ەۋرازيالىق ەكونوميكالىق كوميسسيانىڭ باسشىلىق قىزمەتتەرى ءۇش ەل ازاماتتارىنا تەڭ بولىنەدى

استانا. 30 مامىر. ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى راحىم وشاقباەۆ ەۋ­را­زيالىق ەكونوميكالىق كوميسسيانىڭ باسشىلىق قىزمەتتەرى ءۇش ەلدىڭ ازاماتتارىنا تەڭ ءبولىنىپ بەرىلەتىنىن جەتكىزدى. بۇل تۋرالى egemen.kz ءتىلشىسى حابارلادى. ورتالىق كوممۋنيكاتسيالار قىزمەتىندە وتكەن بريفينگتە راحىم وشاقباەۆ: «قازىرگى تاڭدا  ەۋرازيالىق كوميسسيادا 20-دان استام دەپارتامەنت بار. كوميسسيانىڭ تۇراقتى مەكەن-جايى ماسكەۋدە بولعاندىقتان, دەپارتامەنت ديرەكتورى لاۋازىمىندا رەسەيلىك ازاماتتار باسىم بولىپ تۇر. قازىر بۇل تەڭسىزدىكتى جويۋ ءۇشىن شارت ماتىنىندە دەپارتامەنت ديرەكتورى جانە ولاردىڭ ورىنباسارلارى دەڭگەيىندە تەڭ دارەجەدە ۇسىنىلاتىندىعى جازىلعان. ياعني, ەگەر دەپارتامەنت ديرەكتورى قازاقستان ازاماتى بولسا, وندا ونىڭ ورىنباسارلارىنىڭ ءبىرى رەسەي, كەلەسىسى بەلارۋس ازاماتى بولۋى ءتيىس. بۇل قارجىلاندىرۋدى كەڭەيتۋدى تالاپ ەتەدى», – دەدى. جولدىباي بازار. دەرەككوز: egemen.kz فوتو: strategy2050.kz.