قايتىس بولعان ادامنىڭ تۋىستارى ونىڭ ىشكى ورگاندارىن دونورلىق ءۇشىن پايدالانۋعا رۇقسات بەرگەن. وسىلايشا مارقۇمنىڭ باۋىرى 44 جاستاعى شىمكەنتتىككە ترانسپلانتاتسيالاندى. دارىگەرلەر ناۋقاس باۋىر اۋىستىرۋ مۇمكىندىگىن ۇزاق جىلدار بويى كۇتكەنىن ايتىپ وتىر.
وپەراتسيا شامامەن التى ساعاتقا سوزىلعان. كۇردەلى ترانسپلانتاتسيانى قالالىق كلينيكالىق اۋرۋحانانىڭ دارىگەرلەرى جۇرگىزدى.
ايتا كەتەيىك, بۇل اۋرۋحانا قابىرعاسىندا 9 جىلدان بەرى ورگانداردى ترانسپلانتاتسيالاۋ بويىنشا ءتۇرلى وپەراتسيالار جۇرگىزىلىپ كەلەدى.
بۇعان دەيىن دارىگەرلەر تەك ءتىرى دونورلارمەن جۇمىس ىستەيتىن. بۇل جولى قايتىس بولعان ادامنىڭ ورگاندارىن پايدالانۋعا مۇمكىندىك تۋىپ, ونىڭ تۋىستارى رەسمي كەلىسىم بەرىپتى.
دەنساۋلىق ساقتاۋ باسقارماسىنىڭ مالىمەتى بويىنشا, قازىر ناۋقاس ءوزىن جاقسى سەزىنەدى.
ولاردىڭ ايتۋىنشا, دونوردىڭ باسقا ورگاندارى استاناعا ارنايى رەيسپەن جىبەرىلىپ, مۇقتاج ناۋقاستارعا ترانسپلانتاتسيالانادى.
