سپورت • 27 قاراشا، 2022

رونالدۋ رەكوردى، ماكسيموۆيچ جانە الاڭداعى 12 ويىنشى...

36 رەت كورسەتىلدى

وتكەن جۇمادا فۋتبولدان قاتاردا ءوتىپ جاتقان الەم چەمپيوناتىنىڭ توپتىق ءتۋرنيرىنىڭ ەكىنشى تۋرى باستالدى. وسى ورايدا «العاشقى كەزەڭ نەسىمەن ەستە قالدى؟» دەگەن ساۋالدىڭ تۋىنداۋى زاڭدى. بۇل تۋردا 16 كەزدەسۋ ءوتىپ، 41 گول سوعىلدى. ۆ جانە ە توپتارىندا ونەر كورسەتەتىن ويىنشىلار 10 رەتتەن نىسانانى ءدال كوزدەدى. ەڭ كوپ گول انگليا مەن يران (6:2) جانە يسپانيا مەن كوستا-ريكا (7:0) اراسىنداعى ماتچتاردا سوعىلدى. ال F توبىنداعى ويىنداردا ونداي ساتتەر تىم از بولدى. بۇل باسەكەلەردە بەلگيا كانادانى 1:0 ەسەبىمەن ۇتسا، ماروككو مەن حورۆاتيا ماتچىندا ەسەپ اشىلعان جوق.

16 كەزدەسۋدە بىردە-ءبىر فۋتبولشى ويىننان قۋىلعان جوق. ءدال سونداي جاعداي 1986 جىلى مەكسيكاداعى الەم چەمپيوناتىندا دا بولعان. بىراق وسىدان 36 جىل بۇرىن ۇيىمداستىرىلعان مۋنديالعا نەبارى 24 كوماندا قاتىس­قاندىقتان ءبىرىنشى تۋردا نەبارى 12 ويىن عانا وتكىزىلگەنىن ايتا كەتكەن ابزال.

پورتۋگاليانىڭ جۇلدىزى كريش­تيانۋ رونالدۋ گانا قۇراماسىنا قارسى ماتچتىڭ 65 مينۋتىندا 11 مەترلىك نۇكتەدەن نىسانانى ءدال كوز­­دەدى. ءسويتىپ، ءوزى قاتىسقان بەس الەم­دىك دودانىڭ بارلىعىندا گول سوققان تۇڭعىش جانە ازىرگە جالعىز فۋتبول­شى رەتىندە ونىڭ ەسىمى تاريحتا قالدى. سونداي-اق ول ارگەنتينانىڭ ماقتانىشى ليونەل مەسسيمەن بىرگە قاتارىنان بەسىنشى مارتە تورتكۇل دۇنيە­نىڭ تەڭدەسسىز تەڭبىل دوپ شەبەرلەرى جينالعان جارىسقا قاتىسۋدا. ولارعا دەيىن مەكسيكالىق انتونيو كارباحال مەن رافاەل ماركەس جانە گەرمانيالىق لوتار ماتتەۋس ءدال سونداي قۇرمەتكە بولەنگەن ەدى.

ۋرۋگۆاي مەن وڭتۇستىك كورەيا قۇرامالارى اراسىنداعى باسەكە 98 مينۋتقا سوزىلدى. سول ارالىقتا ەكى كوماندا ءبىر-ءبىرىنىڭ قاقپاسىنا ءبىر عانا ءدال سوققى باعىتتاي الدى. ونىڭ ءوزىن كورەيالىق قاقپاشى كەرى قايتاردى. ءدال وسىنداي جاعداي 1986 جىلى مەكسيكاداعى مۋنديالدا شوتلانديا مەن دانيا كوماندالارى اراسىنداعى باسەكەدە ورىن العان ەدى.

پولشا الەم چەمپيوناتتارىندا قاتارىنان ءۇش پەنالتيدى قاق­پاعا ەنگىزە الماعان جەر جاھانداعى جالعىز كوماندا. 1978 جىلعى جارىستا كازەميج دەين دوپتى قيسىق تەپسە، 2002 جىلى ماتسەي جۋراۆسكي بىلگەنىنەن جاڭىلدى. ال كۇنى كەشە عانا مەكسيكاعا قارسى ماتچتىڭ 57-مينۋتىندا پولياكتاردىڭ ەڭ ۇزدىك ويىنشىسى روبەرت لەۆاندوۆسكي 11 مەترلىك نۇكتەدەن ءمۇلت كەتتى.

برازيلياعا قارسى باسەكەنىڭ 73-مينۋتىندا سەربيا قۇراماسى ساپىندا ويىنشىلار الماستى. شابۋىلشى الەكساندار ءميتروۆيچتىڭ ورنىنا نەمانيا ماكسيموۆيچ شىقتى. قاتارداعى ءدۇبىرلى دوپ دوداسىندا وزىمىزگە تانىس بەينەنى كورىپ، كادىم­گىدەي قۋانىپ قالدىق. ويتكەنى 27 جاستاعى جارتىلاي قورعاۋشى 2015-2017 جىلدار ارالىعىندا قازاقستان پرەمەر-ليگاسىندا ونەر كورسەتىپ، «استانانىڭ» نامىسىن قورعادى. سول كەزدە ماكسيموۆيچ يسپانيانىڭ اتاقتى «ۆالەنسيا» كلۋبى باپكەرلەرىنىڭ نازارىنا ىلىككەن ەدى. سودان بەرى ول پيرەنەي تۇبەگىندە ويناپ ءجۇر.

ەكىنشى تۋرداعى انگليا مەن اقش اراسىنداعى ماتچ 0:0 ەسەبىمەن اياقتالدى. وعان دەيىن دانيا مەن تۋنيس، مەكسيكا مەن پولشا، ماروككو مەن حورۆاتيا جانە ۋرۋگۆاي مەن حورۆاتيا اراسىنداعى كەزدەسۋلەردە كورەرمەندەر قاقپاعا سوعىلعان بىردە-ءبىر گولدى كورە الماعان ەدى. وسىلايشا، «قۇرعاق ويىندار» بويىنشا جۋىق ارادا رەكوردتىڭ جاڭاراتىنى انىق. ەگەر ءححى عاسىردا وتكەن الەم چەمپيوناتتارى ناتيجەلەرىنە زەر سالساق، 2010 جىلعى جارىستىڭ توپتىق تۋرنيرىندە 0:0 ەسەبى التى مارتە تىركەلگەن ەكەن. 2006 جانە 2014 جىلدارى ولاردىڭ سانى بەسەۋ بولدى. 2002 جىلى ەكى جانە 2018 جىلى ءبىر مارتە عانا سونداي كورىنىستەردىڭ كۋاسى بولدىق.

ساۋد ارابياسى ارگەنتينا قۇراماسىن 2:1 ەسەبىمەن ۇتىپ، وسى جارىستىڭ العاشقى سەنساتسياسىن تىركەگەن ەدى. ءوز وتانداستارىنىڭ جار­قىن جەڭىسىنە ەرەكشە شاتتانعان اتالعان مەملەكەتتىڭ مۇراگەر حانزاداسى مۇحاممەد بەن سالمان ءار ويىنشىعا روللس رويستى سىيعا تارتتى. بۇل كولىكتەردىڭ ارقايسىسىنىڭ قۇنى – 460-550 مىڭ اقش دوللارى شاماسىندا. ال كەيبىر مالىمەتتەرگە سەنسەك، اتاعى الىسقا جايىلعان ارگەنتينالىقتاردى جەڭگەنى ءۇشىن ءار فۋتبولشىعا 2،5 ميلليون ەۋرودان سىياقى بەرىلدى.

فرانتسيا مەن اۋستراليا ارا­سىنداعى كەزدەۋدە تورەشىلەر تاراپىنان ورەسكەل قاتەلىك كەتتى. 73-مينۋتتا ءتورتىنشى قازى ساليم مۋكانسانگ جاسىل قۇرلىقتان كەلگەن كوماندانىڭ ەكى ويىنشىسى – گارانگ كۋول مەن اۆەر مابيلدىڭ جاسىل الاڭعا شى­عۋىنا رۇقسات بەردى. ال ويىننان تەك رايلي ماكگري عانا كەتتى. سوندا اۋس­­تراليالىقتاردىڭ ساپىندا 12 ويىن­شى بولعان. تەك ارادا بىرەر سەكۋند وتكەننەن سوڭ باس تورەشى ويىن­دى توقتاتىپ، كرەيگ گۋدۆيندى الاڭ­نان شىعاردى. ءسويتىپ، ولار ءوز قاتەلىكتەرىن تۇزەگەندەي بولدى. بىراق الەم چەمپيوناتى سەكىلدى دەڭگەيى اسا جوعارى جارىستا ونداي ولقىلىقتار جىبەرىلمەۋگە ءتيىس. قازىرگى كەزدە وسى وقيعا جايىندا بارلىق باق وكىلدەرى جارىسا جازىپ جاتىر.

سوڭعى جاڭالىقتار

جسدپ ۇمىتكەرلەرىن انىقتادى

ساياسات • بۇگىن، 00:08

ۇلت ءۇمىتىن اقتاعان

رۋحانيات • كەشە

يكەمدى باعام رەجىمى

قارجى • كەشە

ابە

ادەبيەت • كەشە

Enbek.kz ءبارىن جەڭبەك

قوعام • كەشە

«حات قورجىن»

ەگەمەن قازاقستان • كەشە

ابىگەرگە تۇسىرگەن تولاسسىز جاۋىن

توتەنشە جاعداي • كەشە

باۋكەڭنىڭ كوپ قىرى

ادەبيەت • كەشە

ۇقساس جاڭالىقتار