پارلامەنت • 01 جەلتوقسان، 2022

سەناتتا گەودەزيا دەرەكتەرى تۋرالى زاڭ جوباسى قابىلداندى

سەنات دەپۋتاتتارى «گەودەزيا، كارتوگرافيا جانە كەڭىستىك دەرەكتەرى تۋرالى»، سونداي-اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە گەودەزيا، كارتوگرافيا جانە كەڭىستىكتىك دەرەكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن ەكى وقىلىمدا قاراپ، قابىلدادى، دەپ حابارلايدى Egemen.kz.

ايانا توعانبەك

زاڭ جوبالارىن تانىستىرعان تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستان رەسپۋبليكاسىنىڭ قولدانىستاعى «گەودەزيا جانە كارتوگرافيا تۋرالى» زاڭى 2002 جىلى قابىلدانعانىن اتاپ ءوتتى. 20 جىل ىشىندە گەودەزيا جانە كارتوگرافيا سالاسىندا ۇلكەن وزگەرىستەر بولدى، تسيفرلىق تەحنولوگيالار مەن سپۋتنيكتىك اپپاراتۋرالار ەنگىزىلىپ، وندىرىستە كەڭىنەن قولدانىلدى، كەڭىستىك دەرەكتەرىنىڭ دالدىگىنە، ولشەۋ تيىمدىلىگىنە جانە قولجەتىمدىلىگىنە قويىلاتىن تالاپتار ارتتى.

«وسىعان بايلانىستى ولقىلىقتار مەن قايشىلىقتاردى جويۋ ماقساتىندا زاڭنىڭ جاڭا رەداكتسياسىن جانە وعان ىلەسپە زاڭ قابىلداۋ قاجەت بولدى. گەودەزيا جانە كارتوگرافيا سالاسىنىڭ جاي-كۇيى مەملەكەتتەگى كاداستر مەن جەر-م ۇلىكتىك قاتىناستاردىڭ ساپاسىنا تىكەلەي اسەر ەتەدى»، دەدى باعدات مۋسين سەناتتىڭ جالپى وتىرىسىندا.

قازاقستان رەسپۋبليكاسىن جوعارى دالدىكتى گەودەزيالىق كوورديناتتار جۇيەسىمەن قامتاماسىز ەتۋ جانە ونىڭ نەگىزىندە ەلىمىزدىڭ بىرىڭعاي تسيفرلىق كارتوگرافيالىق بازاسىن قۇرۋ - زاڭ جوبالارىنىڭ نەگىزگى مىندەتتەرىنە جاتادى.

زاڭ جوباسىنىڭ نەگىزگى ناتيجەسى حالىققا كورسەتىلەتىن قىزمەتتەردىڭ تيىمدىلىگى مەن ساپاسىن ارتتىرۋ، ادال باسەكەلەستىك ءۇشىن جاعداي جاساۋ، مەملەكەتتىك باقىلاۋدىڭ تيىمدىلىگىن ارتتىرۋ بولادى.

ىلەسپە زاڭ جوباسىن قابىلداۋدىڭ ماقساتى - قازاقستان رەسپۋبليكاسىنىڭ قولدانىستاعى زاڭناماسىن «گەودەزيا، كارتوگرافيا جانە كەڭىستىكتىك دەرەكتەر تۋرالى» قازاقستان رەسپۋبليكاسىنىڭ جاڭا زاڭىنا سايكەس كەلتىرۋ، سونداي-اق ولقىلىقتار مەن قايشىلىقتاردى جويۋ.