قازاق حالقىندا «اۋىلىم – التىن بەسىگىم» دەيدى, بۇگىندە ەل تۇرعىندارىنىڭ جارتىسىنا جۋىعى اۋىل حالقى. قالادا تۇراتىنداردىڭ دا باسىم ۇلەسى جاڭادان قونىس اۋدارۋشىلار, ياعني اۋىلدان كەلگەن تۇرعىندارعا تيەسىلى. قانشالىقتى ۋربانيزاتسيا ۇدەرىسى جۇرسە دە, قازاق حالقى ءوزىنىڭ ءتۇپ قازىعى بولعان اۋىلدان قول ۇزگەن ەمەس.
دەگەنمەن دە قالا تۇرعىندارى سانىنىڭ كۇن ساناپ ءوسۋى الەۋمەتتىك ماسەلەلەردى العا شىعاردى. ماسەلەن, قالا حالقىنىڭ سانى ارتقان سايىن جاڭا بالاباقشا, مەكتەپ, ەمحانا جانە باسقا دا الەۋمەتتىك نىسانداردى سالۋ قاجەتتىگى تۋىنداپ وتىر. قازىردىڭ وزىندە مۇنداي وزەكتى ماسەلەلەر ەلىمىزدەگى ءىرى مەگاپوليستەردە عانا ەمەس, شاعىن قالالاردا دا كۇن تارتىبىنەن تۇسپەي كەلەدى.
سوندىقتان دا اۋىلدىڭ جاعدايىن جاقسارتۋ مەملەكەتتىك ماسەلە بولىپ تابىلادى. اۋىلدىڭ ينفراقۇرىلىمىن دامىتۋ, بالاباقشالار, مەكتەپتەر, سپورت نىساندارىن تۇرعىزۋ, حالىقتى تازا اۋىز سۋمەن قامتاماسىز ەتۋ, ەلدى مەكەندەردىڭ ەلەكترمەن قامتىلۋى, جولداردىڭ ساپاسى قالا مەن اۋىل اراسىنداعى الشاقتىقتى جويىپ, اۋىل تۇرعىندارىنىڭ قالاعا كوشۋ ۇدەرىسىن توقتاتا الادى. سونىمەن قاتار اۋىلدى كوركەيتۋ اۋىل شارۋاشىلىعىن دامىتۋعا, ەلدى مەكەندەردەگى اۋىل شارۋاشىلىعىمەن بايلانىستى شاعىن بيزنەستى دامىتۋعا, اۋىلدا جاستاردىڭ تۇراقتاۋىنا جول اشادى دەگەن سەنىم مول.
جاڭا ماماندىقتار قاجەتتىلىگىنە جاسالعان تالداۋلار, الداعى ۋاقىتتا اۋىلشارۋاشىلىق ماماندارىنا سۇرانىستىڭ ارتاتىنىن كورسەتكەن. قازاقستان – جوعارى ساپالى ازىق-ت ۇلىكتى, ونىڭ ىشىندە ەت پەن استىق ونىمدەرىن وندىرەتىن ەل. حالىقارالىق دەڭگەيدە ازىق-ت ۇلىككە سۇرانىس ارتسا, بۇل – وتاندىق فەرمەرلەرگە, اۋىل شارۋاشىلىعىن دامىتۋعا سەرپىن بەرەتىن جاڭا باعىت. ءبىز تابيعي كەن بايلىقتاردى, شيكىزاتتى وندىرۋدەن باسقا وسى اگرارلىق سەكتوردىڭ دامۋىنا باسا كوڭىل بولۋگە ءتيىسپىز.
بۇل ءۇشىن كاسىبي مامانداردى تارتىپ, الداعى كەزەڭدە اۋىل ءۇشىن قاجەت دەگەن ماماندىق يەلەرىن دايارلاۋمەن قاتار, جاستاردىڭ اۋىلعا بارۋعا دەگەن قۇلشىنىستارىن ارتتىرۋ كەرەك. ۋنيۆەرسيتەتتەر دە ءوز كەزەگىندە اۋىلدىق جەرلەردەگى مەكتەپتەر, بالاباقشالار, باسقا دا كاسىپورىنداردا بولاشاق ماماندار ءۇشىن تاجىريبە الاڭدارىن جاساۋ, ءوزارا ارىپتەستىك بايلانىستار جۇرگىزۋدى قولعا الادى. بۇل وقۋ ورىندارىنىڭ الدىڭعى قاتارىندا ح.دوسمۇحامەدوۆ اتىنداعى اتىراۋ ۋنيۆەرسيتەتى دە بار.
سالامات ىدىرىسوۆ,
ح.دوسمۇحامەدوۆ اتىنداعى اتىراۋ ۋنيۆەرسيتەتى باسقارما توراعاسى-رەكتور
