دەپۋتاتتار قىلمىستىق جولمەن الىنعان كىرىستەردى زاڭداستىرۋعا, تەرروريزمدى قارجىلاندىرۋعا جانە جاپپاي قىرىپ-جويۋ قارۋىن تاراتۋعا قارسى ءىس-قيمىل سالاسىنداعى حالىقارالىق ستاندارتتاردى ۇيلەستىرۋ مەن ولاردىڭ ورىندالۋىنا باقىلاۋ جۇرگىزۋ تەتىكتەرىن ەنگىزۋگە باعىتتالعان زاڭ جوبالارىن ازىرلەۋ مەن ولاردى ىسكە اسىرۋداعى تاجىريبەلەرىمەن باسقا ەلدەردەن كەلگەن ارىپتەستەرمەن ءبولىستى.
سەناتور س.ماكەجانوۆ ءىس-شارا بارىسىندا ەلىمىزدىڭ زاڭناماسىن جەتىلدىرۋ تاجىريبەسىمەن, اتاپ ايتقاندا, سوڭعى جىلدارداعى ۇلتتىق زاڭناماعا ەنگىزىلگەن نەگىزگى تۇزەتۋلەرمەن تانىستىردى.
ء«بىز ادىلەتتى قازاقستان قۇرىپ جاتىرمىز. رەفورمالاردىڭ ماڭىزدى ماقساتى – ۇلتتىق تابىستى ءادىل ءبولۋدى قامتاماسىز ەتۋ. مەملەكەت باسشىسى قاسىم-جومارت توقاەۆ بيزنەس وكىلدەرىمەن, حالىقپەن كەزدەسۋ كەزىندە زاڭسىز الىنعان كاپيتالدى مەملەكەتكە قايتارىپ, ولاردى ازاماتتاردىڭ مۇددەسىنە پايدالانۋ كەرەكتىگىن بىرنەشە رەت ايتقان بولاتىن», دەدى س.ماكەجانوۆ.
سەناتور قازاقستان پارلامەنتى قابىرعاسىندا وسى سالاداعى زاڭنامانى جەتىلدىرۋ جۇمىستارى بەلسەندى ءجۇرىپ جاتقانىن دا اتاپ ءوتتى. پارلامەنت بيىل جازدا قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىل تۋرالى زاڭداردى قابىلدادى.
«قازاقستان سىندارلى ءارى ساليقالى ساياسات جۇرگىزىپ كەلەدى. ءبىز قازىرگى جاعدايدا كىرىستەردى جىلىستاتۋعا قارسى تۇرۋ ماسەلەسىن جەكەلەگەن ەلدەردىڭ جەكە دارا ۇلتتىق پروبلەماسى ەمەس ويلايمىز. وسىعان بايلانىستى بىزگە حالىقارالىق ۇيىمداردىڭ نەعۇرلىم بەلسەندى قاتىسۋى جانە شىنايى ىنتىماقتاستىعى قاجەت», دەدى سەناتور س.ماكەجانوۆ.
