مەديتسينا • 01 جەلتوقسان، 2022

قازاقستانداعى پەريناتالدىق ورتالىقتار گيپوتەرميا اپپاراتتارىمەن جابدىقتالدى

95 رەت كورسەتىلدى

قازاقستانداعى پەريناتالدىق ورتالىقتاردىڭ ۇشتەن ءبىرى گيپوتەرميا اپپاراتتارىمەن جابدىقتالدى، دەپ حابارلايدى Egemen.kz.

«Ayala» قايىرىمدىلىق قورى 5 جىل بويى «باسقارىلاتىن گيپوتەرميا» جوباسىن تاباندىلىقپەن جۇرگىزىپ كەلە جاتقانىنىڭ ارقاسىندا ەلىمىزدەگى 14 پەريناتالدىق ورتالىق قۇنى 300 ميلليون تەڭگەنى قۇرايتىن اۆتوماتتى گيپوتەرمياعا ارنالعان زاماناۋي جابدىقتارعا قول جەتكىزدى.

وسىلايشا 2017-2022 جىلدار ارالىعىندا بۇل باستاما 235 نارەستەنى اجالدان قۇتقارىپ، ماڭگىلىك مۇگەدەك بولۋدان ساقتاپ قالدى.

تەراپيالىق گيپوتەرميا ءسابي ومىرگە كەلگەن العاشقى ساعاتتاردا قولدانىلۋى قاجەت. اپپارات جاڭا تۋعان نارەستەنىڭ دەنە قىزۋىن اۆتوماتتى تۇردە 34 گرادۋسقا دەيىن تومەندەتەدى دە، 72 ساعات بويى ونى قاجەتتى دەڭگەيدە ۇستايدى، سودان كەيىن بالانى بىرتىندەپ جىلىتادى. تەك وسى عانا بالا اعزاسىنداعى مەتابوليزمدى وزگەرتۋگە، ميدى گليۋكوزامەن قامتاماسىز ەتە وتىرىپ، ورتالىق جۇيكە جۇيەسىنىڭ جاسۋشالارىن قايتىمسىز زاقىمدانۋلاردان قورعاۋعا مۇمكىندىك بەرەدى. گيپوتەرميا اپپاراتىمەن بىرگە جۇرەتىن امپليتۋدالىق ەلەكتروەنتسەفالوگرافيا مونيتورى دارىگەرلەرگە قولدانىلاتىن تەراپيانى باقىلاۋعا جانە تيىمدىلىگىن كوتەرۋگە كومەكتەسەدى.

قاراپ وتىرساق، سابيلەر ءولىم-ءجىتىمىنىڭ 60 پايىزدان استامىن جاڭا تۋعان نارەستەلەر قۇرايدى. باستى سەبەپتەرىنىڭ ءبىرى – بوسانۋ كەزىندەگى تۇنشىعۋ، قىسىلۋدان بولاتىن ورتالىق جۇيكە جۇيەسىنىڭ زاقىمدانۋى. ياعني، نارەستە ومىرگە كەلىپ جاتقان كەزدە ميدىڭ گيپوكسيالىق-يشەميالىق زاقىمدانۋى مي جاسۋشالارىنىڭ ولتىرەتىن پاتولوگيالىق پروتسەستەر كاسكادىن ىسكە قوسادى. مۇنىڭ سالدارى – كەم دەگەندە اۋىر مۇگەدەكتىككە دۋشار ەتىپ،  ودان دا قايعىلىسى ءسابيدى قۇتقارىپ قالۋ مۇمكىن ەمەس ەدى.

وسى ماسەلەگە وراي، «Ayala» قايىرىمدىلىق قورى 2016 جىلى پروفەسسور ارۋناساس ءليۋبشيستى (ليتۆا) قازاقستانعا شاقىرتقان-دى. ول قازاقستاندىق نەوناتولوگ-دارىگەرلەرگە ارنالعان تەگىن كۋرستاردا العاش رەت ەۋروپالىق وداقتىڭ پەرزەنتحانالارىندا اۆتوماتتى گيپوتەرميا اپپاراتتارىن قولدانۋدىڭ تابىستى تاجىريبەسى تۋرالى بايانداعان بولاتىن.

وعان دەيىن ماماندارىمىز مۇنداي جابدىقتاردان بەيحابار بولىپ، گيپوتەرميادا جاڭا تۋعان نارەستەلەردى قۇتقارۋ ءۇشىن تەك قانا قولدا بار – مۇزداتىلعان سۋ قۇيىلعان مەديتسينالىق پاكەتتەردى قولداناتىن. دارىگەرلەردىڭ جانكەشتىلىگىنە قاراماستان، بوسانۋ كەزىندە گيپوكسيانىڭ اۋىر تۇرىمەن تۋعان نارەستەلەردىڭ مۇگەدەكتىك كورسەتكىشى جوعارى ەدى. وسىنداي جاعدايلاردان كەيىن «Ayala» قق پرەزيدەنتى ءارى نەگىزىن قالاعان ايدان سۇلەيمەنوۆا جاعدايدى تۇبەگەيلى وزگەرتۋ تۋرالى شەشىم قابىلدايدى.

ء«بىز بۇل جوبانى الماتىداعى پەريناتولوگيا جانە بالالار كارديوحيرۋرگياسى ورتالىعى مەن استاناداعى انا مەن بالا ۇلتتىق عىلىمي ورتالىعىندا پيلوتتىق جوبا رەتىندە باستادىق. ءبىر جىل ىشىندە 75 جاڭا تۋعان نارەستەگە اۆتوماتتى گيپوتەرميا قولدانىلدى. رەانيماتسيا دارىگەرلەرى گيپوتەرميا اپپاراتىندا ەمدەلگەن سابيلەردىڭ مەتابوليزمدىك اۋىتقۋلارى تەزىرەك تۇزەتىلىپ، قاننىڭ وتتەگىمەن قانىعۋ كورسەتكىشتەرى جاقسارعانىن مالىمدەدى. كەيىن بۇل نارەستەلەر ەمدەلىپ، ۇيلەرىنە ساۋىققان كەزدە شىعارىلدى»، دەيدى «Ayala» قايىرىمدىلىق قورىنىڭ پرەزيدەنتى ايدان سۇلەيمەنوۆا.

وسىدان كەيىن قور پيلوتتىق جوبالاردىڭ جەتىستىگىنە سۇيەنە وتىرىپ، قر دەنساۋلىق ساقتاۋ مينيسترلىگىنە پەريناتالدىق ورتالىقتاردى گيپوتەرميا اپپاراتتارىمەن جابدىقتاۋدىڭ ماڭىزدىلىعىن دالەلدەپ، «باسقارىلاتىن گيپوتەرميا» جوباسى شەڭبەرىندە كۇش بىرىكتىرۋ جونىندەگى مەموراندۋمعا قول قويدى. وسىدان كەيىن گيپوتەرميا اپپاراتتارىن مىندەتتى مەملەكەتتىك ساتىپ الۋ ءۇشىن مەديتسينالىق جابدىقتار تىزبەسىنە قوسۋعا جول اشىلدى.

«بۇگىنگى تاڭدا الەمدىك دالەلدى مەديتسينا تۇرعىسىنان تەك تەراپيالىق گيپوتەرميا عانا بوسانعان كەزدە اۋىر گيپوكسيامەن تۋعانداردى نەيروپروتەكتسيانىڭ سەنىمدى ادىسىمەن قامتاماسىز ەتە الادى. فارميندۋستريا قانشا دامىسا دا، جاڭا تۋعان نارەستەلەردىڭ ميىن گيپوكسيالىق-يشەميالىق ەنتسەفالوپاتيادان بولاتىن قايتىمسىز زاقىمدانۋدان قورعاي الاتىن دارىلەر قازىرگە جوق. گيپوتەرميا اپپاراتى بۇدان دا بولەك، امپليتۋدالىق ەلەكتروەنتسەفالوگرافيا مونيتورينگىمەن بىرگە رەانيماتسيا بولىمىندە جۇمىس ىستەيتىن جانە بالانىڭ دەنە قىزۋىن ساعاتتار بويى باقىلاۋدا ۇستاۋعا مىندەتتى دارىگەرلەر مەن مەدبيكەلەردىڭ جۇكتەمەسىن ازايتادى. سوندىقتان وتاندىق نەوناتولوگتاردىڭ «Ayala» قايىرىمدىلىق قورىنا جاڭا تۋعان نارەستەلەردىڭ دەنساۋلىعىن ساقتاپ قالۋعا كومەكتەسىپ كەلە جاتقانى ءۇشىن العىسى شەكسىز»، دەيدى قازاقستان نەوناتولوگتارى كونگرەسىنىڭ توراعاسى بەكتۇرعان كارين.

وسىلايشا 2017 جىلدان بەرى قازاقستاننىڭ 12 قالاسىنىڭ مەديتسينالىق مەكەمەلەرى «Ayala» قايىرىمدىلىق قورىنىڭ جيناعان 300 748 500 تەڭگەگە 14 اۆتوماتتى گيپوتەرميا اپپاراتى مەن 13 امپليتۋدالىق ەلەكتروەنتسەفالوگرافيا مونيتورىن الدى. ونىڭ ىشىندە 2022 جىلى AYALA قق 7 مەديتسينالىق مەكەمەگە 134 ميلليون تەڭگەدەن استام سوماعا گيپوتەرميا اپپاراتتىق كەشەندەرىن تاپسىردى. ولاردى اقتاۋداعى، تالدىقورعانداعى، ورالداعى وبلىستىق پەريناتالدىق ورتالىقتار، وسكەمەن قالاسىنىڭ انا مەن بالا ورتالىعى، شىمكەنت قالاسىنداعى قالالىق پەريناتالدىق ورتالىق، جامبىل وبلىسىنىڭ كوپبەيىندى اۋرۋحاناسىنىڭ پەريناتالدىق بلوگى، الماتىداعى رەسپۋبليكالىق اكۋشەرلىك، گينەكولوگيا جانە پەريناتولوگيا عىلىمي ورتالىعى الدى.

«بەس جىل ىشىندە ءىرى دەمەۋشىلەردىڭ قولداۋىمەن جانە مىڭداعان قازاقستاندىقتاردىڭ قايىرىمدىلىق جارنالارىنىڭ ارقاسىندا ءبىز قازاقستاننىڭ بارلىق پەريناتالدىق ورتالىقتارىنىڭ ۇشتەن ءبىر بولىگىن اۆتوماتتى گيپوتەرمياعا ارنالعان اپپاراتتىق كەشەندەرمەن جابدىقتاي الدىق. بۇل اپپاراتتار 238 بالانىڭ فۋنكتسيونالدىق دەنساۋلىعىن ساقتاپ قالدى. الداعى ۋاقىتتا دا تاجىريبەلى نەوناتولوگتار  وسى اپپاراتتارمەن جۇزدەگەن بالانى قۇتقارا الادى»، دەيدى ايدان سۇلەيمەنوۆا.

سوڭعى جاڭالىقتار

اۆتوجول قۇرىلىسىنىڭ قارقىنى

ايماقتار • بۇگىن، 08:46

ينۆەستيتسيالىق تابىس

ەكونوميكا • بۇگىن، 08:44

جەلىگە «جەلىمدەلگەندەر»

ەكونوميكا • بۇگىن، 08:35

قوردىڭ قوماقتى قولداۋى

ەكونوميكا • كەشە

وتەماقىعا ءوتىنىش بەر

ەكونوميكا • كەشە

وتباسىندا – 36 بالا

قوعام • كەشە

سۋ باسۋدىڭ قاۋىپ-قاتەرى

ايماقتار • كەشە

تۇماۋدان ساق بولىڭىز!

مەديتسينا • كەشە

كۇرە جولداعى اپات

ايماقتار • كەشە

سەنى وسىلاي سۇيەمىن

ادەبيەت • كەشە

اعاش ادام

ادەبيەت • كەشە

اسىلدىڭ سىنىعى

ايماقتار • كەشە

ۇقساس جاڭالىقتار