قوناقتار قاتارىندا قازاقستاننىڭ حالىق ءارتيسى ايمان مۇساقوجاەۆا, وليمپيادا چەمپيونى الەكساندر ۆينوكۋروۆ, كانن كينوفەستيۆالىنىڭ لاۋرەاتى سامال ەسلياموۆا, گەنەرال-لەيتەنانت اباي تاسبولاتوۆ جانە زيالى قاۋىم وكىلدەرى, قوعام قايراتكەرلەرى بولدى.
مادەنيەت جانە سپورت ءمينيسترى داۋرەن اباەۆ مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىن وقىپ بەردى.
«بارشا قىزىلجارلىقتار ءۇشىن ايتۋلى وقيعا – ءسابيت مۇقانوۆ اتىنداعى قازاق سازدى-دراما تەاترىنىڭ جاڭا عيماراتىنىڭ اشىلۋ سالتاناتىمەن شىن جۇرەكتەن قۇتتىقتايمىن. بۇل تاريحي ءسات ەلىمىزدەگى تەاتر ونەرىنىڭ جىلناماسىنا ەنەدى. ەگەمەندىك العان جىلدار ۇلتتىق مادەنيەتىمىزدىڭ قارىشتاپ ورلەۋىنىڭ جاڭا ءداۋىرى سانالادى.
ەلىمىزدە جاس تالانتتاردىڭ شىعارماشىلىق الەۋەتىن ارتتىرۋ ءۇشىن بارلىق جاعداي جاسالۋدا.
شيرەك عاسىرعا جۋىق تاريحى بار ءسابيت مۇقانوۆ اتىنداعى قازاق تەاترىنىڭ كيەلى ساحناسىندا 100-دەن استام درامالىق شىعارمالار قويىلىپ, كورەرمەننىڭ كوزايىمىنا اينالدى. ۇجىم شىعارماشىلىق ىزدەنىستىڭ ارقاسىندا رەسپۋبليكالىق جانە حالىقارالىق تەاتر فەستيۆالدەرىندە تالاي بيىكتەردى باعىندىردى.
ونەر ورداسىنىڭ قابىرعاسىنان الەمگە تانىمال كينواكتريسا سامال ەسلياموۆا, رەجيسسەر فارحات مولداعالي سياقتى دارىندى جاستار تۇلەپ ۇشتى. قازاق مادەنيەتى ونەردىڭ بارلىق سالاسىندا عالامدىق مادەني مۇرانىڭ تانىمال بولىگى بولۋى ءتيىس. سىزدەرگە وسى باعىتتا مول شىعارماشىلىق تابىس, جارقىن ىزدەنىستەر, ءساتتى جوبالار جانە كورەرمەندەردىڭ ماحابباتىن تىلەيمىن», دەپ جازىلعان پرەزيدەنتتىڭ قۇتتىقتاۋ حاتىندا.
قالا تۇرعىندارى مەن قوناقتارىن قۇتتىقتاي وتىرىپ, مادەنيەت جانە سپورت ءمينيسترى داۋرەن اباەۆ سولتۇستىك قازاقستاننىڭ اۋماعى اتاقتى اقىندار مەن جازۋشىلاردىڭ كيەلى مەكەنى ەكەنىن اتاپ ءوتتى.
«تەرىسكەيدىڭ تەمىرقازىق تەاترى جاڭا عيماراتقا كىرىپ, قازاق ونەرى, ۇلت رۋحانياتى ۇلكەن قۋانىشقا كەنەلىپ جاتىر. بۇل – تەك سولتۇستىك قازاقستان وبلىسىنىڭ عانا ەمەس, تۇتاس حالقىمىزدىڭ ورتاق ولجاسى. سەبەبى كيەلى قىزىلجار توپىراعى – ساحارانى ساحنا ەتكەن قانشاما سال-سەرىنىڭ كيەلى بەسىگى. ەجەلدەن ەلگە تۇعىر بولعان قارت قىزىلجار – قازاق ونەرىنىڭ ءتورى مەن توركىنىندەي.
بۇل بەرەكەلى مەكەندە ماعجان جۇماباەۆ, ءسابيت مۇقانوۆ, عابيت مۇسىرەپوۆ, سافۋان شايمەردەنوۆ سياقتى حالقىمىزدىڭ ءبىرتۋار تۇلعالارى دۇنيەگە كەلگەن. سوندىقتان ءبىز ءۇشىن بۇل ءوڭىر قاشاندا سازبەن سىرلاسىپ, تاريحپەن تىنىستاپ جاتقانداي بولادى», دەدى مينيستر داۋرەن اباەۆ.
شىندىعىندا بۇگىنگى كۇن سولتۇستىكقازاقستاندىقتار ءۇشىن كوپتەن كۇتكەن جانە ەلەۋلى وقيعا بولعانى انىق. سقو-دا بىرەگەي ارحيتەكتۋراسى بار تاعى ءبىر نىسان پايدا بولدى. الداعى ۋاقىتتا جاڭا قازاق تەاترى قالانىڭ باستى كورىكتى جەرىنە اينالاتىنى ءسوزسىز.
«تەاتر-رۋحاني, مادەني جانە تاريحي ورتالىق. قوعامدى دامىتۋ ءۇشىن ەكونوميكامەن قاتار ونەر سالاسىن دا دامىتۋ كەرەك. ەلدە ءبىلىمدى, مادەنيەتتى جانە ەركىن ويلى ازاماتتاردى قالىپتاستىرۋ ءۇشىن جاعداي جاساۋ ماڭىزدى. بىزگە رۋحاني قۇندىلىقتارعا نەگىزدەلگەن قوعام قاجەت. ونەرگە جاقىن ادام اركەز جوعارى ستاندارتتارعا ۇمتىلادى», دەدى قۇمار اقساقالوۆ.
رەسمي بولىمنەن كەيىن ارنايى شاقىرىلعان قوناقتار مەن ونەرسۇيەر قاۋىم ءسابيت مۇقانوۆتىڭ پوۆەسى نەگىزىندە قويىلعان «شوقان» سپەكتاكلىنىڭ پرەمەراسىن تاماشالادى.
