ەۋرازيالىق ەكونوميكالىق وداق تۋرالى كەلىسىم-شارتقا قول قويىلدى

استانا. 29 مامىر. بۇگىن استاناداعى تاۋەلسىزدىك سارايىندا قازاقستان, رەسەي, بەلارۋس ەلدەرىنىڭ پرەزيدەنتتەرى ەۋرازيالىق ەكونوميكالىق وداق قۇرۋ تۋرالى شارتقا قول قويدى. بۇل تۋرالى «قازاقپارات» حابارلادى. بۇل تاريحي باسقوسۋعا, ياعني, ەۋرازيالىق ەكونوميكالىق وداق قۇرۋ تۋرالى شارتقا قول قويۋ راسىمىنە ارىپتەس مەملەكەتتەردىڭ پارلامەنت دەپۋتاتتارى, زيالى قاۋىم جانە قوعامدىق ۇيىم وكىلدەرى قاتىستى. شارتتا حالىقارالىق ۇيىمدارعا ءتان بازالىق اسپەكتىلەر, مەملەكەتتەردىڭ تەڭدىگى, اۋماقتىق تۇتاستىعى, سونداي-اق, مۇشە-مەملەكەتتەردىڭ ساياسي قۇرىلىمىنىڭ ەرەكشەلىگىن قۇرمەتتەۋ قاعيداتتارى قامتىلعان. اتالعان وداق جونىندەگى باستى قۇجات 2015 جىلدىڭ 1 قاڭتارىنان باستاپ كۇشىنە ەنەدى. تاعى ءبىر ايتا كەتەر ءجايت, شارتتا شەشىم قابىلداۋ كەزىندەگى كونسەنسۋس مەحانيزمى بارلىق دەڭگەيدە ەسكەرىلگەن. سونىمەن قاتار, تاراپتاردىڭ وداق ورگاندارىنداعى كادر ساياساتى اياسىندا تەڭ قامتىلۋى قاعيداتى دا قاراستىرىلعان. جوعارى ەۋرازيالىق ەكونوميكالىق كەڭەستىڭ شاعىن قۇرامداعى وتىرىسىندا مەملەكەت باسشىسى نۇرسۇلتان نازارباەۆ: «شارت ساۋاتتى, تەڭگەستىرىلگەن, وعان قاتىسۋشى مەملەكەتتەردىڭ بارلىعىنىڭ مۇددەلەرىن ەسەپكە الا وتىرىپ جاسالدى. اۋقىمدى جۇمىس اتقارىلدى. كەلىسپەۋشىلىكتەر دە بارشىلىق بولعانىمەن, ءبىز بارلىق تاراپتاردى قاناعاتتاندىراتىن ورتاق كونسەنسۋسقا كەلىپ وتىرمىز», – دەدى. جولدىباي بازار. دەرەككوز: «قازاقپارات». فوتو: «قازاقپارات».