قاراعاندى وبلىسى سايلاۋ كوميسسياسىنىڭ حابارالۋىنشا, ەقىۇ دياقب بايقاۋشىسى ميسسياسى وكىلدەرى كەلدى. سونىمەن قاتار, تمد كەلگەن بايقاۋشىلارى دا بار.
قاراعاندى قالاسىنداعى №12 سايلاۋ ۋچاسكەسىندە 2467 سايلاۋشى تىركەلگەن. بۇل ۋچاسكەدە قالانىڭ بايىرعى تۇرعىندارى تۇرادى. سايلاۋ ۋچاسكەسىنىڭ توراعاسى ۆلاديمير ءپريزدىڭ ايتۋىنشا, ۋچاسكەگە 2492 بيۋللەتەن بەرىلگەن. تاڭعى ساعات 6.00-دە سايلاۋ ۋچاسكەسى اشىلىپ, تۋرا 7:00-دە جۇمىسىن باستادى.
ءبىزدىڭ №12 سايلاۋ ۋچاسكەسىندە 2467 ادام بار. بىزگى ءبىر تاۋلىك بۇرىن 2492 بيۋللەتەن بەرىلدى. ولار سەيفكە سالىنىپ, كۇزەتپەن ساقتالدى. تاڭعى 6-دا سايلاۋ ۋچاسكەسى اشىلعاندا بايقاۋشى جانە سەنىمدى وكىلدەردەن قۇرالعان 10 ادام كەلدى. ولارعا سايلاۋ ۋچاسكەسىندە سايلاۋ بارىسىن باقىلاۋ ءۇشىن بارلىق جاعداي جاسالدى. ونىڭ ىشىندە پرەزيدەنتكە ۇمىتكەرلەردىڭ 2-ءى سەنىمدى وكىلى, 8 ادام ء تۇرلى پارتيا قوعامدىق ۇيىمداردان باقىلاۋدا. 21 ادام ۇيدەن داۋىس بەرەدى. ءبىرىنشى رەت داۋىس بەرۋشى 89 جاس بار. العاشقى كەلۋشىلەر مەن ءبىرىنشى رەت داۋىس بەرۋشى جاستارعا سىي-سياپات جاسالدى, دەيدى ۆلاديمير نيكولاەۆيچ.
پرەزيدەنتتىككە ۇمىتكەر جيگۋلي دايراباەۆتىڭ سەنىمدى وكىلى نۇرلان ناۋرىزوۆ وسى سايلاۋ ۋچاسكەسىندە بايقاۋشى. سەنىمدى وكىل قازىرگى ۋاقىتقا دەيىن داۋىس بەرۋ كەزىندە ەشقانداي زاڭ بۇزۋشىلىقتار ورىن الماعانىن ايتادى.
- قازىرگى ۋاقىتتا قاراعاندى قالاسىنداعى 12 سايلاۋ ۋچاسكەسىندە داۋىس بەرۋ حالىق تاراپىنان بەلسەندى. وتباسىلارىمەن كەلىپ داۋىس بەرىپ جاتقانىن كورىپ وتىرمىز. كەلۋشىلەردىڭ كوڭىل كۇيى جاقسى. باقىلاۋ كەزىندە ازىرگە ەشقانداي زاڭ بۇزۋشىلىق بولعان جوق. سايلاۋ كوميسسياسى ءوز جۇمىستارىن ءتيىستى دەڭگەيدە اتقارىپ وتىر, - دەيدى نۇرلان ناۋرىزوۆ.
اتالعان سايلاۋ ۋچاسكەسىندە ساعات 9-عا دەيىن 130 ادام كەلىپ داۋىس بەردى.
قاراعاندى وبلىسىنىڭ اكىمى جەڭىس قاسىمبەك تە قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا قاراعاندىداعى ءال-فارابي اتىنداعى مەكتەپ-گيمنازياندا ورنالاسقان №42 سايلاۋ ۋچاسكەسىندە داۋىس بەردى.
- ءبىزدىڭ ۋچاسكەدە 1825 سايلاۋشى تىركەلگەن, ونىڭ ىشىندە 37-ءى ءبىرىنشى رەت داۋىس بەرۋشىلەر. ۇيدەن سايلاۋعا قاتىسۋ تۋرالى وتىنىشتەر تۇسكەن جوق. تاڭعى سەگىزگە دەيىن 60-قا جۋىق ادام داۋىس بەردى, - دەدى № 42 ۋچاسكەلىك كوميسسيانىڭ ءتورايىمى سابينا بيجانوۆا.
داۋىس بەرۋ پروتسەسىن كوممەرتسيالىق ەمەس ۇيىمدار مەن قوعامدىق بىرلەستىكتەردىڭ تاۋەلسىز باقىلاۋشىلارى قاداعالايدى.
ەستەرىڭىزگە سالا كەتەيىك, قاراعاندى وبلىسىندا داۋىس بەرۋگە ارنالعان 642 ۋچاسكە بار.
