىقتان ءبىز ءبىرىنشى كەزەكتە بالالار كونتەنتىنە قولداۋ كورسەتۋىمىز كەرەك. «بالالار جىلىندا» بالالارعا ارنالعان گازەت-جۋرنالدارداردىڭ وقىرماندارىنىڭ كوپ بولۋى, مەنىڭشە, بۇلدىرشىندەرگە جاسالعان ەڭ ۇلكەن سىيلىق. ەكىنشىدەن, «قازپوچتامەن» ورتاق مەموراندۋمعا قول قويدىق. بۇل مەموراندۋم شەڭبەرىندە باسىلىمداردى وقىرمان قولىنا جەدەل جەتكىزۋ ماسەلەسى قامتىلعان. Post.kz سايتىنىڭ كومەگىمەن ونلاين جازىلۋعا بولادى. سونىمەن قاتار «كاسپي» ارقلى جازىلۋ ماسەلەسىن دە پىسىقتاپ جاتىرمىز. سولاي جازىلۋ ءبىرشاما وڭتايلى بولادى. پرەزيدەنت ۇلىقتاۋ راسىمىندە اۋىلعا ەرەكشە ءمان بەردى. پرەزيدەنتتىككە سايلانعاننان كەيىنگى ءبىرىنشى جارلىعى اۋىلعا قاتىستى بولدى. سوندىقتان اۋىلداعى تۇرعىندارعا ءباسپاسوز قۇرالدارىنىڭ, گازەت پەن جۋرنالدارىمىزدىڭ جەدەل جەتۋى ءبىزدىڭ نازارىمىزدا بولادى», دەدى اقپارات جانە قوعامدىق دامۋ ءمينيسترى.
ونىڭ ايتۋىنشا, قازىرگىدەي كەزەڭدە جەدەل ءارى تەكسەرىلگەن, ناقتى اقپارات تاراتاتىن گازەت-جۋرنالدارىمىزدى جۇرتشىلىققا, وقىرمانعا جەتكىزۋ ماسەلەسى وزەكتى.
وسى رەتتە دارحان قۋاندىق ۇلى «Egemen Qazaqstan», «كازاحستانسكايا پراۆدا», «Astana aqshamy», «Turkistan», «ۆەچەرنيايا استانا», «ۇلان», «قازاق ادەبيەتى» باسىلىمدارىنا جازىلدى. جازىلۋ ناۋقانىنان وقۋ-اعارتۋ ءمينيسترى دە قالىس قالعان جوق. ول «ۇلان» گازەتى مەن «بالدىرعان» جۋرنالىنا جازىلدى.
«پەداگوگ مارتەبەسى» تۋرالى زاڭ قابىلدانعانىن بىلەسىزدەر. زاڭ اياسىندا مۇعالىمدەردى وزىنە ءتيىستى ەمەس جۇمىستاردان بوساتۋ, سونداي-اق ءارتۇرلى باسىلىمدارعا مىندەتتەپ جازدىرتۋ ماسەلەسىن توقتاتۋ بويىنشا شەشىم بولدى. ماسەلەن, قازىر ۇستازداردى سەنبىلىككە شىعارۋ نەمەسە باسىلىمدارعا مىندەتتەپ جازدىرۋ جاعدايلارى انىقتالسا, وسى ءىس-ارەكەتكە بارعان ازامات اكىمشىلىك جاۋاپكەرشىلىككە تارتىلادى. سوندىقتان ءبىز مۇنداي ارەكەتتەرگە جول بەرمەيمىز. بىراق بىزدە «وقۋعا قۇشتار مەكتەپ» دەگەن جاقسى جوبا ىسكە اسىرىلىپ جاتىر. وسى جوبا شەڭبەرىندە مەكتەپتەگى كىتاپحانالارعا تەك قانا كوركەم ادەبيەتتەردى ساتىپ الىپ جاتقان جوقپىز, وعان قوسىمشا وسىنداي بالالاردىڭ ارنايى باسىلىمدارىنا دا جازىلىپ جاتىر. سوندىقتان «بالدىرعان», «درۋجنىە رەبياتا»» سياقتى باسقا دا بالالار باسىلىمدارى مەكتەپتەردىڭ كىتاپحانالارىنا كەلىپ تۇرسا, بالالارعا ءتيىمدى بولادى. وسى تۇرعىدا بۇگىن دارحان قۋاندىق ۇلىمەن بىرگە كەلىپ, بالالار باسىلىمدارىنا جازىلدىم», دەدى اسحات ايماعامبەتوۆ.
مينيستر مۇعالىمدەردىڭ باسىلىمدارعا جازىلۋ ماسەلەسىن جەكە تۇلعانىڭ شەشىمى رەتىندە قاراۋ كەرەك دەپ ەسەپتەيدى. سوندىقتان ءبىلىم بەرۋشىلەردى دە ەشكىم مىندەتتەي المايدى.
«بىراق مەكتەپتەردىڭ ارنايى بيۋدجەتتەرى بار, سول بولىنگەن قارجىنىڭ كومەگىمەن مەكتەپ كىتاپحانالارىن بالالارعا ارنالعان گازەت-جۋرنالدارمەن قامتاماسىز وتىرعان ءجون», دەدى وقۋ-اعارتۋ ءمينيسترى.
ال دارحان قىدىرالىنىڭ سوزىنە سۇيەنسەك, مۇعالىمدەردىڭ گازەت-جۋرنالدارعا جازىلۋى ءۇشىن باسىلىمدار قىزىقتى, پايدالى ءارى تارتىمدى بولعانى ابزال.
«وقىرمانداردىڭ كوپ بولۋى ءۇشىن باسىلىمداردىڭ دا ساپاسى جاقسى بولۋى ءتيىس», دەدى مينيستر.
بۇل رەتتە «قازپوشتا» قىزمەتكەرلەرى ءباسپاسوز قۇرالدارىن وقىرماندارعا جەدەل جەتكىزۋ جۇمىستارىن جۇيەلەۋگە بارىن سالاتىندارىن ايتتى.
مەرزىمدى باسپا باسىلىمدارىنا جازىلۋ ناۋقانى 3 قازاننان باستاپ «قازپوشتا» اق-نىڭ بارلىق بولىمشەلەرىندە ءجۇرىپ جاتىر.
ستاتيستيكالىق مالىمەتتەرگە كەلسەك, 1 جەلتوقسانداعى جاعداي بويىنشا «قازپوشتا» اق فيليالدارىندا 11 ميلليون جازىلىم تىركەلگەن. باسىلىمدارعا جازىلۋشىلاردىڭ 70%-عا جۋىعى اۋىلدىق جەرلەردەگى وقىرماندار.
وبلىستىق باق وكىلدەرىنىڭ قاتىسۋىمەن جازىلۋشىلاردى تارتۋ بويىنشا وبلىستىق فيليالداردا ءىس-شارالار ۇيىمداستىرىلىپ جاتىر. سونىمەن قاتار ماڭعىستاۋ, اقمولا, الماتى, پاۆلودار, سولتۇستىك قازاقستان, تۇركىستان وبلىستارىندا, استانا جانە الماتى قالالارىنىڭ پوشتا بولىمشەلەرىندە ابونەنت كۇندەرى وتكىزىلگەن. مۇنداي ءىس-شارالار كەزىندە باسىلىمدار جازىلۋشىلار اراسىندا ۇتىس ويىنىن وتكىزەدى. قازىرگى ساتتە «قازپوشتا» كاتالوگىندا 3000 گازەت-جۋرنال بار.
ايتا كەتەيىك, جازىلىم ناۋقانى 2022 جىلدىڭ 25 جەلتوقسانىنا دەيىن جالعاسادى.
