ادەتتە «اپات ايتىپ كەلمەيدى», بىراق ەكىباستۇزداعى جاعداي وزگەشە.
ەسكە سالا كەتسەك, 27 قاراشاعا قاراعان ءتۇنى جەرگىلىكتى جەو-نىڭ ەكران قۇبىرلارىندا اپات بولىپ, №11 پەش اگرەگاتى ىستەن شىققان, سونىڭ سالدارىنان تاعى ءۇش اگرەگات ىستەمەي قالعان. ناتيجەسىندە, قالادا 17 كوپقاباتى ءۇي, 5 الەۋمەتتىك نىسان, 21 زاڭدى تۇلعالار نىسانى جىلۋدان اجىراتىلدى. جىلۋسىز قالعان قالا تۇرعىندارى باسپانالارى سۋىپ كەتكەنىنە شاعىمدانىپ, ۇيدە قالىڭ كيىممەن جۇرۋگە ءماجبۇر ەكەندەرىن ايتتى.
كومپانيا جەو جۇمىسىن تەز قالپىنا كەلتىرۋگە ۋادە بەردى. ال وبلىس اكىمى ابىلقايىر سقاقوۆ ەكىباستۇزدىڭ جىلۋ جەلىسىندە بىرقاتار اقاۋ انىقتالعانىن ايتىپ, قالادا ءىرى اپات بولعانىن راستادى.
بەلگىلى بولعانداي, قالا تۇرعىندارى بۇل ماسەلە بويىنشا جازدا دا دابىل قاققان. بۇعان وبلىس اكىمىنىڭ Instagram پاراقشاسىندا جاريالاعان جازبا استىنداعى پىكىرلەر دالەل بولا الادى.
بۇدان بولەك, ەكىباستۇزدا توتەنشە جاعداي ورىن الاتىنىن الدىن الا بولجاعان قالا تۇرعىنى جاز ايىندا بيلىككە جۇگىنگەن كورىنەدى.
«ەكىباستۇزعا مەملەكەتتىك كوميسسيانى جىبەرىپ, جەو-دا بولۋ مۇمكىن اقاۋلاردى زەرتتەپ, بولىنگەن سۋبسيديالاردىڭ قايدا كەتكەنىن انىقتاپ, قاجەتتى جوندەۋ جۇمىستارىن جۇرگىزۋدى سۇرايمىن. جەو-نىڭ توزىعى شىققان جابدىقتارى اۋىستىرىلماسا, قالا كۇز بەن قىس ايلارىندا جىلۋسىز قالۋى مۇمكىن», دەلىنگەن جەلىدە تاراعان بەينەجازبادا.
وسى ورايدا, ەنەرگەتيكا مينيسترلىگى الدىنعى بولجامدارعا قاتىستى تۇسىنىكتەمە بەردى.
«بۇعان دەيىن ەكىباستۇز قالاسى تۇرعىندارىنىڭ جەو-دا جۇرگىزىلىپ جاتقان جوندەۋ جۇمىستارىنىڭ بارىسى تۋرالى شاعىمدارى بويىنشا ارنايى كوميسسيا قۇرىلعان. وعان مينيسترلىككە قاراستى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ جانە اكىمدىكتىڭ وكىلدەرى كىردى», دەلىنگەن حابارلامادا.
ۆەدومستۆو ءمالىم ەتكەندەي, 2022 جىلدىڭ 9-10 تامىزى ارالىعىندا اتالعان كوميسسيا ەكىباستۇزداعى جەو-عا بارعان. ساپار بارىسىندا نەگىزگى جابدىقتىڭ جوندەۋ جۇمىستارى مەن تومەن تەرىس تەمپەراتۋرالار كەزەڭىندە جۇكتەمەنى كوتەرۋ دايىندىعى تەكسەرىلدى.
«ستانتسيانى ارالاۋ كەزىندە جەو باسشىلىعىنا جوندەۋ جۇمىستارىن جەدەلدەتۋ تاپسىرىلعان. جالپى, ەلەكتر ستانتسياسىندا 5 ەنەرگەتيكالىق جانە 5 سۋ جىلىتۋ قازاندىعى, سونداي-اق 1 بۋ تۋربيناسى ورناتىلعان. ول كەزدە كوميسسيا جىلۋ قۇبىرلارىنىڭ توزۋ دەڭگەيى 70%-دان اسقانىن انىقتاعان. جىلۋ قۇبىرلارىنىڭ جالپى ۇزىندىعى 342 كم., جىل سايىن شامامەن 3-4 كم. جىلۋ جەلىلەرى اۋىستىرىلادى», دەپ قوستى مينيسترلىك وكىلدەرى.
قازىرگى ۋاقىتتا ەكىباستۇز تۇرعىندارىنىڭ ءومىرىن قالپىنا كەلتىرۋ ماقساتىندا بىرقاتار ءىس-شارالار كەشەنى قولعا الىندى. توتەنشە جاعداي بويىنشا قۇرىلعان ارنايى شتابتىڭ وتىرىسى ءوتىپ, جىلۋ جەلىلەرىندەگى ءۇش اقاۋدىڭ بىرەۋى جويىلعانى حابارلاندى. دەسە دە, قالاداعى 149 كوپقاباتتى ءۇي ءالى دە جىلۋعا قوسىلماعان.
ەسكە سالا كەتسەك, ۇقساس جاعداي شىعىس قازاقستان وبلىسىنىڭ ريددەر قالاسىندا دا ورىن العان ەدى. 2022 جىلدىڭ 5 قاراشاسىندا جەرگىلىكتى جەو-دا كۇل شىعارۋ جۇيەسىنىڭ سورعىسى ىستەن شىعىپ, 1 قازاندىق اگرەگاتىنىڭ قوسالقى جابدىعى اپاتتى جاعدايدا توقتاتىلدى. 9 قاراشادا قايتا ىسكە قوسىلعان №6 قازاندىق تۇندە تاعى ىستەن شىعىپ, ريددەرلىكتەردى جىلۋسىز قالدىرعان.
«قىستىڭ قامىن جاز ويلا» دەمەكشى, كەزىندە شەشىمىن تاپپاعان ماسەلە بۇگىندە مىڭداعان ادامدى قولايسىز جاعدايعا قالدىرعانى قىنجىلتادى...
