رەسەيدە قازاقتىڭ كيىز ۇيىنە دەگەن سۇرانىس ارتىپ كەلەدى

استانا. 3 ماۋسىم. اتا-بابالارىمىزدان بىزگە مۇرا بولىپ قالعان قازاقتىڭ قاراپايىم كيىز ءۇيى بۇگىندە رەسەيلىكتەردىڭ قىزىعۋشىلىعىن ارتتىرىپ وتىر. بۇل تۋرالى «24kz» حابارلادى. ايدار بەيسەنباەۆ دەگەن قوستانايلىق كاسىپكەر كيىز ءۇي ءوندىرىسىن قولعا العالى بەس جىل بولىپتى. ءتىپتى, ونىڭ ونىمدەرى رەسەي نارىعىندا ساتىلا باستادى. كاسىپكەر كەدەن وداعى اشىلعالى ونىمدەرىن وتكىزۋ ماسەلەسى شەشىمىن تابا باستاعان. ايدار بەيسەنباەۆ: «كەدەندىك وداقتىڭ پايداسى وتە زور, ويتكەنى كيىز ۇيلەردى ەكسپورتقا شىعارۋ جەڭىلىرەك بولدى. قازىر بۇرىنعىداي قاعازداردى كوپ دايىنداپ كەرەگى جوق. تۇتىنۋشىلار كەرەگىن وزدەرى الىپ كەتەدى. رەسەيلىكتەر قازاقتىڭ كيىز ءۇيىن ەكوتۋريزمدى دامىتۋ ماقساتىندا ساتىپ الادى. سىرت ەلگە ساۋدالاناتىن بۇيىمداردىڭ ۇلتتىق بوياۋى قانىق. ءبىزدىڭ ماقساتىمىز – بابامىز تۇتىنعان باسپانانى برەندكە اينالدىرىپ, سۇرانىستى ارتتىرۋ», – دەدى. ايدار بەيسەنباەۆتىڭ باسقارۋىنداعى كيىز ءۇي جاسايتىن كاسىپورىن قىزمەتكەرلەرى تاپسىرىس تۇسسە, ايىنا 5-تەن 20-عا دەيىن كيىز ءۇي جاساۋعا مۇمكىندىكتەرى بار. بۇل ەتنوونىمدەردىڭ 20-30 پايىزى رەسەيگە جونەلتىلەدى. اسىرەسە, كەدەندىك كەدەرگىلەر جويىلعالى رەسەيدىڭ چەليابى, قورعان, تۇمەن وبلىستارىنان سۇرانىس كوبەيگەن. جولدىباي بازار. دەرەككوز: «24kz». فوتو: «24kz».