«ەگەر ۇكىمەتتەر جاڭا الەۋمەتتىك كەلىسىمشارتتى شۇعىل تۇردە جۇزەگە اسىرماسا, الەم بارلىق ايماقتارداعى جۇمىسشىلار ءۇشىن اۋىر زارداپتارعا اكەلەتىن تاريحي ەكونوميكالىق قۇلدىراۋ الدىندا تۇر. الەمگە تولىق جۇمىسپەن قامتۋ, لايىقتى ەڭبەك جانە جالپى ءوسىپ-وركەندەۋگە نەگىزدەلگەن جاڭا بيزنەس ۇلگىلەرى بار جاڭا ەكونوميكالىق مودەل قاجەت», دەدى كونگرەسس دەلەگاتتارى.
حكك باس حاتشىسى لاۋازىمىندا ءوز قىزمەتىن تامامداعان شاران بارروۋ الەمنىڭ 161 ەلىنەن كەلگەن 300 ۇلتتىق كاسىپوداق ورتالىعىنىڭ باسشىلارىنا سويلەگەن سوزىندە جاھاندىق پاندەميا الەم بۇرىن-سوڭدى بولماعان ادامزات ىنتىماقتاستىعىنىڭ ەڭ ۇلكەن اكتىسىن كورسەتكەنىن اتاپ ءوتتى. ونىڭ ايتۋىنشا, كاسىپوداق قوزعالىسى جۇمىسشىلاردىڭ قۇقىقتارىن قورعاۋدا بۇرىنعىدان بەتەر بىرىكتىرىلگەن. الايدا پاندەميانىڭ قيىن جىلدارى دا «كورپوراتيۆتىك اشكوزدىكتىڭ» كورسەتكىشىنە اينالدى. بۇل كەزدە جوسىقسىز جۇمىس بەرۋشىلەر ءوز ارتىقشىلىعىن پايدالانىپ, جۇمىسشىلارمەن كەلىسىمشارتتى بۇزىپ, كورپوراتيۆتىك رەتتەۋدىڭ جوقتىعىن كورسەتتى. حكك ستاتيستيكاسىنا سايكەس الەمدەگى ەڭ ءىرى 10 كورپوراتسيا 2021 جىلى شامامەن 360 ملرد دوللاردى قۇرايتىن جيىنتىق تابىسىن جاريالادى.
«جۇمىسشىلار مەن ولاردىڭ كاسىپوداقتارى ۇكىمەتتەر, جۇمىسشىلار جانە بيزنەس اراسىندا جاڭا الەۋمەتتىك كەلىسىمشارتتى تالاپ ەتۋدە. ول تۇراقتى جۇمىس ورىندارىن, تۇراقتى جالاقىنى, قۇقىقتاردى, تەڭدىكتى, ينكليۋزيۆتىلىكتى جانە الەۋمەتتىك قورعاۋدى كورسەتۋى كەرەك. ۇلتتىق جانە حالىقارالىق زاڭنامانى جاڭارتۋ ارقىلى جۇمىس بەرۋشىلەردىڭ جاۋاپكەرشىلىگىن كۇشەيتۋ قاجەت. كاسىپوداقتار حالىقارالىق ەڭبەك ۇيىمىنىڭ ستاندارتتارى مەن ەڭبەك سالاسىن باسقارۋداعى ولقىلىقتاردى جويۋعا ارنالعان جاڭا كونۆەنتسيانى قابىلداۋىن قولدايدى», دەدى شاران بارروۋ.
ول ۇلتتىق كاسىپوداق ورتالىقتارىنا سوڭعى بىرنەشە جىلداعى جەمىستى جۇمىسى ءۇشىن العىسىن ءبىلدىردى.
كونگرەسس دەلەگاتتارىنا باربادوس پرەمەر-ءمينيسترى ميا موتلي, بۇۇ-نىڭ ادام قۇقىقتارى جونىندەگى بۇرىنعى كوميسسارى مەري روبينسون جانە اقش ەڭبەك ءمينيسترى مارتي ۋولش كاسىپوداق قىزمەتىن ودان ءارى دامىتۋعا ساتتىلىك تىلەدى. ولار ۇلتتىق كاسىپوداق ورتالىقتارىنىڭ باسشىلارى كوتەرگەن ماسەلەلەردىڭ وزەكتىلىگىن اتاپ ءوتتى.
قازاقستاندىق دەلەگاتسيانىڭ باسشىسى, قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ساتىبالدى داۋلەتالين دە كونگرەسس جۇمىسىنان العان اسەرىمەن ءبولىستى. ونىڭ ايتۋىنشا, جاھاندىق كاسىپوداق فورۋمىنا قاتىسۋشىلار كونگرەستىڭ التى كۇنىندە ىنتىماعى مەن بىرلىگىن پاش ەتتى.
«كاسىپوداقتاردىڭ كۇشى – ولاردىڭ بىرلىگىندە, ىنتىماعىندا, ادىلدىگىندە. باعدارلامالىق قۇجاتتاردى تالقىلاۋعا قاتىسۋ, ارىپتەستەر مەن پىكىرلەستەرمەن ارالاسۋ, تانىسۋ بارىمىزگە پايدالى بولدى. كاسىپوداقتار فەدەراتسياسى شەتەلدىك ۇلتتىق كاسىپوداق ورتالىقتارىمەن جانە حالىقارالىق كاسىپوداقتار كونفەدەراتسياسىمەن تىعىز ىنتىماقتاستىقتا الەۋمەتتىك ادىلدىك, لايىقتى ەڭبەك يدەياسىن كەڭىنەن ناسيحاتتاۋ, ەڭبەك قۇقىقتارى مەن مۇمكىندىكتەرىنىڭ كەز كەلگەن كەمسىتۋشىلىكسىز تەڭدىگى, حالىقارالىق كاسىپوداق قوزعالىسىن ودان ءارى نىعايتۋ جانە دامىتۋ ءۇشىن كۇرەستى جالعاستىرادى», دەدى س.داۋلەتالين.
ايتا كەتۋ كەرەك, ءداستۇرلى تۇردە حكك مۇشە ەلدەردىڭ كاسىپوداق كوشباسشىلارى «ەڭ ناشار جۇمىس بەرۋشىلەر» ءداستۇرلى رەيتينگىن قالىپتاستىردى. بۇل جولى ونىڭ قۇرامىنا ءىرى ترانسۇلتتىق كومپانيالاردىڭ باسشىلارى كىردى. ەڭ ناشار باستىقتار: P&O Ferries باس ديرەكتورى پيتەر حەببلتۋەيت, Amazon باس ديرەكتورى دجەفف بەزوس, Qantas باس ديرەكتورى الان دجويس, Emirates Airline جانە Group باس ديرەكتورى احمەد بين سايد ال ماكتۋم, Starbucks باس ديرەكتورى حوۆارد شۋلتس, Hancock Prospecting باس ديرەكتورى دجينا راينحارت.
ەسكە سالايىق, 17-22 قاراشا ارالىعىندا مەلبۋرن قالاسىندا حالىقارالىق كاسىپوداقتار كونفەدەراتسياسىنىڭ V كونگرەسى ءوتتى. 300 ۇلتتىق كاسىپوداق ورتالىقتارىنىڭ وكىلدەرى جانە دۇنيە جۇزىندە 200 ملن-عا جۋىق جۇمىسشىنى بىرىكتىرەتىن مىڭنان استام كاسىپوداق كوشباسشىلارى مەن بەلسەندىلەرى جاھاندىق كۇن ءتارتىبىن تالقىلاۋ جانە جاڭا الەۋمەتتىك كەلىسىمشارت تۋرالى دەكلاراتسيانى قابىلداۋ ءۇشىن جينالدى. سەزدىڭ ءبىرىنشى كۇنىندە حكك باس كەڭەسى قازاقستان رەسپۋبليكاسى كاسىپوداقتار فەدەراتسياسىنىڭ مۇشەلىگىن قالپىنا كەلتىرۋ تۋرالى شەشىم قابىلدادى.
