ورتالىق كوممۋنيكاتسيالار قىزمەتىندە وتكەن بريفينگتە ر. كونياشكين eGov.kz ەلەكتروندى ۇكىمەت پورتالى مەملەكەتتىك قىزمەت كورسەتۋگە وتىنىشتەر قابىلداناتىن جۇيە ەكەندىگىن ءتۇسىندىردى.
«مەملەكەتتىك قىزمەتتەردىڭ ءوزى مەملەكەتتىك ورگانداردىڭ ءارتۇرلى اقپاراتتىق جۇيەلەرىندە كورسەتىلەدى, ولاردىڭ سانى وتە كوپ. ءاربىر مينيسترلىكتە مەملەكەتتىك قىزمەتتەردى كورسەتۋدىڭ اقپاراتتىق جۇيەسى بار», دەدى ول.
ونىڭ ايتۋىنشا, ءاربىر مەملەكەتتىك قىزمەتتە كوپتەگەن ينتەگراتسيالىق قىزمەتتەر, ءارتۇرلى مەملەكەتتىك اقپاراتتىق جۇيەلەر اراسىندا دەرەكتەر الماسۋ بازالارى بار.
«ەگەر قازىرگى ۋاقىتتا باسقا مەملەكەتتىك قىزمەتتەردە قولدانىلاتىن كەم دەگەندە ءبىر شاعىن قىزمەت قولجەتىمدى بولماسا, بۇل ونى الۋعا ارەكەتتەنىپ وتىرعان بەلگىلى ءبىر پايدالانۋشى ءۇشىن مەملەكەتتىك قىزمەتتىڭ قولجەتىمسىزدىگىنە اكەپ سوعادى», دەپ قوستى روستيسلاۆ كونياشكين.
ول قازىر پورتالدىڭ تۇراقتى جانە قولجەتىمدى بولعانىن ايتتى.
«مەملەكەتتىك قىزمەتتەردىڭ باسىم بولىگى تۇراقتى, اقاۋسىز جۇمىس ىستەيدى. سونداي-اق eGov پورتالىنىڭ تۇراقتىلىعى, ونىڭ ىشىندە ونىڭ باسقا قۇرامداس بولىكتەرى: كوشى-قون شليۋزدەرى, ەلەكتروندىق ۇكىمەت جانە ت.ب. ايتارلىقتاي جاقسارعانىن ايتقىم كەلەدى. ءبىز سوڭعى 2 جىلدا قاتەلەر بويىنشا ءبىراز جۇمىس بىتىردىك. پورتالدىڭ قولجەتىمدىلىگىن ايتارلىقتاي ارتتىردىق.
بۇرىنعى ۋاقىتتاردى ەسكە تۇسىرسەك, ءيا, بەلگىلى ءبىر شاعىمدار بولدى, ەندى مەن 2022 جىلدىڭ تامىزىندا پورتالدىڭ بەلگىلى ءبىر اقاۋى بولعانىن مويىندايمىن. بىراق بۇل كوبىنەسە ينفراقۇرىلىمعا قاتىستى ماسەلە بولدى», دەپ تۇيىندەدى ر. كونياشكين.
