قاسىم-جومارت توقاەۆتىڭ باستاماسىمەن سوڭعى وتىز جىلدا توقىراپ قالعان ساياسي جۇيەگە جان ءبىتىپ, مەملەكەتتىك باسقارۋدىڭ جاڭا مودەلى قۇرىلدى. دەموكراتيالاندىرۋعا باعىتتالعان ساياسي رەفورمالار لەگى باستالدى. حالىق قازىناسىنا قول سۇققانداردىڭ قاراجاتىن قايتارۋ قولعا الىندى.
وسىنىڭ ءبارىن كورىپ-ءبىلىپ وتىرعان دانا حالقىمىز مەملەكەت باسشىسىنا ۇلكەن ءۇمىت ارتىپ وتىر. ال ءبىزدىڭ ەل ساياسي تۇرعىدان كوزى اشىق قانا ەمەس, كورەگەن حالىق. بۇل سوزىمە ون ادامنىڭ سەگىزىنىڭ قازىرگى پرەزيدەنتتى قولداپ, داۋىس بەرۋى دالەل بولا الادى. بۇل جولعى ساياسي دودادا بۇرىن مۇلدە سايلاۋعا بارماعان ادامدار بەلسەندىلىك تانىتتى. وسىنىڭ ءوزى حالىقتىڭ بۇل سايلاۋعا سەنىمىن, ىقىلاسىن ايعاقتايدى. حالىق مەملەكەت قۇرۋداعى جاۋاپكەرشىلىگىن ۇعىنىپ وتىر.
حالىق تەرىس ويلى ازاماتتاردىڭ ءتۇرلى ىرىتكى سوزدەرىنىڭ قۇنىن پارىقتاي الاتىن دەڭگەيگە جەتتى. بۇل – ساياسي ترانسفورماتسيانىڭ ماڭىزدى جەتىستىگى. بيلىكتىڭ دۇرىسىن دۇرىس, بۇرىسىن بۇرىس دەپ ايتا الار, قوعام جاۋاپكەرشىلىگىن موينىنا الاتىن ازاماتتار توبى قالىپتاستى. سول ازاماتتار توبى دا قاسىم-جومارت توقاەۆتى قولداۋ ناۋقانىندا لوكوموتيۆ ءرولىن اتقاردى. دەموكراتيا دەگەننىڭ ويىڭا كەلگەندى ايتا بەرۋ ەمەستىگىن قوعامنىڭ كوپ بولىگى بايقادى. ەلدىڭ اماندىعى مەن جۇرتتىڭ تىنىشتىعى ەڭ جوعارى قۇندىلىق ەكەنىن بايىپتاعان ازاماتتارعا تەك العىس ايتىپ قويماي, ولاردى قولداۋ قاجەت. بىرىڭعاي ماقتاۋدىڭ دا, سىدىرتا جامانداۋدىڭ دا قاتە باعىت ەكەنىن, وندايدىڭ استارىندا جەكە باس مۇددەسى تۇراتىنىن تۇسىنگەندە عانا سانالى قوعام پايدا بولادى.
حالىقتىڭ بۇل قولداۋى تۇپتەپ كەلگەندە, ەل تىنىشتىعى مەن ساياسي تۇراقتىلىق ءۇشىن بەرىلگەن مۇمكىندىك. ەل-جۇرت ەۋرازيا قۇرلىعىندا قانداي جانجالدار بولىپ جاتقانىن, الپاۋىت ەلدەر تاراپىنان قازاقستاندى ءتۇرلى ساياسي-اسكەري, ديپلوماتيالىق تەكەتىرەستەرگە تارتۋ ءۇشىن ۇلكەن ويىندار ءجۇرىپ جاتقانىن باعامداپ وتىر. وسى ءبىر قىم-قۋىت كەزەڭدە ەلدى حالىقارالىق شيەلەنىسكە ۇشىراتپاۋعا, جانجال ءورتى ايماعىنا اينالدىرماۋعا مەملەكەت باسشىسىنىڭ شاما-شارقى, قارىم-قابىلەتى, ءبىلىم-بىلىكتىلىگى تولىعىمەن جەتەدى دەپ سەنىپ وتىر.
بۇل سايلاۋ جاقسىلىق بولارىنا سەنەتىن ازاماتتاردىڭ كوپ ەكەنىن كورسەتتى. ەندەشە, حالىق سەنىمى اقتالسىن!
ۋايس ەرسايىن ۇلى,
«امانات» كوميسسياسىنىڭ مۇشەسى, زاڭگەر
