سپورت • 24 قاراشا، 2022

جاپون جانكەشتىلىگى ءسۇيسىنتتى

48 رەت كورسەتىلدى

فۋتبولدان قاتارداعى الەم چەمپيوناتىندا تاعى ءتورت باسەكەنى تاماشا­لادىق. جاسىل الاڭعا شىققاندار قاتارىندا حورۆاتيا مەن مەكسيكا، گەرمانيا مەن جاپونيا، يسپانيا مەن كوستا-ريكا، بەلگيا مەن كانادا قۇرا­مالارى بولدى. بۇل كوماندالاردىڭ بارلىعى دا وسى جارىستاعى العاشقى كەزدەسۋلەرىن وتكىزدى.

سەيسەنبى كۇنى ءتۇس اۋا ءال-حاۋر قالاسىنداعى ء«ال-بايت» ستاديونىندا حورۆاتيا مەن مەكسيكانىڭ فۋتبولشىلارى بوي كورسەتتى. ءبىرىنشى كەزەڭدە زلاتكو ءداليچتىڭ شاكىرتتەرى قارسىلاستارىنا قاراعاندا دوپقا كوبىرەك يەلىك ەتتى. بىراق قاۋىپتى ساتتەر تىم از بولدى. ەڭ ەستە قالعانى، يۆان پەريشيچتىڭ الىستان باعىتتاعان سوققىسى جانە نيكولا ءۆلاشيچتىڭ ەكى رەت قاقپانى نىساناعا الۋى. ەكى رەتىندە دە ياسسين بۋنۋ قاۋىپتىڭ بەتىن قايتاردى.ۇزىلىستەن كەيىن دە الاڭداعى جاعداي ەش وزگەرگەن جوق. حورۆاتتاردىڭ ساپىنداعى ەڭ اتاقتى فۋتبولشى لۋكا مودريچ بىرنەشە رەت ويىن تىزگىنىن ءوز قولىنا الۋعا تالپىنىپ كوردى. بىراق ودان ەش ناتيجە شىقپادى. سوڭىنا تامان 37 جاستاعى ارداگەر ويىنشى دا بىرتە-بىرتە بولدىرا باستادى. ال باسقالارىنان ەش قايىر بولمادى. ءسويتىپ، ءىش پىستىرار بۇل باسەكە 0:0 ەسەبىمەن اياقتالدى.

كوپ كەشىكپەي گەرمانيا مەن جاپو­نيانىڭ جىگىتتەرى جاسىل الاڭعا شىق­تى. ادەتتەگىدەي «نەمىس ماشيناسى» دوپ­تى بىردەن «مەنشىكتەپ» الدى. ەگەر ستا­تيستيكاعا جۇگىنسەك، ءبىرىنشى تايمنىڭ قورىتىندىسى بويىنشا دوپقا يەلىك ەتۋ جاعىنان ولار 80 پايىزدىق كورسەتكىش­كە، ياعني ايقىن باسىمدىققا يە بولدى. جانە دە ءبىرىنشى گولدى نەمىستەر سوقتى. 33-مينۋتتا يلكاي گيۋندوگان 11 مەتر­لىك نۇكتەدەن ەسەپ اشتى. ءيا، نەگىزىندە العاشقى دوپتى 8-مينۋتتا جاپونيا قۇراماسى سوققان ەدى. الايدا ويىننان تىس قالعان دايزەن ماەدانىڭ بۇل گولىن تورەشى ەسەپكە المادى. ۇزىلىستەن كەيىن جاپوندار ويىن سحەماسىن 4-2-3-1-دەن 3-4-3-كە وزگەرتىپ، وزدەرىنە ءتان جانكەشتىلىكپەن العا ۇمتىلدى. ءيا، باس باپكەر حادزيمە مورياسۋ بەكەر تاۋەكەلگە بارماعان ەكەن. كوپ كەشىكپەي ولاردىڭ بۇل تاكتيكاسى ءوز جەمىسىن بەردى. 75-مينۋتتا ريتسۋ دوان جانە 81-مينۋتتا تاكۋما اسانو قاتارىنان ەكى رەت نىسانانى ءدال كوزدەپ، كۇنشىعىس ەلى وكىلدەرىن العا شىعاردى. ەسەپ – 1:2. سول ارالىقتا گەرمانيا قۇراماسى بىرنەشە ويىنشىسىن الماستىرىپ، وزدەرىنىڭ تىڭ فۋتبولشىلارىن قاتارعا قوسقانىمەن، ولار دا ەشتەڭە وندىرە المادى. تابلوداعى ەسەپ باسەكەنىڭ سوڭىنا دەيىن ساقتالدى. بۇل – بيىلعى الەمدىك دوپ دوداسىنداعى ەكىنشى سەنساتسيا!

«يسپانيا قاتارعا وسال قۇرامدا كەل­دى» دەپ داقپىرت ايتىپ جۇرگەندەردىڭ دوحا­داعى ء«ال-تۋماما» ستاديونىنداعى كەزدەسۋدەن سوڭ اۋىزدارىنا قۇم قۇيىلدى. كوستا-ريكاعا قارسى باسەكە بارىسىندا ولاردىڭ قانشالىقتى قارۋلى ءارى ازۋلى ەكەنى انىق بايقالدى. باسەكەنىڭ باسىنان اياعىنا دەيىن پيرنەي تۇبەگىنىڭ تۇلەكتەرى ويىن تىزگىنىن ءوز قولدارىندا ۇستادى. ناتيجەسى كەرەمەت بولدى. 11-مينۋتتا داني ولمو ەسەپ اشسا، 21-مينۋتتا ماركو اسەنسيو ەكىنشى گولدى سوقتى. 31-مينۋتتا فەرران توررەس پەنالتيدى ءساتتى ورىندادى. ەكىنشى تايمدا يسپاندىقتار تاعى ءتورت رەت مەرگەندىك تانىتتى. بۇل گولداردىڭ اۆتورلارى – توررەس، پابلو گاۆي، كارلوس سولەر جانە الۆارو موراتا. وسىلايشا، «قىزىل فۋريا» كوستا-ريكانىڭ قاقپاسىندا جاۋاپسىز جەتى گول سالدى – 7:0.

بۇل كۇندەرى بەلگيا قۇراماسىن جەر-كوككە سىيعىزباي ماقتايتىندار وتە كوپ. بارلىعىنىڭ ايتاتىنى «قاقپاشى تيبو كۋرتۋانىڭ رەاكتسياسى كەرەمەت. قورعانىستا توبي الدەرۆەيرەلد پەن يان ۆەرتونگەن تۇرعاندا ولاردىڭ ايىپ الاڭىندا ەركىن كوسىلە المايسىڭ. ال الاڭنىڭ ورتاسى مەن العى شەپتە كەۆين دە برەينە، يۋري تيلەمانس، اكسەل ۆيتسەل، ەدەن ازار، رومەلۋ لۋكاكۋ جانە ميشي باتشۋاي ەركىن ويقاستايدى. ولاردىڭ تاۋ قوپاراتىنداي قارقىنىنا شىداس بەرۋدىڭ ءوزى قيىن» دەگەنگە كەلىپ سايادى. شىنى كەرەك، بۇل كەزدەسۋدە اتالعان كوماندادان ونداي قارقىن بايقامادىق. وسى ماتچتا جاراقاتىنان ءالى دە ايىعا الماي جۇرگەن لۋكاكۋدىڭ جوقتىعى انىق سەزىل­دى. دەنەسى قۇرىشتاي قۇيىلعانداي بو­ي­شاڭ شابۋىلشىنىڭ قيىننان قيىستىرا بىلەتىن ادەتى بار ەدى.

كانادا قۇراماسى دا «وڭاي الىنبايتىن قامال» ەكەندەرىن بىردەن بايقاتتى. ولار وزدەرىن قورعانىستا وتە سەنىمدى وينايتىن ۇجىم ەكەندەرىن كورسەتە ءبىلدى. شابۋىل شەبى دە وسال ەمەس-ءتى. ءبىرىنشى تايمنىڭ ورتاسىنا دەيىنگى دەرەكتەرگە زەر سالساق، كانادالىقتار قاقپاعا سەگىز سوققى باعىتتاسا، قارسىلاستارىنىڭ ءبىر عانا سوققى جاساۋعا شاما-شارقىلارى جەتكەن ەكەن. ورتادا دوپتى ءوز يەلىگىندە ۇستاي الادى. ۇيەڭكى جاپىراقتار ەلىنىڭ ورەندەرى بەلگيالىقتاردىڭ بارلىق شابۋىلىنا تويتارىس بەردى. ولار تەك ءبىرىنشى تايمنىڭ سوڭىندا ميشي باتشۋايدى عانا توقتالا المادى. «فەنەرباحچە­نىڭ» شابۋىلشىسى تەپكەن دوپ قاقپا تورى­نان تابىلدى – 1:0. ال وعان دەيىن بەلگيا­نىڭ قاقپاسىنا ەكى پەنالتي بەلگىلەنۋگە ء­تيىس ەدى. بىراق تورەشى دجانني سيكازۆە­نىڭ ەكى رەتىندە دە VAR-عا جۇگىنۋدى ءجون كورمەدى. بۇل ونىڭ ورەسكەل قاتەلىگى ەدى. دەسەك تە زامبيالىق قازى 11 مەترلىك نۇكتەنى ءبىر مارتە مەڭزەگەنىن ايتا كەتەيىك. الايدا كانادانىڭ فۋتبولشىلارى وزدەرىنە بەرىلگەن تاماشا مۇمكىندىكتى وڭدى پايدالانا المادى. الفونسو دەۆيستىڭ تەپكەن دوبىن تيبو كۋرتۋا كەرى قايتاردى. ەكىنشى تايمدا كانادالىق­تار قارىمتا قايتارۋدىڭ بارلىق امال-ارەكەتىن جاسادى. ولار قاقپانى 22 رەت نىساناعا الدى. بىراق كۋرتۋانىڭ ءمىن­سىز ويىننىڭ ارقاسىندا عانا بەلگيا­نىڭ قاقپاسىنا بىردە-ءبىر دوپ كىرگەن جوق. كەيبىر ساتتەردەگى قورعاۋشىلار­دىڭ دا ساۋاتتى ويىنىن اتاپ وتكەن ابزال. ال ماقتاۋلى «قىزىل سويقاندار» نە­بارى توعىز مارتە عانا قاقپاشى ميلان بوريان­دى مازالاعان ەكەن.

كەشە شۆەيتساريا مەن كامەرۋن (ساعات 16:00-دە)، ۋرۋگۆاي مەن وڭتۇستىك كورەيا (19:00)، پورتۋگاليا مەن گانا (22:00) جانە برازيليا مەن سەربيا (01:00) سايىسقا ءتۇستى. بۇگىن توپتىق ءتۋرنيردىڭ ەكىنشى تۋرى باستالادى. بۇل كەزدەسۋلەر ۋەلس پەن يران (16:00)، قاتار مەن سەنەگال (19:00)، نيدەرلاند پەن ەكۆادور (22:00) جانە انگليا مەن اقش (01:00) اراسىندا وتەدى. ەرتەڭ تۋنيس پەن اۋستراليا (16:00)، پولشا مەن ساۋد ارابياسى (19:00)، فرانتسيا مەن دانيا (22:00) جانە ارگەنتينا مەن مەكسيكا (01:00) فۋتبولشىلارى شەبەرلىك بايقاسادى. ال جەكسەنبى كۇنى جاپونيا مەن كوستا-ريكا (16:00)، بەلگيا مەن موروككو (19:00)، حورۆاتيا مەن كانادا (22:00) جانە يسپانيا مەن گەرمانيانىڭ (01:00) ويىنىن تاماشالايمىز.

سوڭعى جاڭالىقتار

ۇقساس جاڭالىقتار