فوتو: egemen.kz/ەرلان ومار
ماشينا جاساۋشىلار فورۋمى 1300-دەن استام دەلەگاتتىڭ باسىن قوستى, ونىڭ ىشىندە اۆستريا, گەرمانيا, يتاليا, قحر جانە باسقا دا 20-دان استام ەلدەن كەلگەن جەتەكشى وندىرۋشىلەر, ماماندار مەن بيزنەس وكىلدەرى بار.
پرەمەر-مينيستر ولجاس بەكتەنوۆ فورۋمعا قاتىسۋشىلارعا ارناعان قۇتتىقتاۋ سوزىندە ەلىمىزدە سالالاردى جاڭعىرتۋ مەن ەكونوميكانىڭ تۇراقتى ءوسۋىنىڭ ينستيتۋتسيونالدىق نەگىزىنە اينالعان جاڭا كونستيتۋتسيانىڭ قابىلدانعانىن اتاپ ءوتتى.
ء«بىز ءبارىمىز ەل تاعدىرىن ايقىندايتىن ەلەۋلى كەزەڭنىڭ كۋاسى بولدىق. قوعامنىڭ بەلسەندى قولداۋىمەن رەفەرەندۋمدا جاڭا كونستيتۋتسيا قابىلداندى. ارقايسىمىزعا ءمالىم, ەكونوميكانىڭ جانە قوعامنىڭ بارلىق سالاسىن ودان ءارى جاڭعىرتۋعا مۇمكىندىك بەرەتىن ەلىمىزدىڭ نەگىزگى زاڭىنىڭ اۆتورى – مەملەكەت باسشىسى قاسىم-جومارت كەمەل ۇلى توقاەۆ.
اسا ماڭىزدى قۇجات ۇلتىمىزدىڭ ۇزاقمەرزىمدى دامۋ باعدارىن ايقىنداپ, قازاقستاننىڭ كەز كەلگەن سىن-قاتەرلەرگە توتەپ بەرۋىن قامتاماسىز ەتەدى. وسىلايشا, «ادىلەتتى قازاقستاندى» قۇرۋ ءۇشىن بەرىك قۇقىقتىق نەگىز قالاندى. بۇل ەكونوميكاعا, سونىڭ ىشىندە ونەركاسىپ سالاسىنا دا ەرەكشە جاۋاپكەرشىلىك جۇكتەيدى ءارى ەلىمىزدىڭ مول شيكىزاتتىق الەۋەتىن حالىقتىڭ ءال-اۋقاتىن جاقسارتۋعا باعىتتاي الاتىن قۋاتتى وڭدەۋشى سەكتوردى دامىتۋدى تالاپ ەتەدى», دەدى ولجاس بەكتەنوۆ.
پرەمەر-مينيستر مەملەكەت باسشىسىنىڭ قازاقستان حالقىنا جولداۋىندا جانە ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىنا سايكەس, ەلىمىزدە ماشينا جاساۋ سالاسىن دامىتۋ ءۇشىن بولجامدى ءارى تۇراقتى ورتا قالىپتاستىرۋ بويىنشا جۇمىستار جۇرگىزىلىپ جاتقانىن اتاپ ءوتتى. مەملەكەت پەن بيزنەستىڭ ورتاق مىندەتى – ءادىل جانە قاۋىپسىز ەڭبەك جاعدايىن قامتاماسىز ەتۋ, الەۋمەتتىك ارىپتەستىك جۇيەسىن دامىتۋ.
وتكەن جىلى ماشينا جاساۋ ءوندىرىسى 5,7 ترلن تەڭگەگە جەتىپ, ناقتى كولەم يندەكسى 13%-عا ءوستى. وتاندىق وندىرۋشىلەر سىرتقى نارىقتارعا باتىل شىعىپ كەلەدى, سوڭعى 5 جىلدا ەكسپورت كولەمى ەكى ەسەدەن اسىپ, 1,3 ملرد دوللاردان 3,1 ملرد دوللارعا دەيىن جەتتى. رەسپۋبليكا بويىنشا بارلىعى 4 مىڭعا جۋىق زاۋىت جۇمىس ىستەيدى, وندا 130 مىڭنان استام بىلىكتى مامان ەڭبەك ەتەدى.
نەگىزگى كاپيتالعا تارتىلاتىن ينۆەستيتسيانىڭ ۇشتەن بىرگە ءوسۋى – 376 ملرد تەڭگەگە جەتۋى سالانى ءارى قاراي جاڭعىرتۋعا نەگىز بولادى. بارلىق نەگىزگى باعىتتا, ونىڭ ىشىندە, اۆتوموبيل, اۋىل شارۋاشىلىعى, تەمىرجول جانە ەلەكتروتەحنيكالىق ماشينا جاساۋ سالالارىندا وڭ سەرپىن بايقالادى.
