ۇلى دالانىڭ سالتاناتتى سازى مەن ساعىمدى سارىارقانىڭ ساۋمال ساعىنىشىمەن قوسا الىستاعى اعايىنعا ارناپ اتاجۇرتتىڭ اماناتىن ارقالاي كەلگەن ساحنا ساڭلاقتارىنىڭ كونتسەرتتىك باعدارلاماسى شەتتەگى قازاقتاردىڭ ۇلتتىق جادىن جاڭعىرتىپ, انا ءتىلى مەن ادەبيەتىنە, ۇلتتىق ونەرى مەن ءتول مادەنيەتىنە دەگەن قىزىعۋشىلىعىن ارتتىرۋعا, تاريحي تامىرىنان اجىراپ قالماۋىنا قام-قاراكەت جاساپ, رۋحاني تۇرعىدا قولداۋ كورسەتۋ ماقساتىندا ۇيىمداستىرىلعان بولاتىن.
ورىنبور تورىندە وتكەن مادەني شارانىڭ مايەگى بولعان «وتانداستار قورىنىڭ» پرەزيدەنتى ابزال ساپاربەك ۇلى جانە ىزگى ىستەرگە ايقارا قۇشاق اشىپ, بىرلىگى مەن تىرلىگى جاراسا قولداۋ كورسەتكەن كوپۇلتتى ورىنبور وبلىسىنىڭ گۋبەرناتورى دەنيس ۆلاديميروۆيچ پاسلەر مىرزا قۇتتىقتاۋ ءسوز سويلەپ, توسكەيدە مالى, توسەكتە باسى قوسىلىپ, قوڭسى قونعان قازاقستان مەن رەسەي قاشاننان-اق ەكونوميكالىق تۇرعىدا ستراتەگيالىق سەنىمدى سەرىكتەس, الەۋمەتتىك سالادا ىنتىماعى جاراسقان كورشى, ال مادەني-گۋمانيتارلىق بايلانىستار باعىتىندا بايىرعى ارىپتەس رەتىندە الىس-بەرىس پەن بارىس-كەلىستى سارا جولعا سالعان, ىنتىماقتاس ەلدەر ەكەندىگىن ايرىقشا اتاپ ءوتتى.
قۇرمەتتى قوناق رەتىندە رەسەي فەدەراتسياسى پرەزيدەنتى جانىنداعى كەڭەستىڭ حالىقارالىق قاتىناستار جونىندەگى مەملەكەتتىك ۇلتتىق ساياساتتى اقپاراتتىق قامتاماسىز ەتۋ كوميسسياسىنىڭ جاۋاپتى حاتشىسى - حۋدولەەۆ اندرەي نيكولاەۆيچ جانە ازەربايجان, باشقۇرت ۇلتتارىنىڭ مادەني ورتالىقتارىنىڭ باسشىلارى قاتىستى.
ۇلان-بايتاق ۇلى دالانىڭ سازدى سالەمىن اسقار الاتاۋدىڭ بوكتەرىندەگى ارايلى الماتىدان الماتى اكىمدىگىنىڭ قولداۋىمەن ارنايى الىپ كەلگەن «سازگەن سازى» فولكلورلىق ەتنوگرافيالىق ءانسامبلى مەن «الاتاۋ» ءداستۇرلى ونەر تەاترى ونەرپازدارى ورىنبور ورداسىن قازاقتىڭ انىمەن الديلەپ, كۇي كۇمبىرىمەن تەربەتتى.
مەرەكەلىك كەش قانداس باۋىرلارىمىزدىڭ جادىندا جاتتالىپ, كورەرمەن كوڭىلىندە كوپكە دەيىن ساقتالارى انىق.
